منال تغير حياتها بالكعك والمعمول

نص الحلقة :

هبة جوهر كلمة موقف أو حدث صغير ممكن يكونوا السبب بتغيير حياتنا والبدء من جديد لكن البداية من جديد ما بتكون بهذه السهولة البدايات مثل الولادة بتيجي بعد آلام المخاض لكنها بكل تأكيد بتكتبلنا عمر جديد وطريق جديدة مثل ما صار مع منال العمايرة لما تركت شغلها مجبرة لتبدأ مشوار جديد وتساعد صبايا وسيدات رح تحكيلنا قصتها القصيرة 

منال العمايرة أهلا وسهلا حبيبتي معاكي منال العمايرة أم زيد متزوجة عندي ولدين وبنتين شباب يعني كلهم عندي ولد وبنت متزوجين وبنت كملت ماجستير وعندي ابني السنة هاي توجيهي إن شاء الله طبعاً عندي كمان أحفاد عندي حفيدين أولاد لبنتي وحفيدة لابني أنا كنت موظفة وهلق عندي مشغلين بشتغل بواحد منهم كعك ومعمول ومطبخ إنتاج يعني تقريباً والتاني مشغل خياطة وتطريز يعني شغلي فيهم إن شاء الله طبعاً أنا كنت موظفة وتركت الشغل شغلي لسبب معين وقعدت في البيت فكانت قعدة البيت يعني كثير سيئة بالنسبة لي فبنتي دخلت سنة أولى جامعة هذا الحكي كان بـ 2012 فطلبت مني أني أعمل قالتلي ماما أنت شاطرة بالكعك والمعمول فشو رأيك تعملي وو وأعمل لك يعني دعاية وهيك ففي البداية رفضت الفكرة كلها لأنه يعني ما ما بعرف ما رفضت الفكرة فزعلت مني فقلت خليني أمشي مثل ما بدها أشوف شو رأيها يعني فعملت أول شي كميه بسيطة أخذتهم معها ثاني يوم عالجامعة وباعتهم رجعت علي مبسوطة بتقلي أنا هي شفتي أنه يعني الشغل حلو وشغلك منيح ومقبول والناس في عليه طلب ثاني يوم عملتلها كمان مرة ثاني ردت أخدتهم ورجعت مبسوطة اكثر فقالتلي بدي أعملك صفحة على الفيس ونعمل دعاية وهيك فعملنا صفحة والحمد لله بلش الشغل واشتهر وصاروا إلنا زباين والحمد لله رب العالمين هذا الكعك والمعمول بالنسبة التطريز فزوجي حكالي أنه لازم تطلعي من البيت غيري جو روحي تعلمي خياطة فرحت أخذت دورة خياطة في التدريب المهني اللي هي سنة و8 شهور مدتها وهي اسمها تطريز على الطارة عالماكينة يعني فبلشت أشتغل تعلمت واشتغلت فتحت مشغل صغير على قدي والحمد لله كمان صار إلي زبائن وهلق بشتغل بالجهتين بالكعك والمعمول وبالتطريز ومن خلال شغلي هاد طبعاً شغلت بنات معي بالكعك والمعمول كلهم أغلبهم طالبات جامعة بيشتغلوا عندنا بالمعمول وبيدفعوا أقساط جامعتهم من شغلهم وفي عنا كمان حالات إنسانية يعني في عندي وحدة وضعها كتير سيء بتشتغل هي وبنتها كمان الحمد لله وضعهم تحسن في عندي وحدة ثانية يعني تاركة زوجها كمان يعني منفصلة عنه وكمان بتشتغل هؤلاء إلهم رواتب شهرية والحمد لله رب العالمين إحنا تحسن وضعنا وهم تحسن وضعهم وهينا مبسوطين كثير بشغلنا 

هبة جوهر بأدوات بسيطة وبدعم من زوجها وبنتها قدرت منال أنه تتوسع بشغلها وتستمر وتمشي خطوة ورا التانية بكل قوة منال مش بس سيدة نجحت بمشروعها هي سيدة قدرت تواجه بعدها عن المدينة وحياتها في القرية لتنجح وتنجح مشروعها ولصار الكعك والمعمول اللي بتصنعه موجود بواحد من أكبر مولات التسوق في الأردن والعالم 

