تشخيص خاطئ أدى إلى تطور سرطان الثدي عند داليا

نص الحلقة :

مها تشخيص خاطئ أدى إلى تطور سرطان الثدي عند داليا 

داليا رحت عند دكتورة نسائية عملنا الفحص، فهي قالتلي أنه لأ ما في شي عادي مجرد شد بروح بعد فترة، أنا عم بلبس بدي إطلاع قالتلي داليا أنتِ معك cancer 

مها داليا أحمد معلمة سورية بالأربعين من عمرها، ضيفتنا في بودكاست صارت معي ضمن حلقات شهر أكتوبر الوردي؛ شهر التوعية بسرطان الثدي 

داليا قلتلهم أنا ما بدي أتعالج، خلاص هذا هو الشيء الوحيد اللي أنا عم فكر فيه، أنا ما بدي أتعالج ما بدي روح ما بدي فوت بهذا الموضوع، شو بدو يصير يعني؟ لأ عادي أنا ما معي cancer هي مخربطة هي مخربطة، أنا الدكتورة قالتلي أنه شد عضلي أو أو حتى ممكن يكون ليف، بس هي مخربطة لأ أنا مو مصدقة أنه أنا معي cancer 

مها شاركتنا داليا تفاصيل تجربتها، من لحظة تلقيها خبر الإصابة مروراً بفترات الضعف إلى مراحل العلاج، كيف أثرت على علاقتها بزوجها وبنتها؟ وشو كانت أصعب المواقف يللي واجهتها؟ داليا أهلاً وسهلاً فيكِ معنا ببودكاست صارت معي ضمن حلقات شهر أكتوبر الوردي شهر التوعية بسرطان الثدي، حابة أسمع منك بدايةً عن الظروف اللي كنتِ عم تعيشيها لما تلقيتِ خبر إصابتك بسرطان الثدي 

داليا هلق أنا قبل ما أتلقى الخبر، البداية كانت لما حسيت بكتلة بصدري، وقتها رحت عند دكتورة نسائية عملنا الفحص، فهي قالتلي أنه لأ يوجد شي عادي مجرد شد بروح بعد فترة، طبعاً عادةً يعني هيك أخبار منكون متخوفين منا لما بتطمني فأنا بميل إني صدق الكلام يلي هي قالته، وخلص وسافرت ورحت ورجعت، بعد ما رجعت من سفرتي من العطلة حسيت الكتلة كبرت، فكمان ما فكرت أبداً أنه يكون cancer، قلت احتمال ليف احتمال كيس مي أي شي تاني غير cancer طبعاً، رحت لعند دكتورة قلتلها أنه فيه ألم بإيدي عم بسببلي هي الكتلة، يلي هي بصدري عم تسببلي ألم بإيدي، فأنا بس حابة إني اتطمن أنه هي ليف أو كيس مي أو كذا، قالتلي خلص نحن منعمل فحص mammogram ultrasound ومنشوف ومنتطمن ومنقلك، فبتصدف أصلاً هي القصة هي أنه كانت كمان بشهر أكتوبر، عملت الـmammogram ودخلت لحتى أعمل الـultrasound كانت الدكتورة عم تفحص فشافتني أول صدر شافت اليمين قالتلي تمام الحمدلله ما في شي، الصدر اليسار ما علقت بس كمان أنا كنت طبيعية جداً، أنا عم عم بلبس بدي إطلع قالتلي داليا أنتِ معك cancer، يا ريت ما تهملي الموضوع حتى لو أنتِ مانك حابة إنك تتعالجي عنا بالمستشفى، بس حاولي إنك يعني تدوري على المكان اللي حابة تتعالجي فيه بسرعة، هلق أنا بوقتها ما كنت قادرة استوعب شيء، أنا بس كنت وعم هز براسي، لأنه كنت أنا رحت جبت بنتي من المدرسة ورحت على المستشفى على أساس أعمل الفحص وأرجع، بنتي كانت عم تستناني برة، طلعت أخدتها ركبت بالسيارة اتصلت برفيقتي، ما كان في أي شي براسي بس قلتلها أنا معي cancer لو سمحتي خليكي معي على الخط، وأنا سايقة لأن ما بعرف شو ممكن يصير معي، قالتلي Ok وكان ضلينا ووصلت عالبيت نفس الشي خبرته لزوجي أنا معي cancer، كانت صدمة يعني أنا بوقتها لا بكيت خفت ما بعرف ما بعرف، بس هي كانت مشاعر مختلطة بوقتها لأني أنا ما كنت عارف شو لازم حس، كنت لازم كون متماسكة قدام بنتي، يلي كانت لساتها صف تالت يعني هي عم تسمع، بس أنا كمان مو منتبهين أنه نحنا عم نحكي قدامها، بس نيمت بنتي شوية إجوا رفقآتي وإجى وقعدنا، قلتلهم أنا ما بدي إتعالج خلص هذا هو الشيء الوحيد اللي أنا عم فكر فيه، أنا ما بدي إتعالج ما بدي روح ما بدي فوت بهذا الموضوع، شو بدو يصير يعني؟ لأ عادي أنا ما معي cancer مخربطة هي مخربطة أنا الدكتورة قالتلي أنه شد عضلي، أو أو حتى ممكن يكون ليف بس هي مخربطة لأ أنا مو مصدقة أنه أنا معي cancer، المهم صاروا يقنعوني ولأ يا داليا ولو تأكد أنه معك cancer لازم لازم إنك تتعالجي، أنا هون بلشت حسيت بالضعف حسيت بالضعف، كان الكلمة الوحيدة اللي على لساني بهي بهي اللحظات بدي ماما أنا بدي ماما، جيبولي ماما أنا بس بدي ماما ما بدي شي منكم بس جيبولي ماما بعدين بشوف شو بدي أعمل، زوجي حرام يعني كان كتير واقف معي بهي المرحلة، كتير كتير يعني ما يعني ماما بعد عشرة أيام كانت عندي تماماً، ابتدينا ندور على دكاترة على على مكان إني إتعالج فيه، عملت ultrasound مرة تانية عملت biopsy، تأكد الموضوع مية بالمية بعد الـultrasound الأولاني أنه إي معي cancer 

