نحن لا نبني عضلاتنا بالتمرين بل نهدمها

نص الحلقة :

مها مين التحدي عنده أصعب؟ يلي بده ينحف أم يلي بده يزيد وزنه؟ 

محمد أي شي الواحد بده يعمله بده يعرف ليش عم يعمله أنا كان شعري طويل وcurly وهيك وقصير ونحيف فما حدا بيأخذك بـserious كله بيضحك معك ما في seriousness 

مها محمد قطان شاب سوري، مقيم في الإمارات منذ الطفولة بيشتغل بمجال الإعلام وهو زميلنا، بقسم البرامج في تلفزيون الآن 

محمد الناس الصحيين هم الناس اللي بيلعبوا كرة قدام، بيلعبوا ركض، بيلعبوا رياضة معينة بس الناس اللي ما بيلعبوا شي، ما بيعملوا جسم هدول ناس مو صحيين 

مها بالوقت اللي السمنة والأشخاص اللي بيعانوا منها، مسيطرين بتجاربهم في إنقاص الوزن على معظم منافذ اللياقة البدنية من عيادات تغذية لنوادي رياضية لمحتوى على الـSocial Media وغيرها، عم بيواجه البعض الآخر مشكلة النحافة 

محمد هي بناء كمال أجسام بس هي فعلياً مو بناء كمال أجسام، هي هدم الأجسام الواحد بروح عالـgym ما بيبي جسم بيهدم الجسم 

مها بشاركنا محمد تجربته في حل مشكلة النحافة، اللي عانى منها لسنوات وبيخبرنا أبرز التحديات يلي واجهته كيف ومتى وليش بدأ؟ شو هوي العائق الصحي يلي خلى التحدي مضاعف؟ وكيف قدر يتغلب عليه بالنهاية؟ محمد أنا من فترة كنت عم أبحث عن أشخاص عانوا من الوزن الزائد والسمنة وقرروا بجرأة يغيروا حياتهم عملنا سلسلة عن الموضوع كنت سائلتك أنا إذا بتقدر توصلني مع أشخاص عندهم هي التجربة قلتلي وقتها هيك بتعليق عابر، طب ليش ما بتعملي بالعكس؟ فأنا صفنت إنه شو بالعكس؟ إنه قلتلي وقتها أشخاص بعانوا من النحافة وقدروا يبنوا عضل ويغيروا من طبيعة أجسامهم من خلال الرياضة والتغذية 

محمد صحيح لإنه الفكرة العامة للناس بالرياضة هي إنه الناس الناس بدها تنحف، بتروح تسجل بالنادي، فما الناس عندها هذا الـcommon sense أنه حتى النحاف كتير عم بعانوا ليسمنوا، فما حدا عنده هذا المبدأ هذا فحبيت احكليك عليه لإنه أنا واحد منهم يعني 

مها أسباب عديدة ومختلفة بتمنع بعض الأشخاص من اكتساب الوزن ونمو العضلات ممكن تكون أسباب وراثية أو صحية، متل فرط نشاط الغدة الدرقية أو مشاكل في الجهاز الهضمي أو اضطرابات في الهورمونات ومرات أسباب نفسية بحالة محمد كان السبب سرعة الأيض أو الحرق العالية 

محمد يعني مثلاً أنا هي المشكلة كنت عم عاني منها أنا لدرجة نحافتي اللي كنت 51 كيلو بس كنت عم بختفي يعني حرفياً إنه أنا مثلاً إذا أكلت وجبة هلق أنا ممكن بعد ساعة بدي وجبة تانية، عرفتي؟ فولا كأني أكلت شي، فهي هي مشكلة بواجهوها بعكس الناس اللي بيسمنوا بسرعة، أنه شو ما بياكلوا بيسمنوا بيعطي جسمهم الناس اللي بيحرق جسمهم بسرعة عندهم مشكلة، إنه حتى لما يتمرنوا بدهم ياكلوا زيادة يعني مثلاً هوي احتياجه الطبيعي غداء وعشاء مثلاً بدون ما يتمرن إذا بده يتمرن بده 5 6 وجبات باليوم، عرفتي؟ فالأكل جداً يعني في شغلة بقولوها بالـgym يعني الناس اللي بيلعبوا رياضة اللي هي failure إنه الواحد يوصل للفشل العضلي، أما اللي بدهم يسمنوا وياكلوا كتير بيقولوا failure بالأكل كمان فبدك تفشلي كمان توصل الفشل بالأكل كمان؟ فـthis is the hard part 