منال العمايرة طبعاً بعد ما عملت الصفحة الكعك والمعمول وبلش شغلنا ينتشر والكل يعرف عنه صرت أشارك بمعارض أشارك بفنادق في البازارات جمعيات خيرية جمعيات تحفيظ قرآن بيعملوا يعني للسيدات تكريم وهيك ويدعونا إحنا كمان نشارك بشغلنا فرجعنا كمان عملنا صفحة ثانية للمطرزات بعد ما كملت الدورة وبلشت أشتغل وفتحت مشغل صغير بلشنا نشهر شغلنا على الفيس ومواقع التواصل الاجتماعي وصار السيدات يشوفوا هذا الشغل ويطلبون منه وبلش يصيرلي زبائن من جديد كمان مرة ثاني للمشغل فيعني الصفحتين كانوا اللي على مواقع التواصل الاجتماعي كانوا أكبر يعني داعم بصراحة والداعم الأساسي بالأول بيرجع الفضل لربنا بعديها لبنتي ولزوجي لأنه هم اللي دعموني هم الذين كانوا واقفين بظهري أنه لازم لازم تصيري شي كنتي شي وبدك ترجعي أحسن من أول تصيري فالحمد لله رب العالمين يعني بشكرهم كل الشكر لألهم بنتي وزوجي وأولادي كلهم ما قصروا معي الحمد الله طبعاً أكيد واجهت كثير تحديات وصعوبات بالبداية لازلنا منواجه يعني أي مشروع بدك ياه ينجح لازم يكون فيه تحديات وفي صعوبات أكيد التحديات بالنسبة لمشغل المعمول أول شي كان التعبئة والتغليف أول شي إحنا منطقة قروية بدك تروحي على عمان على تطلعي على على المصانع تروحي تشتري هاي الأغراض كان المشوار علي مش سهل يعني بعيد علي ولازم أنا آخذ كميات كبيرة إذا بدي أخذ من المصنع بسعر منيح بينما المحلات العادية بدي أخده هاي كان السعر غالي علينا لأنه محل بده يبيعك وأنت بدك يعني هذا ما بتوفي معانا شغلة ثانية شغلة التسويق صرت بدي أفوت على السوق لما بدي فوت عالسوق بدي يكون شغلي لازم يكون مرخص تغلبت بالترخيص تغلبت بالفحوصات الغذاء والدواء المواصفات والمقاييس هاي كلها الأشياء كانت يعني كانت بالنسبة إلي صعوبات تغلبت فيها صرنا نعمل بعدين دعاية تمويل نمول الإعلانات مشان نكبر نوصل لأكبر عدد ومع ذلك الحمد لله اللي بده مشروعه ينجح لازم يواجه كل الصعوبة وكل تحدي لحتى يوصل وصلت الحمد لله وفتت على محلات كبيرة ومن ضمن المحلات اللي أنا فتت عليها اللي هي كارفور كارفور عالمي يعتبر والحمد لله بوزع لكارفور لكل فروع المملكة يعني الحمد لله الحمد لله بعتبر حالي من من يمكن من أوائل السيدات الناجحات بهيك شي مش سهل تفوتي عكارفور يعني والحمد لله أخذت كل الشهادات المطلوبة وشغلنا كان كثير ممتع وحلو والحمد لله وفتنا على كارفور ولازلنا هينا من السنة الثالثة مع كارفور إن شاء الله إن شاء الله منضل على طول 

هبة جوهر لما منال بدأت مشروعها كان وضعها المادي مش بزيادة المشروع بدأ بـ6$ بس هدول كانوا قادرين أن يخلوها تدرس بناتها في الجامعة ومشروع الكعك والمعمول فاد كثير من الصبايا والسيدات اللي بتشتغل معهم كمان منال رجعت للماضي لتتذكر كيف أول مرة قدرت بنتها تبيع الكعك والمعمول وهي ما معها حق خبز وأول مرة شاركت في بازارات في أكبر مولات العاصمة الأردنية عمان منال بتتذكر كيف هالمشروع كان سبب بإعادة ثقتها بنفسها وكيف هو السبب إنه خلى بناتها وأولادها أقرب لإلها وإنه بناتها هم السند لهلق حتى هذه اللحظة 