مها التشخيص الأول من طبيبتك النسائية أثر على تفاقم الوضع؟ 

داليا طبعاً لأنه المدة بين التشخيص الأول والتشخيص التاني 8 أشهر، كانت الكتلة صغيرة وصلت لما أنا اكتشفنا أنه هذا cancer مانه شي تاني كان وصل للأربعة ونص سانتيمتر فيعني هو يعتبر كبير 

مها يعني لو هي كان بوقت التشخيص صحيح كان ممكن تختصر عليك شي؟ 

داليا ممكن أكيد أكيد أكيد كان ممكن، لأنه أنا بالبدايات أنا حسيت في بالبدايات، هون نقطة أنه نحن نعرف عند مين بدنا نروح، يعني لما بتحس الوحدة أن في شي بصدرها، ما تروح عند دكتورة نسائيه المفروض تتجه على طول لعند أخصائية الثدي، هنن حيعرفوا أكثر بهذا الموضوع، يعني الدكتورة النسائية النسائية فحصت وقالتلي رأيها، بس يعني حتى بوقتها ما طلبت مني أي صورة أو أي شي، بس الأفضل أنه نحن نروح عند أخصائية ثدي، وأنا هذا اللي تعلمته من تجربتي وبنصحه لكل الناس اللي حوالي 

مها طيب من قبل إحساسك بوجود هذه الكتلة وذهابك بالمرة الأولى عن طبيبة النسائية سابقاً أنت كيف كان تفكيرك تجاه موضوع سرطان الثدي؟ هل كان عندك مثلاً طريقة أنه أنت مثلاً كل فترة بتروحي بتشيكي أو بتفحصي أو مش وارد عندك الموضوع؟ هل كان فيه مثلاً حالات في العائلة والمحيطين؟ كيف كان تفكيرك تجاه سرطان الثدي؟ 

داليا بالعائلة ما كان في سرطان ثدي، يعني كان في سرطان بس مانه سرطان الثدي، والدكتور بوقتها أنا بتذكر قلي أنه: غالباً بيجي الوراثة من جانب الأم يعني، فأنا من عند ماما ما كان في شي بس من عند من ناحية أهلي يعني من ناحية بابا كان في عندهم سرطان بس مانه ثدي، هلق أنا يعني ما كنت حاطة الموضوع براسي وما كنت أفحص صدقاً أنا ماكنت أفحص يعني حتى لما تجي حملات التوعية قول لأ ما بدي خلص أنه عادي لو في شي ببين، بس انتقلنا بقى للمرحلة يلي بدي روح أتعالج فيها يعني أنا 