مها النحافة مشكلة صحية لا تقل خطورة عن السمنة إذا بدنا نحكي عن سلبيات المرضين يعني، إذا بدنا نعتبرهم مرضين وإلهم سلبيات فهي لا تقل خطورة عن السمنة لإنه النحافة ممكن تعطي إشعارات للجسم أنه عم بعاني من كذا وكذا وكذا، من عدة أمراض تاني فقر دم ممكن فإنتَ ذكرت نوع من أسباب النحافة، يلي هو الحرق العالي في أنواع تانية لأسباب النحافة؟ 

محمد ممكن يكون عندهم مرض أو عم بكون ما عندهم شيء معين مارقين فيه بحياتهم، في كتير ضغوطات نفسية هذا يعتبر بالنسبة إلي مرض أنا، مو كل الناس تعتبر المرض النفسي مرض، بس هو فعلاً بأثر على يعني في ناس بتنحف لإنه ما بتاكل، بس هي لأنه عم تمر بمرض نفسي وفي ناس نمط حياتهم ما بيسمح لهم إنه يتغذوا بشكل صح فبكونوا بيعانوا من قصة النحف 

مها من عمر صغير بسبب بنية جسمه النحيفة بدأ محمد تفكيره تجاه التغيير ووعيه بأهمية الإهتمام بالصحة واللياقة البدنية لكن ليش والده منعوا في البدايات من الروحة عالـgym؟ 

محمد كان بدي أوصل لمرحلة بجسمي، لإنه كان لازم شوف الـversion تبعي اللي هو the best عرفتي؟، وأنا بحب أي حدا عم بيسمع البودكاست إنه يسأل حاله هذا السؤال أنتَ ما بتحب تشوف لما تطلع بالمراي تشوف شخص، يعني واصل أنتَ لشخص جداً قوي؟ يعني بمشيتك بلبسك وكل شي عرفتي؟ هي كلها بتأثر بحياته للشخص فأنا كنت دائماً بدي شوف صورة لإلي كتير كتير حلوة عرفتي؟ فبس كان كنت كتير مهتم بقصة الكرة فما كان عندي روح عالـgym وأبي كان بطل كمال أجسام سابقاً واجته إصابات لترك الرياضة هي، فما يخلينا نقرب عالـgym نهائياً فكان إذا بدكم تعملوا رياضة عملوا رياضة صحيّة كرة ركض سلة بس أوعى حدا يجي لعندي يقلي بدي ألعب حديد مع إنه هوي كان بطل سابق تخيلي؟ فتأخرنا بالقصة شوي لبين ما صرت 22 23 سنة صرت بدي خلص فوت عالـgym لأنه كنت كمان صرت مو مبين شكلي كعمري عرفتي؟ يعني مثلاً عمري 22 الناس تقلي آه ما شاء الله عليك مبين 15 16، الناس تفكرها compliment بس بالنسبة لإلي إنه مو ضابطة عرفتي كيف؟ فقلت خلص لازم سجل gym ودير بالي على حالي بس إجت وقتها المرض اللي ما بدنا نذكره خرب عالدني كلها السنة هي سنة الماسكات أيوا سنة الكورونا فما قدرنا لبعد الكورونا الحمد لله رب العالمين إلتزمت يعني 