منال العمايرة طبعاً الحمد لله بعد ما فتنا على السوق واشتغلنا بعد صرنا نبعث للمحلات وفتنا على كارفور الحمد لله طبعاً هذا الشي انعكس علينا كان الوضع المادي كثير سيء أنا لما بلشت مشروعي بلشت بـ4 دنانير يعني جبت مواد بـ4 دنانير وبلشت فيهم الحمد لله وصل يعني هلق وصلت لمرحلة أنه درست أولادي بناتي الثنتين بنتي الكبيرة خلصت إنجليزي لغة إنجليزية وكملت وتزوجت والحمد لله وعندها أطفال اثنين حلوين بجننوا وبنتي التانية كملت كمان حقوق من الجامعة وردت كملت ماجستير وإن شاء الله هيها بدها تسجل للدكتوراة أو معهد القضاء المهم أنه تكمل دراساتها العليا إن شاء الله طبعاً والحمدلله اشتريتلهم كلهم سيارات لبناتي ولأولادي ظل عندي بس الصغير اللي هو بالمدرسة ابني كمان زوجته والوضع كثير الحمد لله تحسن وحتى البنات اللي بيشتغلوا عندي كمان وضعهم كثير تحسن بطلوا يمدوا أيديهم لأهاليهم أنه بدنا مصروف صار هم لحالهم يشتغلوا ويصرفوا على حالهم وبناتي يعني كل العيلة بتشتغل معي أنا ما عندي وظائف حكومية أنا بتمنى أنه أنا ما اشتغلت ولا درست ولو من البداية يا ريتني أنا شغلي طلعت من شغلي على مشكلة يا ريت من البداية ما توظفت ولا صار معي أي مشكلة واشتغلت هذا الشغل من البداية يعني بشتغل لحالي أحسن من أي وظيفة حكومية أو شركة أو يعني الواحد يكون ملك حر نفسه ملك نفسه ما في حدا يأمرني حدا أو يتآمر علي أو خلص الحمد لله وبتمنى لكل سيدة منتجة أنها تنجح مثلما أنا نجحت طبعاً يعني بالبداية أول ما حكتلي بنتي عن الشغل أنه ماما اشتغلي وأنا رفضت كنت أتمسخر عبنتي يعني أنه شو شو أشتغل شو أعمل معمول فلما زعلت مني أنا منشان أجبر خاطر بنتي أنا اشتغلت ما كان بهدفي شي بس لما أجت البنت ولا هي بايعة المعمول ووضعنا سيء ما معنا حتى حق خبز ولما أجت هي وجايبيتلي حق المعمول انبسطت بيني وبين نفسي بس ما ظهرت لبنتي مشان أنه لو فشلت بعديها يعني ما أبين أنه أنا غلطانه إنه أنا صح وأنت غلط بس لأ طلعت هي الصح وأنا الغلط لما عملت مرة ثانية وردت رجعت جابتلي المصاري كنت كتير مبسوطة هي كانت عمها يعطيها المصروف للجامعة كل أسبوع يعطيها عشرة دنانير هسا أنا استغنيت عن الكل وصرت أنا أعطيها المصروف بطلت أنا أنا يعني أستنى حدا يعطي بنتي مشان تروح عالجامعة لأنه الوضع سيء جداً ما بيسمحلي حتى أسجلها جامعة بعديها صرنا لما الزباين يأخذوا مني كميات مثلاً حدا عنده مناسبة ييجي يأخذ كمية ويعطيني مبلغ كثير أنبسط فيه عنجد كان يعني لما الناس يقولولي معمولك زاكي عندي أحسن من المصاري بصراحة كثير أكون مبسوطة أنه بيمدحوا شغلي في مواقف كتير حلوة مرة أول مرة شاركت بمعرض كانت جمعية دعتني صديقة إلي بتقولي في عنا معرض شو رأيك تشاركي معنا رحت وأنا كتير خجلانة مستحية أني أنا بنت ناس وهيك أنا أروح أقعد على طاولة وأبيع بس لما رحت وشفت أنه اللي موجودين الشخصيات الموجودة وعندها طاولات هذا هذا الشي شجعني وقواني أكتر إنه والله طب هدول شخصيات معروفة وهيهم بيبيعوا على الطاولة ليش أنا مستحية أنا بعت كل الأشياء اللي معي وروحت وهم لسا موجودين بعدهم ببيعوا بشغلات بسيطة جداً إكسسوارات أنا بالنسبة لهم حسيت حالي أني ملكة يعني يعني كنت شي كثير ويعني بعديها هذا الشي شجعني أني أصير أشارك بمعارض بالبداية أنا كنت رافضة الفكرة نهائياً بعدين صرت أشارك وصاروا هم يطلبوني فنادق تطلب أنه بدنا أم زيد الزعبي تكون موجودة كعك أم زيد الزعبي لازم يكون موجود عنا معارض كثير معارض الزيتون معارض بمكة مول بجاليريا مول هذه المولات كلها يطلبوني أنه لازم أم زيد تكون موجودة والحمد لله يعني هذا كان كان كثير يحفزني أنه هم يطلبوني بالاسم لأنه لما تكوني شي كثير وتوقعي بدك ترجعي توقفي عرجليكي من الجديد والناس تصير تطلبك بتحسي بقيمة نفسك بصراحة يعني أنا كنت بوظيفتي شي وخسرت وظيفتي أنا شغلي هاد رجعلي ثقتي بحالي رجعلي ثقتي بنفسي رجع لأولادي حتى ضحك ما كنا نضحك الحمد لله وهينا بحس حالي من أسعد الناس الحمد لله رب العالمين الله يتمم علينا ونضلنا مثل ما إحنا يارب هيك يا الله وبناتي كثير مبسوطين بنتي الكبيرة كثير مبسوطة الحمد لله بنتي الثانية اللي كملت كمان بنتي كملت ماجستير بس مستعدة تصحى معي من الثلاثة الفجر توقف معي عالعجانة نشتغل أنا وياها نعجن السميد للبنات عشان يشتغلوا أو الطحين أو اللي هو يعني نشيطة جداً ما بيهمها أنه والله أنا درست وكملت لأ هي بتقولي رح أظل معاك  لآخر يوم بحياتي لو مش بصير دكتورة لو بصير شو ما صرت رح أظل أشتغل معاك لو لآخر يوم بحياتي 