مها قديش طولت مرحلة الإنكار عندك؟ 

داليا إيه الإنكار؛ هي ما طولت كثير هي ما طولت كثير، بس يعني عملت الصورة مرة تانية والخزعة، لما تأكد صار الموضوع بالنسبة لإلي أنه أمر واقع ما كان في انهيار، شوفي لما كل وحدة فينا بتخاف على حياتها وخصوصي إذا كان عندها أطفال لما بتكون أم ما بتخاف على حياتها كرمالها يعني أنا أول شي كنت عم فكر فيه بنتي، طب أنا بنتي كيف بدها تتلقى الموضوع؟ بنتي كيف كيف ممكن تتحمل أنه أمها مريضة؟ يعني حاولت أني شوي كون قوية، لأنه اكتشفت بعدين أني أنا يلي بقوي العيلة كلها إن كان زوجي ولا بنتي ولا ماما يعني أنه أنا لازم كون قوية لحتى هنن يقووا فيني عرفتي شلون؟ فكنت أنا فعلياً من جوة عم حاول أني قوي حالي، رفقاتي كان كثير إلهن دور بالفترة يلي أنا مريت فيها، بس بهي الوضع بهذا الوضع الواحد بيكون محتاج مو لحدا يقله خليك قوي أنت بتقدر لأ ويبسط الموضوع أنه لأ عادي ما بصير وهلق بيتعالج صح، بس بهي المرحلة بالذات الواحد بيكون محتاج لطبطبه لكلمة حلوة لحنية تحسسك بالأمان بس 

مها من نوع شو؟ 

داليا من نوع يعني أنه كل شي راح يصير منيح عرفتي شلون، بدك تعبري عن مشاعرك وتبكي ابكي، اضعفي، يعني أنا جنبك بس أنه أنا جنبك، معلش كله بيمرق إن شاء الله، كله حيكون منيح كله حيكون أفضل 

مها قديش كان عمر بنتك وقتها؟ 

داليا كانت صف تالت يعني يمكن 8 سنين هيك شي

مها كيف شرحتولها الموضوع؟

داليا ما شرحنالها، بنتي صارت معها قصة، هذا كمان غلط أنا بدي أحكي فيه أنه أنا ما حكيت كنا عم نحكي عادي cancer ولازم روح وتحاليل فراحت هي عالمدرسة بيوم قالتلا لرفيقتها أنه ماما مو جاي تأخذني اليوم جاي رفيقتها قالتلها ليش ماما مو جاي قالتلا لأنه ماما رايحة عالمستشفى عندها cancer أطفال رفيقتها قالتلها أنه أنا قرايبتي كان عندها cancer وماتت، بهذا اليوم أنا أنا ما كنت بعرف شو صاير يعني حتى ما عرفت إلا بعد ما رحت عالمدرسة بنتي لاقيها بالليل عم تبكي وتعانقني وهي نايمة صدقاً ما أفهم ليش هيك عم بصير معها يوم قررت أني روح على معلمة الصف لعندها وقلها أنه أنا أنا صاير معي breast cancer وبدي بس ديري بالك على بنتي أنا بنتي جتني بعد فترة طويلة من من الزواج 9 سنين 10 سنين فأنا فأنا بس بدي ديري بالك عليها لأنه هلق أكيد نفسياً بدها تكون شوي تعبانة وعم حسها مانها طبيعية بالبيت قالتلي هي اللي قالتلي بقى أنه أجت لعندي وعم بتقلي عنجد ماما رح تموت وأنا وأنا وأنا هيك رفيقتي قالتلي ففهمتها أنه لأ مو هيك فبتعرفي الوجع بزيد بزيد إنه أنت أكله هم أولادك 