مها طيب أنتَ كان محفزك خلينا نقول يعني بس إنه هيئتك ما كنت عم تعاني من أعراض سببها النحافة؟ 

محمد مبلا كنت بلشت بلشت أمرض، وبلشت يعني صرت الواحد بشوف عظمه عرفتي؟ مثلاً العمود الفقري والقصص هي يعني صرت كتير كتير يعني صرت بني آدم بشع يعني، ما عاد حبيت حالي عرفتي؟ وأثر على نفسيتي هذا الشي طبعاً يعني كمان كشي لما ألبس شي مثلاً إنه دائماً رجلي نحاف، ظهري هي قصص النحيف كتير بيعاني منها عرفتي؟ فهذا بالنسبة لإلي كنت كانت فترة جداً صعبة وyes فاضطريت إني لازم غيرها عرفتي؟ 

مها طيب في موقف معين هيك بحد ذاته نفسه، هي أفكار يعني متجمعة من الطفولة للمراهقة دفعت بهذا الاتجاه لكن في موقف معين، بحد ذاته خلاك إنه هيك اليوم فتحت الـapplication وسجلت أو رحت على النادي وسجلت وبدأت؟ 

محمد ما في موقف معين بس إجتني هيك moment أنه خلص، هلق لإنه كانت كنا لما خلصنا سنة 2022 فتنا على سنة 2023 دائماً بحب ضيف قصص جديدة على سنة تبعي فقلت أنا هذه السنة خلص يعني لو شو ما صار أنا ملتزم بالتمرين تبعي ملتزم بأكلي ملتزم بنومي، حبعد عن كل شي أنا بعملها هلق أنا كنت gaming 24 ساعة كنت شخص ما بطلع من البيت كتير فما كان في عندي أي شي active بحياتي فقلت لازم أعمل شي غير خلص بدي بعد عن كل شي فلما بلشت 2023 بشهر 2 رحت فوراً سجلت بـgym وبلشت بس لما بلشت، عرفت أنه أنا بدي آخذ هي الخطوة بدي ألتزم فيها وما يعني ما أتراجع نهائيا أنا من شهر 2 2023 ليوم تسجيل بودكاست هاد معك أنا ما وقفت نهائياً، غير هو يوم الراحة اللي هو rest day تبع الـgym لحتى شوف النتيجة الحمد لله اللي وصلتلها يعني وأنا لما يجي حدا يحكيلي كيف صرت هيك؟ أو كيف كيف أنا كتير بنبسط I'm feel proud عرفتي؟ لأنه عنجد الموضوع، مو سهل أبداً وأي حدا بفوت عالـgym إن كان سمين ونحف ولا إن كان سمين وصار معضّل موضوع جداً صعب الأكل الإلتزام أيام الراحة شدة التمارين فهذا كله بيلعب دور وyes الحمد لله 

مها جميل جداً طب شو المحفز يلي بخليك بهذا الإلتزام؟ لأنه كلياتنا كبشر نفسيتنا بتتقلب يعني مرات من مر بأيام هيك مودنا مش تمام منمر بظروف صعبة، أحياناً يعني ما عنا هذا الإستعداد لنمارس نفس الروتين يومياً يومياً نحتاج أحياناً ننعزل أنتَ شو اللي كان عندك هيك محرك يخليك بهذا الإلتزام؟ 

محمد أتذكر ليش بلشت أنا هذا الشي الوحيد اللي بحب يعني أي حدا بوصل لمرحلة أنه I want to skip إنه بوصل في أيام، عن جد بكون طالع من الشغل مثلاً جداً منكد أو مالي نفسية تعبان أكلي ما كان تمام كان في كتير اجتماعات ما قدرت آكل وجباتي اللي لازم أكلها بروح ما بدي روح عالـgym، بس دائماً باخد نفس الطريق تبع الـgym، قصداً مشان to rethink إنه لازم أتمرن بعدين بحاول دائماً ذكر حالي، أنا ليش بلشت فالواحد لما يرجع يتذكر هو ليش بلش فوراً رح يجيه الـmotivation يروح مرة تانية ما يوقف فالواحد دائماً لا ينسى يعني قد ما وصل جسمه أنتَ لا تنسى ليش بلشت القصة كلها أصلاً 