هبة جوهر منال كل أحلامها متعلقة في أولادها وبتأمين حياة كريمة وحلوة لهم نفس حلاوة الكعك والمعمول اللي بتصنعه

منال العمايرة أحلامي أني أمن أولادي أمن لهم مستقبلهم بناتي أمنت لهم مستقبلهم يعني ابني الكبير المتزوج صح بيشتغل معي بس حابة أمنله مشروع له حابة أمنله أنه يكون حر نفسه مش أنه والله إني أنا بشتغل مثلاً مع والدتي صح شغل حلو والحمد لله مش ناقصه شي بس لأ لما يكون له شي خاص فيه هو بيختلف الوضع هو مش من هوايته الدراسة أنه يدرس أنا بدرس بمرته هلق ويعني بتكمل جامعة كمان كمان أنا بدرسها ومأمنتلهم بيتهم موجود الحمد لله مأمنة بيت لهم وعنده سيارة بس بدي أمنله مشروع يظل له دخل وما يركن على حدا يعطيه لأ هو يشتغل لحاله بإيده ويطلع مصروفه لحاله ما بدي أنه يظل مركن علي على طول إحنا لأنه ما رح نضل عايشين على طول لهم لازم يكون في له مشروع خاص له يدر عليه دخل ويقدر يعيش منه حياة ما بدنا رفاهية كثير بدنا حياة نكون مستورين والحمد لله رب العالمين وحلمي الثاني لابني اللي أصغر هيو اللي عليه توجيهي أنه يكمل دراسته ويؤمّن مستقبله أبنيله بيت لسا ما يعني لساته توجيهي لسا قدامنا مشوارنا طويل معه ويشتغل وإن شاء الله يعني هذا ابني ناوية أدرسه تسويق لأنه هيك شغلنا بده ويستلموا شغلنا من بعدينا إن شاء الله وهاي يعني الحمد لله نكون إحنا مبسوطين هي أحلامنا نكون مرتاحين نفسياً أهم من كل شي وبس غير هيك الحمد لله رب العالمين هذه أحلامي أحلامي أولادي أكثر من هيك مابدي أمن لأولادي وبس وسلامتكم