مها طبعاً 

داليا أكله هم إنه شو بدن يحسوا حاولت احتضنها وفهمها أنه لأ أنا منيحة، وإن شاء الله كله عالعلاج بكون كتير منيح وماما منيحة وقويها كرامة هيك أنا ما كان فيني أضعف أنا دائماً بدي بين قدامهم قوية، جينا بقى لمرحلة أنه أنت بدك تبدأي تشوفي الدكتور يللي بده يتابع علاجك، رحنا لعند دكتور معين يعني في دكتورة كمان دلتني عليه بحب وجهله تحية كتير كبيره دكتور فادي ميخائيل، كان كتير أكبر داعم لإلي الدكتور فادي كان لما روح لعنده بلحظات الضعف كان دائماً يقويني ويقلي أبسط شي صار هلق سرطان الثدي، يعني أنه إمكانية الشفاء منه كتير كبيره كتير كبيره كنت خاف وقله أنه أنا خايفة من الكيماوي أنا مو خايفة من الكيماوي مشاني أنا ما بدي بنتي تشوفني هيك ما بدي بنتي تشوفني ضعيفة ما بدي بنتي تشوفني من غير شعر من غير حواجب من غير رموش كنت حس بوجع كنت خاف أكسر خاطرها بعد حين بعد حين تقبلت أنه حتى لو كان أنا رح أخذ كيماوي فليكن بنتي رح تقوى أنا رح أقوى أنه كله بإرادة رب العالمين يعني أنه هذا الشي رح يكون الله كاتبلي ياه وأنا بدي أتقبله وبدي أتعايش معه ابتدينا بقى صور mammogram، PET scan، CT scan، تحاليل، biopsy، خزعات، كله هذا عملناه عملناه عملناه وأنا بحمد الله كمان أني أنا كنت بالإمارات لأنه كانت العناية كتير ممتازة والأمور عم تمشي بسرعة يعني أنا اكتشفت مرضي بشهر 10 ب14 10 يعني 14 11 كنت عم بعمل العملية كنت عاملة العملية، هلق البدايات أنا ماكنت عرفانة كيف بدها تمشي الخطوات كرمال العلاج، وقتها بعد التحاليل وبعد الصور الدكاترة اجتمعوا وقرروا أنه أنا لازم أعمل العملية بالأول 

مها الاستئصال 

داليا الاستئصال 

مها ok

داليا لازم نعمل استئصال، لأنه الورم كبير وما في داعي إذا شلناه ما رح ما رح نقدر نعمل تجميل لإله ف بدنا نعمل استئصال، كنت موافقة ماشي خلينا نستأصل لو أنا رح أتحسن ورح كون منيحة عادي مافي مشكلة بستأصل ما عندي مشكلة، كنت متقبلة الموضوع كثير يعني، حددنا موعد العملية، وقالوا أنه بعد العملية رح ياخدوا الورم ويبعثوا على التحليل كرمال يشوفوا بروتوكول العلاج كيف بده يكون بعد العملية بشهر بعرف كيف بروتوكول العلاج بده يكون عملت العملية قبل العملية بيوم، بليلة العملية كنت خايفه هلق ليش خايفة بغض النظر أنه أنا رح أستأصل جزء من جسمي بس كنت خايفة أنه أنا كيف بدي أتقبل حالي، يعني هو من يعني إذا فكرنا فيها أنه ماشي لو بدك تطيبي وأنه لو هذا الشي لمصلحتك لعلاجك أنه إيه بس هو مو سهل 

مها مو سهل أبداً لأنه الثدي يعني بعبر عن هويتنا الأنثوية، ونفسية المرأة جداً بتتأثر أكيد 

داليا فأنا بتذكر أنه بليلة العملية هيك قعدت مع حالي، قعدت حبيت إني أقعد مع نفسي بس لحتى فكر، أنتِ داليا رح تتقبلي حالك؟، طيب أنتِ كيف رح يكون شكلك؟ كيف رح تطلعي على جسمك؟ يعني خلص قلت خلص يعني إن شاء الله يعني الله بقويني، بحاول إني كون يعني قوية قوية واتقبل الموضوع، رفقاتي كتير ساندوني بهي الفترة كتير ساندوني، يعني أنا أنا ما بعرف عن جد من غيرهم شو كان ممكن إني أعمل، يعني أنا كانت عمليتي المفروض إني كون بالمستشفى الساعة 5 الصبح، رفيقتي كانت قبلي عنجد رفيقتي كانت قبلي هي وزوجها، وصلتني على باب العمليات على باب غرفة العمليات، وكانت قاعدة مع ماما هي القصص البسيطة يعني نحنا منفكر أنه هي ما بتعني كتير للشخص اللي يكون بمحنة أو بتعب، بس هي كتير بتعنيله لما بلاقي في ناس حواليه عم بتطبطب 

