ماذا يعني أن تكون درزياً في الشتات؟

نص الحلقة :

نيما مرحبا أنا نيما وعم تسمعوا بودكاست مجهول من أخبار الأن.

بسم الله الرحمن الرحيم مساء الخير للجميع. أنا موجود بالضبط في قرية مجدل شمس في الجهة الشمالية الجنوبية بموقع إسمه عين التينة. وليه أنا موجود هون على أساس أحكي عن المأساة اللي عانوا وبيعانوا منها أهل الهضبة بالنسبة لعلاقتهم مع أقاربهم في الجهة الثانية في سوريا.

نيما بالجولان حد ضيعة مجدل شمس الدرزية في تلة على سفح جبل الشيخ، إسمها تلة الصراخ خلال حرب الستة أيام بالـ 1967، لما استولت إسرائيل على مرتفعات الجولان، تم فصل الطائفة الدرزية بمرتفعات الجولان بخط وقف إطلاق النار..  انفصلوا العيل وانمنعوا يلتقوا للأبد! ودون أدنى فرصة ليزوروا بعضهن أو ليغمروا أحبائهم، توصّل الأصدقاء والعيل لطرق مبتكرة ليتواصلوا مع الأقارب على الجانب الآخر وهي الصراخ أو العييط! كانوا الأهل والبنات والأبناء يطلعوا على التل بمكبر الصوت ويصرخوا بأخبارهن وأمالهن وأحلامهن وأمنياتهن لأحبائهن على الجانب الآخر.

نسأل الله تعالى أنو يزيل هي الغيمة وتتحول الحدود لبوابات تعارف وجسور محبة ولم شمل وتنتهي هي المأساة ويحل السلام في هي المنطقة من العالم. والناس ترجع تزور بعضها بدون حواجز وبدون تصاريح وبدون حدود.

نيما اليوم على مجهول رح نكتشف شو يعني أنو تكون أو تكوني درزية بالشتات! تجارب والمحن وكل شي بيناتن. رح نبدا حكايتنا اليوم بقرية صغيرة بالبرازيل، حكيت مع سوزان وهي بتبين للمرة الأولى أن برازيلية تماماً، بس بالواقع بلشت قصتها بالبرازيل من أربع أجيال مع جدها الأكبر.

سوزان أمي أصلها لبناني يعني جدها اجى من لبنان ب عام ألف وثمانية وتسعين لما اجى الإمبراطور بيدرو الثاني البرازيلي راح على الميدل إيست عمل مشوار بالميدل إيست راح على لبنان عمل زيارة وعزم كثير ناس ليجوا على البرازيل ومن هنيك بدأت الهجرة اللبنانية على البرازيل وهون كتار يعني بس ليكون عندك فكرة بيقولوا ما بين ثمانية ملايين لعشرة ملايين لبناني بالبرازيل .. وبلبنان في أربعة ملايين ونص يعني دبل والماما تعلمت في البرازيل جدي درزي كمان جدي جميل درزي وكان عنده هالوعي إنو نحن هون بالبرازيل ما في دروز حولينا كتير قليل .. في جمعية لبنانية موجودة هون كلنا لبنانية بس مش كلنا ذات الدين والإنسان لازم يكون عنده دين ولازم يحكي مع الله ولازم يكون عنده هالإيمان اللي بيكبر كل يوم يكون هالعلاقة تكبر كل يوم وشوكان في هون بالبرازيل أكتر شي لليوم حتى هي الدين المسيحي وقال أنتو لازم لكن تتعلموا بمدرسة مسيحية. تعلمت الماما بمدرسة بس في راهبات وهية علمتنا مثل ما علمتنا الحكي البرتغالي والحياة علمتنا الدين بقصص البايبل.