مها متل ما التنمر منتشر على أصحاب الوزن الزائد للأسف الأشخاص النحيفين ما بيسلموا منه كمان 

محمد yes كان في تنمر أيام المدرسة أكيد كان في no one take you serious when you like this، يعني أنا كان شعري طويل وcurly وهيك وقصير ونحيف فما حد بياخدك بـserious كله بيضحك معك ما في seriousness وخاصة لما تكوني بمجلس مثلاً وشخص هيك ما تعطيه قصة فأنا اكتشفت إنه الشخص اللي بيكون مهتم بحاله وإن كان يعني جسمه حلو وبني آدم نضيف وأكله نضيف، لما يكون موجود بمجلس بتلاقيه شخص متزن وكله عامله حساب وكله بحكي معه بطريقة مرتبة عرفتي؟ فهذا الشي اللي أنا كمان أخد بالي وحسيت بالفرق فيه بحياتي، يعني بس تحسّن جسمك كيف الناس صار تتصرف معي وتتعامل معي، وصاروا ياخدوا مني نصائح فبتفرق لما تكوني خاصةً كشغل، الواحد مثلاً بروح يعمل interview مانه مهتم بحاله الـfirst impression تبع الـHR إنه هذا شخص مانه مسؤول مثلاً لما بفوت واحد تشوفيه أنا لابسلك هاللبس نظيف ودائماً الناس تعون الـgym يكونوا وجههم من فيتامينات وكل شي، بتلاقيه عم يلمع وجهه عرفتي؟ فبتلاقه الواحد جاي بالـgym هذا مسؤول، فالـfirst impression قبل ما تحكي مع الـHR بتعرف إنه هذا الشخص عنده مسؤولية it's good thing 

مها طيب هلق إذا بدنا نحكي عن العملية العكسية اللي بتصير، أنه من النحافة إلى جسم صحي وعضلاته يعني مكتملة ومبنية 

محمد مو صحية الفكرة الفكرة الناس اللي بتاخدها عن الناس اللي بروحوا عالـgym إنه هنن ناس صحيين يعني، لما تشوفي واحد مثلاً معضّل ماشي بتقولي هذا كتير صحي بس هوي نحنا ماننا صحيين أبداً نحنا عكس الصحيين نحنا كليتنا مو تمام أكلنا مو تمام مفاصلنا مو تمام فالناس بتفكرنا بس نحنا ماننا صحيين الناس الصحيين هم الناس اللي بيلعبوا Calisthenic أو بيلعبوا كرة قدام بيلعبوا ركض بيلعبوا رياضة معينة بس الناس اللي بيلعبوا gym وبيعملوا جسم هدول ناس مو صحيين، نحنا ناس مو صحيين basically yes نحنا مناخد minimum من 15 لـ20 حبة باليوم من فيتامينات لشغلات أنتِ محتاجتيها لينبنى جسمك، ويتعافى بالليل محتاج كتير قصص تاخديها كحبوب OK؟ هلق كأكل في أنتِ أنا مثلاً قاعد على وجبة واحدة من شهر 2 لهلق ما باكل أي شي you know فكمان هي شغلة تانية مفاصلنا الأوزان اللي منحملها هذا كله الركب الأكتاف ها كله أوجاع بعدين بعد 10 سنين بتبين فناس بتقول هذا ما شاء الله عليه هي عم قلك الفكرة العامة الناس اللي بتفكر إنه هذا صحي بس هاد مش صحي أبداً

مها عم تحكي عن اللي نحاف وبدهم يبنوا عضل ولا لأ؟ كل اللي بفوتوا سواء كانوا بدناء أو نحفاء؟ 