مها صح 

داليا أنا معك يعني أنا معك لدرجة أنه أنا الساعة 5 الصبح جايبي زوجي، وجاية على المستشفى لوصلك على باب غرفة العمليات، بفوت على غرفتي بلاقيها قاعدة عم تستناني، عنجد قديه حلو الموضوع يعني؟ فتت على العمليات قعدت يمكن 6 ساعات أو 7 ساعات، طلعت يعني أنا بتذكر إني أول ما فقت من البنج، أو عم فتحة عيوني عم قله لزوجي سارة سارة بنتي يعني بنتي سارة، أنه سارة هلق وقتها بالمدرسة روح جيب سارة روح جيب سارة، المهم الحمد لله يعني طلعنا من العملية، قعدت يمكن 3 أيام بالعمليات، الدكتورة قالتلي بدك تقريباً إن شاء الله يعني 6 أشهر لترجعي تقدري تحركي إيدك، حاولي أنك ما ما تتعبيها لانه نحنا لسة في يعني، حطيت لأنه شو بقولولها implement 

مها Ok 

داليا تجميلي يعني كمان، قالتلي بدنا تقريباً 6 شهور إن شاء الله لحتى تقدري شوي بس في تمارين المفروض أنك تعمليها، تمارين تنفس الحمد لله أنه أنا اقتصرت عمليتي على إزالة الثدي، أخدوا من من العقد اللمفاوية اللي تحت الباط، وفحصوهم وأنا بقلب العملية فالحمد لله طلع مانه واصل للعقد اللمفاوية، كان عندي الـcancer أنا المرحلة التانية، بدايتها يعني شوفي أنا 8 أشهر كبر بس كان كمان بالأول، فما بالك لو كان الفحص مبكر أكتر يعني أنا لو من أولها اكتشفوا ما كنت وصلت لهي المرحلة 

مها تمام 

داليا فسبحان الله خلص أنه كان وصل للمرحلة التانية، والحمد لله ما كان في شي بالعقد اللمفاوية، قعدت 3 أيام بالمستشفى وطلعت، صرت بقى بعد ما خلص يعني لازم أعمل التمارين صرت أعمل تمرين أكتر، عرفتي؟ أنا أنا بطبعي بحب الحياة وصرت حبها أكتر بعد المرحلة يلي مرقت فيها صرت حبها أكثر، وحس بقيمتها أكتر أنا بدي طيب بسرعة لأ أنا لازم طيب بسرعة، فعلياً صرت أتمرن ما أجي على حالي بس لأ معنوياتي حاول أني عليها، أنا منيحة أنا بدي قوم أمشي أنا بدي أتحرك أنا ما رح ضل قاعدة على التخت، أنا ما رح ضل مستناي يجوا يزوروني ويسلموا علي لأ، الحمدلله بفضل من رب العالمين الحمد لله بعد شهر كنت قادرة إني حرك إيدي 

مها الحمد لله 

داليا حتى الدكتورة الأخصائية الثدي قالتلي أنه bravo داليا bravo يعني أنتِ عم بتكوني قوية، وعم بتكوني قادرة أنك تسيطري شوي على جسمك، والنفسية أنا نسيت أحكي على على قصة النفسية، على فكرة النفسية كتير بتلعب دورها وقت اللي بكون الواحد تعبان، يعني طول ما أنتِ معنوياتك عالية وما بقلك تتقبلي، يعني هو التقبل جاي جاي مجبرين عليه يعني أنه الواحد يتقبل الموضوع، بس أنك تشوفي الموضوع بطريقة تانية، يمكن الرضى الرضى أو التفكير أنه رب العالمين اختارني اختارني ليشوف أنا قدي قوية، ليشوف أنا قدي بقدر أتحمل، كل واحد فينا أكيد بتمرق معه مواقف وقصص بس سبحان الله يعني هي بتكون على حسب قدرة الإنسان، أنا لما يعني بعد ما هديت وقلت خلص إذا كان رب العالمين كاتبلي مثلاً آخد كيماوي فليكن كيماوي، أنا قدها وبنتي رح تقوى وأنا رح أقوى، ومهم أني أنا أرجع وكون مع بنتي وشوفها عم تكبر قدامي، بلشت أتقبل اللي ما بعد هي المرحلة بعد هالعملية الحمد لله يعني كان كله تمام 