نيما بس بيّك ما كان برازيلي صح؟

سوزان نعم بيّي لبناني وراح على فينزويلا هجرة للعمل لما خلص العمل قال هلأ صار وقت الزواج! بس قبل ما روح ع لبنان ونقّي أم ولادي خليني أمرق على البرازيل عندي كتير ولاد عم  وولاد خال هنيك والماما وحدة منهن يعني وهيك بثلاثة أشهر انخطبوا واتزوجوا وإجت الماما على لبنان لأنو البابا كان بدو يجي على لبنان وهي بدأت من الصفر! يعني ما بتعرف تحكي عربي ما بتعرف شو لبنان كيف البلاد العربية بس اتربت ببيت فيه تقاليد عربية. البابا هو درزي.. والدروز تعلمت بعدين إنه "الموحدون" الكلمة صحيحة هية الموحدون، بس هنيك نحن منقول دروز نحن دروز وأنا لأنه خلقت من أب درزي أنا بكون درزية..  بس ما منعرف كتير عن الدين الدروز لأنه لتضلّك تتعلمي لتعرفي شو هو الدين الدرزي لازم تكوني شيخة أو شيخ يعني تكوني شخص ديني و لتتعمقي بالدين، وأنا كتير بحب الدين بحب هالعلاقة بين نحن الإنسان والله.

نيما على الرغم من إنه أم سوزان كانت  أقرب للدين المسيحي خلال حياتها بيّها كان درزي، وعلى الرغم من اختلاف التنشئة الدينية تزوج بيّ سوزان أمها بشروطها هي بالبرازيل!

سوزان البابا تزوج بكنيسة، لما كبرت يعني بالعشرينات وعرفت هالكلمة "الموحدون" عرفت إنه هو التوحيد يعني بيحترم وبيفهم غير دين يعني للبابا ولجدي يعني بيّه جدي بيجي من لبنان عالبرازيل يفوت عالكنيسة ويبارك الزواج بالكنيسة مع راهب يعني بتشوفي إنه الدروز هو موحِّد، هالكلمة مضبوطة أنا عرفتها بعدين قلت ايه والله مضبوط كان عندنا كريسمس تري وبعيل درزية بحطوا كريسمس تري نو بروبليم.

نيما بلبنان محل ما كبرت، ما كان من السهل دائماً قبول الاختلاف بالأديان! خبّرني باسل، وهو رجل لبناني درزي انتقل للوس أنجلوس من اثنى عشر سنة كيف نشأ وهو عم يتعلم الدين واختلافاته.

باسل لما بتربي بلبنان ويكون بلد فيه ثمانية عشر دين أو تسعة عشر دين وطائفة، دائماً هيدا الشي موجود حتى وأنتو صغار بالمدرسة يعني كانوا الأولاد صغار كيف مثلاً بيحلفوا كيف بيقولوا "وحياة الله!" أو "والقرآن" أو "العدرا" فكان هيدا الشي جزء من  الثقافة تبعنا حتى غير الدين، التعليم تبعه بعدين عندك أكيد كنا متل ما عم نحكي في شهر رمضان مثلاً بيجي شهر بكامله بيقطع بالسنة الدراسية وين في ولاد بتصوم رمضان، فكنا عصغر كتير نفهم المعنى تبعا انه في الدين وليه لازم يصوموا رمضان وليه في ناس ما بتصوم رمضان وليه في ناس عم تتغدى بالمدرسة وفي ناس ما عم تتغدى! فهذا الشي برأيي أنا أول شي اللي فتحنا عيوننا على الدين أنه ليه نحن هيك وليه نحن مش كلنا متل بعضنا، بعدين نحن ربينا ببيروت، بوجه البيت عنا في كنيسة كل نهار أحد كنا نشوف عجقة قدام الكنيسة كان ناس تنزل تصلي بالكنيسة ونشوف عالم فايتة ضاهرة عالم لابسة تياب مرتبين، وقت عيد الفصح بيكون جايين مع الشعنينة وكان يبرموا بالحي عنا وكنا نشوفهن وننبسط فيهن كتير، بس ما كنا ننزل على الكنيسة فهيدا كمان شي كنا نفهم أنه ليه نحن مثلاً عم نتفرج عليهن من البلكون مش إنه نحن تحت بالكنيسة، كنا ننزل على ليلة الكريسمس مثلاً لأنه بالليل بيعملوا قدّاس ننزل نحضره هيدا جزء من عاداتنا كان  شي كتير حلو بس كنا نعرف إنه نحن مش نفس الشي ونحن مش مجبورين ننزل كل أحد ونحن ما عنا شي عم نصلي له نحن ما لازم نصلّب ع وجهنا كل ما قطعنا قدام الكنيسة فهول أقدم الذكريات أنا برأيي أنه وين بلشنا نفهم أنه شو هو الدين وليه نحن مختلفين عن بعض.