محمد لأ البني آدم اللي بلش بده يكسر النادي عرفتي؟ هذا الشخص هلق أنا في ناس بفوتوا عالـgym أخي بتلاقيه شخص عادي، هذا ما حقلك إنه مو صحي، هذا بقلك صح بس الشخص اللي خلص اللي هو منكسر الـgym إنه هذا جد بني آدم واو عرفتي؟ هذا نحنا مو صحيين أنا بحكيلك ياها ولسا الناس اللي بيلعبوا بطولات وهدول هرمونات وقصص مانهم صحيين we are not healthy 

مها طيب خلينا نحكي عن تجربتك كمو شخص أنت فايت تكسر نادي أنتَ كنت رايح تكسر نادي؟ 

محمد هلق بدي كسر النادي أنا ما كان عندي هذه العقلية OK؟ أنا لقلك كيف كل واحد بالـgym سبحان الله عنده هدف أنا أول ما بلشت gym أول شي يعني الحمد لله تعلمت كل شي لحالي ما كان عدي personal trainer الناس اللي حوليي والدي ما رضي يساعدني نهائياً بالبداية بس بعدين لما شافني لأنه serious صار صار يساعدني لإنه هو أصلاً ما شاء الله عليه كان مدرب وكل شي فهلق تماريني منه بس قبل لأ امهم أنا كنت قاعد ما في أوزان 8 كيلو 5 كيلو عم بتضحك على حالي بس عم روح عرفتي؟ بس بتطلع يميني ببين مثلاً واحد كبير بالعمر بتطلع يساري بلاقي بنت عم تلعب بتطلع هيك بشوف شب عم يتمرن فاكتشفت إنه كل واحد موجود هون لسبب معين هذا بده يشبشب هذا بده يعضّل البنت بدها تضبط حالها عرفتي؟ فأنا ليش قاعد هون؟ صفنت فيها هيك قلت أيواه معناتها أنا لازم يكون في عندي هدف بالجاية لهون واشتغلت عليها والحمد لله رب العالمين، يعني نتيجة حلوة وأنا لأ أنا لأ بدي كسر النادي إذا ما كنت البني آدم اللي بكسر النادي ما خرج خلص 

مها شو الهدف تبعك؟ 

محمد الهدف تبعي إنه الهدف تبعي أكيد إني أكبر بصحة جيدة ولما يعني إني كون مثلاً كبير بالعمر وصحتي جيدة هذا هدفي الحقيقي بس هلق حالياً أنا حابب أني مثلاً كون بشكل جيد قدام الكل وأعطي نصائح للناس كلها اللي حابة إنه عنجد تستفاد بالـgym أنا بالـgym كل الناس بيجوا بيسألوني يعني معلومات عنجد في ناس بتاخد عليها فلوس بس أنا بجاوبلهم ياها بجاوبلهم ياها بصراحة عرفتي كيف؟ 

مها أنتَ كيف اكتسبتها؟ 

محمد اكتسبتها مع الوقت أي شي الواحد بده يعمله بده يعرف ليش عم يعمله يعني ما بصير الواحد يفوت بأي تجربة بدون ما يعمل research أنا مثلاً بلشت أتمرن كان لازم أعمل مثلاً أنا ليش عم بلعب هذه العضلة؟ أخي كيف بستفاد منها للـmaximum لازم الواحد يعمل research إذا أنتَ ما عم تعمل research وما عم تسوي إنت هي مو لإلك 

مها بس في بهذا المجال كتير مدارس، يعني بتسمع آراء متناقضة حول نقطة واحدة كتير 

محمد exactly 

مها وصراحةً في في ناس بتقلك أنه يعني، هلق مين ما راح عالـgym وبنى عضل بده يصير يأستذ علينا ويعمل حاله مدرب 