مها قديش صار قاطع وقت؟ 

داليا هلق شهر هلق أنا اكتشفت المرض 14 10 عملت العملية 14 11 أخدوا الورم بعتوه على المخبر بعد شهر بتطلع النتيجة 

مها هذا سنة؟ 

داليا 2018 2018 

مها تمام من من وقتها لليوم كيف بتصير طريقة الإهتمام والإعتناء؟ وقت نقول أنه تعافت من سرطان الثدي يعني تعافت بالمطلق أو لأ، في شي لازم تحافظ تتابع عليه نوع أدوية معينة نوع إجراءات معينة؟ 

داليا خليني بقى قلك بس هي النقطة، أنه بعد ما طلعت نتيجة فحص الورم رحت لعند الدكتور فبوقتها كان ببين معهم كيف بروتوكول العلاج ما هو هون، لأنه بعد العلاج بدنا نشوف كيف منتابع، يعني أنه نشوف إنه تعافينا أو ما تعافينا أو شولازم نعمل، فأنا لما رحت لعند الدكتور بكذب عليكِ إذا قلتلك أنه أنا ما كنت خايفة، يعني أنا كنت متوترة لدرجة إني أول ما دخلت لعند الدكتور، قلي داليا شو هذا الوجه اللي أنتِ جاي فيه؟ كان مبين عليه خوف رعب يعني، قلي أنا بدي طمنك ما في كيماوي، صدقاً يعني كنت أنا وماما وزوجي بوقتها من كتر ما فرحنا نحن التلاتة قعدنا نبكي يعني عنجد، قلي ما في كيماوي والتحليل تبعك بدل إنه مافي لا كيماوي ولا في إشعاع، نحنا رح نبتدي معك بدواء هرموني 

مها Ok 

داليا رح تاخديه كل يوم وطبعاً مع فيتامينات ومعادن، قلي بس له side effect أنا قلتله ما عندي مشكلة أي عوارض جانبية أي شيء أنا ما عندي مشكلة فيه، قلي حالياً بتجي كل 3 شهور منعمل فحص دم، ومنشوف شو منعمل مثلاً ممكن نعمل ultrasound ممكن نعمل صورة إشعاع، يعني أشعة يعني ومن ساعتها يعني منتابعك وما بتتركي حالك أكتر من هيك 3 شهور كل 3 شهور بتكوني عندي 

مها تمام 

داليا كان عنجد يعني أنا كنت كتير فرحانة بهذا اليوم يعني، كنت حاسة أنه سبحان الله صح يعني أنه يعني كان في بلاء بس رب العالمين كان رحيم رحيم، حسيته عم بقلي أنا بس كنت عم شوفك قديش بتتحملي أنا أنا يعني حسيت أنه الله معي 

مها لما يقرروا الأطباء أنه الحل استئصال، هون يترك للمريض حرية الأختيار أو لأ يعني لما قالولك أنه؟ 

داليا لأ ما في حرية هلق أنا بالنسبة لحالتي ما في حرية 

مها ما بدي اسئصال مثلاً بدي كيماوي ما في هيك شي؟ 

داليا لأ ما هو في ما هو أنا بقلك يعني أنه يعني هو بروتوكول العلاج هنن اللي بقرروه 

مها تماماً هي المعلومة بس حابة أعرف كيف تفصيلتها 

داليا أنتِ إلك حرية الإختيار، أنا مثلاً ما بدي آخذ هذا الدواء عم يزعجني، ممكن غير دواء تاني ما بدي أعمل هذه الصورة حالياً، ممكن أما أنه أنتِ تقولي أنا ما بدي استأصل أنه لأ لأ لأنه 