نيما حسيتي أنه باقي العالم عم بيشككوا بدينك؟

سوزان هيدا سؤال كتير حلو رجعتيني ع طفولتي على لبنان، بلبنان عندنا هي كتيرعن الدين نسأل عن الدين.

نيما بعد ما اتزوجوا أهلها رجعوا على لبنان لتقدر أمها تتعلم اللغة العربية كرمال ولادهن يكونوا عايشين بظل ثقافتهم ولغتهم. سوزان كانت عايشة طفولتها بلبنان قبل ما تروح عالبرازيل لتأسس عائلتها الخاصة. خبرتني بأنه الناس حولهن صاروا مركزين أكتر على الدين بعد الحرب الأهلية اللبنانية.

سوزان بلّش كتير الدين يكون شغلة مهمة بالتعامل بين بعض يعني الجار كان يقول يعني لازم ننفصل يعني! لازم نحارب بعض! وهي أثّر كتير! وبالزواج والزواج لليوم بلبنان بيصير معنا زواج مدني ديني وصعوبة للزواج.. وأنا كنت أكبر لازم أفهم إنه أنا لازم أتزوج دروز لخلي بيّي وأمي اجتماعياً مبسوطين! أنه أكيد رح ينبسطوا إذا أنا مبسوطة  بس اجتماعيا ما يكون فيها هالضغط! ييي! بنتك اتزوجت أجنبي! ييي! بنتك اتزوجت.. عندنا ياها بالعالم العربي إجمالاً إذا اتزوجنا أجنبي ييييي حرام يا حرام!

نيما حسيت بهيدي الأسئلة من قبل وبعرف اديش صعوبة هيدا الموضوع ببعض الأحيان، فسألت باسل و سوزان إذا شعروا أو تلقوا نفس الأسئلة حول كونهم دروز أثناء إقامتهم بالخارج.

باسل ولا مرة حسيت أصلاً العالم ما بيعرفوا شو نحن يعني لحس حالي غلط .. العالم اللي بحطوك  بعلبة هنن اللبنانية الآخرين اللي عايشين هون، خاصةً اللبنانية اللي عايشين هون إلهن فوق الأربعين سنة هنن اللبنانية يلي تركوا وقت الحرب الأهلية، براسهن بعدو لبنان مقسّم بهالطريقة! وهنن اللبنانية اللي ما بينزلوا على لبنان وما بيعرفوا إنه نحن عايشين بطريقة كتير طبيعية وكلنا منحب بعضنا إلى حد ما، فأظن هيدا المحل الوحيد ياللي أنا ما بحب أقول إنه أنا درزي، لأنو اللبناني اللي عايش برا بيحب يعرف إنت من وين، ليحطك  بهي العلبة يعني بيسألك أنت شو إسمك؟ وبتقلو أنت إسمك من بيت مين عائلتك؟ إذا بعدها generic يعني إذا ما اسمي محمد أو طوني وما عم بيعرفوا، بيسألوك العيلة وعائلتي كمان generic وين إنه ما بيعرفوا! .. فبصير يقلوك من وين أنت؟! بتقلن أنا من بيروت بيقولولك من بيروت؟! أوعايش.. بقلن أنا عايش ببيروت.. "آه بس أنت من وين؟" إنه كل هيدي كرمال يعرفوا شو الدين تبعك، ليحطوك بهيدي العلبة! وهيدا الشي معروف بكل اللبنانية اللي عايشين برا.. فإذا في محل واحد وين أنا بيزعجني هيدا الشي هو مع اللبنانية لأنه الأميركان ما بحياتهن رح يسألوك أنو إنت شو دينك معقول ماكسيمم  يسألوك "أنت مسلم؟" لأنه بكونوا هنن they have prejudice على الإسلام بتقلهن لأ! انه Keep it moving!

سوزان بالبرازيل وبالعالم الأجنبي ما عندهم هالسؤال شو دينك؟ بلبنان كان عندنا هالضغط وأنا عم بكبر مع هالضغط وهون بالبرازيل بتكبري مع ضغط تاني مش ديني. الضغط هون يعني أنا عمري خمسة عشر كنت يعملوا أسئلة مثل هيك "هل عندك حبيب؟!" "عندك رفيق؟!"