محمد بالضبط أنا ما بحكي لحدا أي شي أنا فعلياً قعدتي معك أنا لو يعني كله حينصدم لإنه أنا أي حدا بيحكي معي أنتَ بتروح عالـgym؟ بقله لأ أنا ما بتمرن بتاكل صحي؟ لا أكلي عادي ما بحب احكي أبداً أنه أنا يعني ما عندي ego، أبداً بالقصة هي ولا بحب to show off أبداً وأغلبية لبسي oversize ما بحب أبداً بيّن حالي إنه أنا شخص والله بلعب gym ولا شي I don't like this وما بحب أتفلسف على حدا بس في نس متل ما حكيتي بيجوا، بيتدخلوا بتمارينك بيجوا بيتدخلوا حتى لو أنتِ ما بتعرفي أنت عم تلعب هذا التمرين غلط أخي شو دخلك بالتمرين بس خلص بدك تقوليله OK ماشي بدك تمشي 

مها بس إذا حدا سألك ما عندك مانع تعطي المعلومة؟ 

محمد أنا بعطي المعلومة الصح وإذا ما بعرفها بقله ما بعرف الواحد اللي بده يتميز بالـgym إن كان سمين ولا كان نحيف ولا كان حدا هلق بده يبلش لازم ما يسمع لحدا لازم ما تسمع كلام ولا أي شخص فوت ألعب دخل الروتين هذا لحياتك وأنت تعلم عطريقتك أنا جسمي غير جسمك غير جسمه غير في مليون مليون طريقة صحيحة وفي مليون تمرين وي مليون cycle عرفتي؟ ما في شي صح وما في شي غلط، في أصح في غلط بس كل واحد يلعب على كيفه حتى لو عم بلعب غلط أخي أنا بدي ألعب غلط عندك مشكلة؟ هي هيك أنا هيك بعمل مع العالم بقلولي ليش عم تلعب هاد التمرين؟ بقله أخي أنا غلط عندك مشكلة؟ أنا جاي عبالي أتمرن غل فـbasically، لازم الواحد بس يسكر أدنيه ويلعب عراحته ويصير متميز فيها 

مها في أشخاص قدرتهم المادية ما بتسمح لهم ياخدوا استشارة، قبل ما يبلشوا وبنفس الوقت بتسمحلهم يروحوا يتمرنوا 

محمد هذا عذر I'm Sorry مثل أكبر أنا هلق ما في داعي، أنا عندي مليون موقع ببلاش فيي فوت عليه مليون فيديو عالـYouTube مليون influencer فيني شوفه إن كان أجنبي ولا كان عربي ولا كان مليون لغة ومترجم وشو بدك والـAI بيساعدك Chat GPT أي حدا بدور على على شي ينفره من إنه يحس جسمه هذا شخص عم بدور عالـexcuse ما عم بدور عالحل 

مها طيب ذكرنا في الكواليس أنه كان عندك مشكلة خلت الجهد مضاعف أو كانت يعني مثل معيقة إلى حدٍ ما أثناء هالتجربة والتحديات اللي واجهتها 

محمد مثلاً أنا متل ما بتعرفي أنه عندي مشكلة بعيني وفي عدسة طبية فـbasically ما فيني ألعب أي تمرين فيه pressure على راسي بأنه يرفع ضغط الدم لراسي لأنه بصير في مشكلة بعيني فهذا كان تحدي، بالنسبة إلي في تمارين كتير ما فيني ما فيني سويها في الـgym وفعلاً واجهت كتير مشاكل كل شهرين ثلاثة بصير معي مشكلة بروح عالمستشفى منعالج عيني مرة تانية والدكتور بنبهني مليون مرة أنتَ مو للـgym أنا من أو من تاني شهر إلي بقلي أنتَ ممنوع تتمرن gym وأنا بسحب عليه بروح عالـgym بصير مشكلة برجع لعنده هي كانت مشكلة كتير كبيرة هلق الحمد لله لقينا حل نتفادى كم تمرين بالغنى عنهم أكيد إذا رح يصير في ضرر كتير كبير فهذا معيق، كان بالنسبة لإلي يعني بالـgym أكيد وعيني 