مها هون على مسؤوليتك بتصير القصص؟ً 

داليا طبعاً على مسؤوليتك لأ لأ، المهم إحنا أخدت الأدوية الأدوية كان إلها side effect صعب شوي أولاً، لأنه أنا كان الـcancer تبعي من مستقبلات الإستروجين، فكان المفروض أنه ينسحب الإستروجين من جسمي، بتعرفي بقى لما الهرمون بينسحب من الجسم في له كتير آثار صعبة يعني، كان اكتئاب عصبية تعب غير هيك أنه أنا بعد كل هي المرحلة اللي مرقت وقفت وانتبهت، أنه أنا شو صار معي؟ عرفتي؟ أنه هي ما بعد الصدمة، يعني أنه الواحد بعد ما بفيق من الأمور اللي بتكون بسرعة بسرعة لأنه أنت متخيلة بشهر تحاليل وعملية وكل هي القصص صارت أنا شو صار معي؟ متل اللي فقت أنا كيف هيك صار معي؟ طب أنا أنا لسة موجودة، الدنيا كلياتها ماشية طبيعي على فكرة وأنا معي cancer كان؟ عرفتي؟ أنه الناس عايشة طبيعي طيب أنا ما حد حس فيني هيك بلشت، يعني أنه كله عايش طبيعي وما حدا ما صار شي بس أنا كنت مريضة، إجت هي الفترة كانت صعبة كمان عليي لما بلشت يعني ما بعد الصدمة حس أنه أتذكر كل شي صار، حس بالأحاسيس اللي كنت فيها بوقتها يعني وplus الدواء يلي كنت عم باخده كمان، كان عم يبلش يعمل مفعوله معي، أخدت فترة معي أخدت فترة لحتى شوي بلشت أرتاح، ورحت لعند الدكتور وقلتله أنا عم بتعب عم بصير معي هيك 

مها فكرت شي باستشارة نفسية؟ 

داليا طبعاً أكيد هلق أكيد فكرت باستشارة نفسية، لأنه أنا متل ما قلتلك يعني تخطيت هي المرحلة، ما كان عندي وقت أضعف فيه، فكنت حاملة مسؤولية عيلتي أنه ما تضعف، فكنت مضطرة إني كون القوية يلي فيهم، أنه ورجيهم أنه لأ كل شيء منيح على فكرة يعني، أنه كل شي تمام أنا منيحة رح أعمل العملية ورح كون كتير منيحة، طلعت من العملية الحمد لله أنا قوية شوفوا قدرت حرك إيدي، قدرت إني كون حاول إني إنشفى بسرعة يعني مرحلة التشافي تكون سريعة، بس بالمرحلة لما لما ماما خلص سافرت ورجعت بعد 3 شهور قعدت معي 3 شهور ورجعت، حسيت بالضعف بلشت حس أنه أنا شو صار معك داليا؟ كيف هيك؟ أنتِ كيف كيف كنتِ بهي المرحلة مارقة وما ما حسيتِ؟ ما ما ما ضعفتِ، هون فعلياً هون ضعفت تعبت إي تعبت وفكرت باستشارة نفسية ورحت لعند دكتوري وسألته، أنه أنا هيك عم بصير معي فأنا فهو شجعني شجعني، قلي روحي لعند دكتور نفسي، وحاولي أنك تريحي حالك يعني وبيعطيكِ أدوية يعني، فقلي مرحلة طبيعية بتمرق لأنه يعني ما كانت سهل المرحلة 

مها رحتِ؟ 

داليا ما رحت 

مها شو عملتِ؟ 

داليا ما رحت 

مها لتقوي حالك؟ 

داليا ما رحت شوفي يعني حاولت إني أشغل حالي، حاولت إني أشتغل حالي حاولت إني سيطر على على شوي تصرفاتي وعصبيتي، حاولت ونجحت يعني نجحت إلى حد ما نجحت بالموضوع الحمد لله، وبرجع وبقلك صدقاً أنا يعني ماني عم بالغ بس رفقاتي كتير كان لهم دور بحياتي، يعني بهي مرحلة المرض يعني كانوا هنن كتير واقفين جنبي، هنن ياخدون يطلعوني يقعدوا معي يسمعوني، لما أبكي لما عصب لما صرخ كان يعني كانوا على طول حضن لإلي يعني عرفتي شلون؟ 