نيما عنجد حتى لما كان عمرك خمسة عشر سنة؟!

سوزان إيه! أنا ما بعرفها ل هالشخص وهالشخص عم تسألني شي كتير خصوصي يعني ل إلنا للعالم العربي كتير Private كتير خصوصي لإلنا وهون لأ نورمال (عادي) يعني "ليه ماعندك؟" "عاجبك هيدا؟ يلا احكيه لتكونوا Friendship  بتكونوا صداقة.." يعني هيدا الضغط كان كبير علي كبير!

نيما مع مرور السنين أنشأت سوزان مدرسة للغات بالبرازيل، وهناك التقت بزوجها الحالي!

سوزان كان في صعوبة للزواج لأنه الماما ما كان بدها تبارك الزواج وقتها، بس ضلّيت عالصلاة صليت كتير وانجبرت إنه غيّر شوي حياتي لما يكون في ضغط ب هالاشياء، بس بعد شي خمس سنين تقريباً قبلت وأنا قبلت أنو ما رح كفي إذا الماما ما تباركني.. والحمد لله كل شيء تم بخير، بس كان فيه ضغط حتى بهذا الوقت التعارف وبس انخطبنا وتزوجنا بأخر السنة.

نيما بعد الزواج، اهتم زوج سوزان بثقافتها وخلفيتها وبلّش يقرأ كتيرعن الإسلام وأخبرها بيوم إنه اعتنق الإسلام!

سوزان قلتله اوكي بس ما تجبرني أنا أسلم! خلّيني أنا بديني وعم بحكي مع الله بطريقتي.

نيما استمرت الخلطة الدينية ببيتها على مر السنين، ولما أنجبت سوزان وزوجها ابنهم فاروق بدأوا بتربيته مع هيدا المزيج من الأديان.

سوزان اللي بعرفهم بعلمهم يعني أكتر مسيحية بس أنا كنت بعلمه كمان الفاتحة قبل ما زوجي يقول "علميه الفاتحة!.." ، عم نحكي عن الله الوقت كله بقول له: "في طريقين حبيبي في الحياة وقلبنا لازم نكون أحمر ما لازم تنقطهن برمادي ليكون كل شي رمادي! لأ! خلّي دايماً  تنقّي الطريق الصحيح لتروح لعند الله!"،  "شو في عند الله؟" وين شو في فوق ؟ وشو في تحت ؟ بقوله كل شي شو بيسألني أنا بقوله! يعني بقوله وين في نار وين في صريخ وين في شوب.. هيدا إذا بتنقّي الطريق المش منيحة ما بتخلي شخص منيح. وإذا بتعمل شي منيح قلبك رح يكون أحمر وكتير حنون وكتير هيك بتروح على السماء  في كل شي في ورود في كل شي بدك في كتير حب! أنا عم بعلّم إبني وبيحكي أربع سنين.. بلّش.. وهو بيكفّي.. فهمتي كيف؟ أنا ببدأ الجملة وهو بكفي الجملة وببدأ الجملة التانية وبكفّي .. هيدا الصلاة الوحيدة اللي كنت شوف البابا بيصلّي والدرزي بيصلّي بهالصلاة بصالة (بسورة) الفاتحة.. بسم الله الرحمن الرحيم.. وأنا بصلّي "بسم الله الرحمن.." بصلّي بالفاتحة! هي الموحدون .. هي اللي بقلك شو هو الدروز! ايه! وبتذكّر كتير كتير البابا متوفّى، بتذكّر دايماً بيخلص الأكل الغداء يقول "الحمدلله!" ، ودائما بقولها! وهيدا كمان اتعلمت منه بس الحلو "التصرُّف!" البابا تصرفاته كان يعني ولا مرة كنت شوفه عم يحكي عن حدن! حتى شخص سيء ماكان يقول إن هيدا سيء أو عمل شي سيء ما كان يسب! يعني عشنا يعني هيدا التصرفات بخليني شوف الدرزي بشكل كتير حلو وهيك بشوف عمّي بشوف ذات الشي تصرفات مثل ما قلتلك على الخط المظبوط يعني honest ما بعرف كيف نقول honest بالعربي (صادق) نسيت هلأ كل شي مظبوط وكتير عائلي وهيك بشوف غيرهن يعني في كل من كل الأنواع مثلاً من كل الأديان ، فيه منهم مش مظبوط بيمشي مظبوط بس إجمالاً أنا بشوف الدروز كتير كتير هيك مع بعض هنن قلال بس مجتمعين دايماً مع بعض والتصرفات كتير حلو!