مها للإرتباط بالـgym والحياة الصحية في سلبيات أيضاً محمد شعر فيها، بجوانب كتيرة بحياته 

محمد صار في سلبيات نوعاً ما لأني خسرت كثير ناس حولي لأنه basically الـgym أخد كتير وقتي مع كتير أصحاب بطلت شوفهم كتير ناس بطلت شوفهم أي حدا كل الناس بالبداية بتتصلك بتقلك يلا نطلع بقول عندي gym بالبداية بيتصلولك بس كل مرة، كل مرة أنتِ ما عم تقدري تطلعي بطل حدي يحكي معي فهذه شغلة كتير كانت سيئة أنا آسف جداً لكل أصحابي، وكل الدنيا بس اكتشفت أنه هذا الأهم فكل شي إلو وقته اتقربت من أهلي أكتر هذا الشي الإيجابي الوحيد اللي صار تقربت من أهلي كتير علاقتي مع أبي gym بابا كان بيلعب وكنت كتير أنا بعيد عن أهلي لما كنت صغير يعني خاصةً لقبل أحداث كورونا، كنت شخص ما يقعد بالبيت نهائياً عرفتي كيف فبعدين تقربت لأهل أكتر صرت علاقتي مع أبي كتير منيحة الحمد لله رب العالمين الحمد لله وبس لأ وشغلة إيجابية تانية إنه صرت أخذ راحتي، بالحكي مع الناس صار شخصيتي قوية، لما أعطي رأيي فهذا كله تغير متل ما حكيتلك yes 

مها الجانب العاطفي والحب، والعلاقات يمكن تكون دافع قوي للأشخاص ليغيروا بأشكالهم وبحياة محمد كان لهذا الجانب جزء كبير من التأثير 

محمد الجانب العاطفي كان في إله تأثير صراحة كان في عندي تجربة اطلعت منها يعني وقت كنا ولاد صغار يعني أوف ونعمل دراما بس هي فعلياً، هلق إذا بفكر فيها بقعد بضحك، عرفتي كيف؟ بس كان في إلها تأثير أنه أنا بدي يكون the best version of me خلص عرفتي كيف؟ هي دائماً ببالي القصة عرفتي كيف؟ يعني، الواحد لما يكون بالتمرين بيوصل لمرحلة بالتمرين أنه ما عاد فيه يشيل أو تعب الواحد بهي اللحظة لازم يستذكر أكتر شي، أذاه بحياته ويعصب بزيادة أنا أي حدا بيتمرن معي بيحكي نفسي الشي أنه في ناس لما تقعد تتوجع لأنه هنن جداد عالـgym بحسوا إنه akward أنه يعمل الـface expression، بتشوفي الناس بتعصب هو بيقعد بيضحك فأنا بتطلع فيه أنتَ كيف بتضحك إذا أنت عم تتوجع يعني أنت عم تلعب تمرين عم بوجعك أنتَ كيف قاعد عم تضحك؟ بقلي لأ أنا ما بقدر أعمل متله بتعصب بزيادة أقسم أنا من يومين إجى معي شاب صاحبي بدي أتمرن قلي بتمرن معك فكل ما كل ما يتوجع بوقف تمرين بيقعد يضحك بقله أخي شوف إذا أنتَ بتقعد تضحك لما توجع، أنتَ مو جاي تتمرن قلتله لما تاني مرة توصل للفشل العضلي وبدك بدك حسيت، أنه في ألم بتقعد تضحك لا تتمرن معي قلتله تاني مرة بتعصب والله صار يشيل صار يشيل أوزان ويلعب عدات زيادة لما صار يعصب ويعمل face expressions، فبتفرق كتير الـmentality يعني، هي كل شي صراحة بالنوادي 