نيما اتصلنا بالعديد من الدروز من الجيلين الثاني والثالث بالشتات بفترة التحضير لهذه الحلقة، حكينا مع العديد من الأشخاص ، بس .. بس جزء صغير منهم كان بيقدر يتحدث اللغة العربية بشكل جيّد بما يكفي لحتى يعمل مقابلة! سألت سوزان عن هذا الشي وإذا كانت عم تلاقي صعوبة بالتواصل مع مجتمعها.

سوزان هيدي الطبيعة للكل هون من أصل لبناني ما حدن بعد بيحكي عربي! يعني أنا بضل شوي حزينة بدي أحكي مع حدن مشان هيك شوي مكسّرعربيتي! ما عندنا حدن لنحكي! يعني منعد بالإيد .. بالاصبع! إذا في اتنين ثلاثة أشخاص بعدهن بيحكوا عربي كلهن من أصل بياكلوا حمص بطحينة كبة نية وهيك بس ما بيحكوا ولا شي! يعني التراث بقي بالأكل وأمرار بالاسم وتشوفي إنه عنده إسم عربي أو عيلة عربية بس ما بيعرف يحكي عربي، وكل عائلة ما بتعلّم إبنها عربي وأنا هي مهمتي بالحياة! علّم إبني فاروق يحكي عربي لأنه بعرف إنه صعب عليّ لأنه لازم غيّر شوي أعمل Switch بعقلي  ل ما أحكي برتغالي! لأنه أنا من صغيرة بفكّر بالبرتغالي، وبلّش بالعربي.

نيما بالنسبة ل إلها، اللغات وسيلة للتواصل مع التاريخ، وهي أيضاً وسيلة للتواصل مع الدين.. ولأنها جاية من خلفية فيها أديان متعددة، كان لازم على سوزان إنه تتعلّم كيف تتمسّك بإيمانها وتلتزم بالله بطريقتها الخاصة! سألتها إذا كان عندها أفكار نهائية حول كونها درزية.

سوزان إيه إذا عم نحكي شوي عن دين الدروز، أنا باخد بهالفكرة.. إنه هي فلسفة! بس أنا بلاقي إنه تصرفات بيّي هو الدرزي بحياتي "مثل" هو مثل لألي ومثل التصرُّف مثل ما قلتي عن الدرس اللي أمك بتقوله.. المهم تصرفاتك مع غيرك! هيدا أهم شي مش كم مرة بتصلّي مش أي لغة بتصلّي أو كم مرة بتروحي على الكنيسة و.. هو تصرفاتك.. هالإيمان اللي عندك بالله كيف عم تتصرفي فيه؟ وهيك بيعمل ال Resume عن الشخص.. التعامل.. وهذا تعلّمته مع بيّي الدرزي.. تعامُل ومثل أعلى بالتعامُل!

نيما كنتوا عم تسمعوا بودكاست مجهول على أخبار الآن ومن بحث وإعداد حكاياتنا هذه كانت الحلقة الأخيرة من الموسم الثالث لبودكاست مجهول نتمنى أن يكون حاز على إعجابكم! أنا نيما صالحة راوية هذه السلسلة.. إعداد حلقة اليوم من زينة دويدار، التصميم الصوتي من منذر الهاشم والتحرير من الشيباني وزينة دويدار الهوية البصرية من سرد ديجيتال والإشراف العام من محمد علي.. شكراً لسوزان وباسل ضيوف هذه الحلقة وشكراً أيضا لزينة زيتون وملك وهدان، تابعونا عبر حسابات أخبار الآن بودكاست على مواقع التواصل الاجتماعي akhbarpod@ إذا استمتعتوا بهذا الحلقة شاركوها مع أصحابكن واتركوا تقييم على أي منصة بتستخدموها لتسمعوا عليها بودكاست.. شكراً!