مها مرة بأحد أحاديثنا الجانبية حول الجيم وحياة الإنسان كيف بتختلف بعد الإلتزام بالـgym قلتلي بتعرفي مها هي كلها على بعضها أكل ونوم يعني لتبني جسم متل ما بدك أو لتتبع نظام مريح لإلك أو تحس بنشاط جسمك هي أكل ونوم 

محمد رح أعطيكِ تصدمك معلومة تصدمك كل مرة، بعطيكِ قصص الفكرة العامة للناس أنه الواحد بروح عالـgym هي بيكتبوا بناء كمال أجسام بس هي فعلياً مو بناء كمال أجسام هي هدم هي هدم الأجسام الواحد بروح عالـgym ما بيبني جسم بيهدم الجسم الواحد بكسر العضل اللي هي الألياف العضلية ما حأدخل بالـdetails هي الـfibers الواحد بهدمهم بكسرهم قد ما بيقدر لحتى، لما ينام هون بصير بناء العضل مشان هيك النوم مهم جداً لبناء العضل بصير خلال النوم لأنه بتشوفي الناس اللي مهتمين بالـgym دائماً بناموا بكير لأنه، بده ياخد قدر الفائدة من النوم قد ما بيقدر 8 ساعات 9 ساعات قد ما بتنامي قد ما أنتِ مستفادة والأكل العلاج لبناء العضل بيعتمد على الأكل فالأكل والنوم التمرين آخر شيء يعني 80 بالمئة أكل ونوم 20 بالمئة تمرين في ناس، بتفكر بالعكس إنه أنا أخي بيجي لعندي ناس بقولولي أنا عم بتمرن عم بعمل ملتزم أخي أنتَ عم تاكل منيح أنتَ عم تنام منيح؟ لأ كيف بدك تلاقي نتيجة؟، you can't فلازم تاكل منيح وتنام منيح، ما في فائدة إذا تهدم عضلك كله بس، عم تسهر بالليل أنتَ هذا كله راح عالفاضي أي حدا بده يبلش بالـgym أنا بعرف الناس، كتير صعبة عليها أنه تبلش لازم يهتموا بحالهم ولازم يكون عندهم جسم يقاوم التغيرات اللي عم تصير بحياتهم إن كنت أنتَ teenager ولا إن كنت أنتَ كبير بالعمر أو أنتَ كنت بالثلاثينات تبعك لازم تفوت تهتم تتمرن تخلي جسمك قادر يستحمل ضغوطات، تبع الحياة اللي أنتَ ماشي فيها 

مها من 51 كيلوجرام لحوالي 80 كيلو قدر محمد قطان، إنه يزيد وزنه وباستضافتنا إله مش عم نقدمه كمختص وإنما كصاحب تجربة، محفزة وملهمة لكتار منشكره جداً، لأنه شاركنا ياها وكنا أيضاً قدمنالكم مستمعينا من فترة في بودكاست صارت معي سلسلة حلقات عن أشخاص عانوا من السمنة، وقرروا بجرأة يغيروا واقعهم وبالحالتين ندعوكم دائماً للإهتمام بصحتكم والتوجه للمختصين لأن ما ينطبق على أحد، ليس بالضرورة أن ينطبق على آخر شكراً لحسن استماعكم واهتمامكم اسمحوا لي، ذكركم بأنه بالإضافة لجميع المنصات الصوتية للبودكاست، فيكم تحضرونا على YouTube، في قناة بودكاست أخبار الآن ورح نفرح جداً لما تعملوا اشتراك، وتفعيل لزر الجرس في الـYouTube وعلى Apple Podcast أيضاً استمعتوا لحلقة الإخراج الصوتي فيها تصميم شركة Feedz Pro، وهويتها البصرية من تصميم فريق سرد الإشراف العام لمحمد علي أما بالإعداد والتقديم برافقكم دائماً في بودكاست صارت معي أنا مها فطوم إلى اللقاء