مها لأي درجة أثر هالوضع النفسي والصحي على تعاطيكِ مع أفراد أسرتك زوجك بنتك المحيطين فيكِ؟ 

داليا أثر شوي أثر شوي هلق متل ما قلتلك حاولت سيطر عليه أثر شوي أثر شوي، عصبيتي كانت كتير تطلع على بنتي يعني وأندم بعدين، بس أنه كان برجع وبقلك يعني الدكتور قلي أنه الدواء له آثار جانبية ونفسية، يعني الدواء واللي مرقت فيه، هلق أنا ضليت أول فترة كل ما روح أعمل فحص خاف، لأنه كل 3 أشهر بكون عندي فحص دم هاد أساسي فحص الدم أساسي يعني، كنت خاف يعني خاف أنه يرد أنه معقولة يقلي رجعلك المرض مثلاً؟، معقولة يقلي كذا؟ فالدكتور الدكتور كان كتير يعني كتير كان يريحني، لما روح لعنده أنا خايفة أطلع من عنده أنا كتير مرتاحة، أنا بس بدي قول يعني لأي حدا بده يروح ويتابع عن دكتور، أهم شي يكون في راحة نفسية وتفاهم بينك وبين الدكتور، يعني لما بتروحي لعنده وبيشرحلك بالتفصيل الحالة تبعك وبيشرح أنه أنتِ بأي مرحلة، وأنتِ هلق تخطيتِ مرحلة الخطر، نحنا بدنا نضل محافظين على مثلاً مستوى الاستروجين ما يطلع، بدنا نعمل تحاليل ما مشي حال الدواء معك لازم ناخد إبرة، بعد الإبرة بتحسي حالك عم تفهمي أنتِ شو عم بصير معك، وبتفهمي يعني بتفهمي آلية جسمك شو شو شو التغيرات اللي عم بتصير فيه، بالإضافة أنه هو فاهمك هو فاهم وجعك وتعبك وفاهم أنه أنتِ المرحلة يمكن مارق عليه كتير، ويمكن أنا كون مرحلة بسيطة بالنسبة لغيري، بس ومع ذلك كان عم بقدر الألم يلي أنا كنت عم حس فيه، كتير حلو يكون الدكتور إنسان، قبل الدكتور يعني 

مها بما أنك ذكرتِ موضوع الحالات المختلفة وطريقة تعاطي الأطباء معها، ذكرنا مبارح بالكواليس أنا وأنتِ كنا عم نحكي عن أهمية أنه النساء ما يعمموا حالة وحدة منهم، ويصيروا بدهم مثلاً يتبعوا نفس خطواتها أو يقارنوا، يعني لأنه طرق العلاج مختلفة والتشخيصات مختلفة فشو بتحبي تقولي عن هالموضوع؟ 

داليا تمام شوفي هلق أنا قبل ما إتعالج وقبل ما أول ما اكتشفت المرض، شفت كتير يعني شفت أكثر من وحدة كان عندهم breast cancer، فكانوا دائماً يحكولي عن طريقة العلاج تبعهم وقديش طولت وشو الآثار الجانبية، هلق أنا صدقاً كنت ما حب أسمع كتير تفاصيل، كنت حس أنه أنا حالة خاصة يعني أنا وضعي غير يعني حالة غير حالة الشخص الآخر، ولما صرت أنا كمان أحكي أحياناً أو حدا يسألني عن مرضي، لما قلهم أنا كان بروتوكول علاجي هيك يفكروا أنه من الدكتور أنه هو الدكتور بيتبع هذا البروتوكول، لأ هي بتكون يعني طبقاً لحالتك طبقا للتحاليل بتكون التحاليل والتشخيص هو اللي بقرر كيف طريقة العلاج، ممكن يكون كيماوي من غير إشعاع ممكن يكون إشعاع من غير حبوب، بس أنا بسبب حالتي ووضعي لأنه برجع وبقلك أنا كان عندي الـcancer إجاني من مستقبلات الإستروجين، هرموني وأنا اكتشفته من الأول وكان بروتوكول علاجي أنه حب بس حب، وبعدين ضافوا الإبر وبعدين غيرنا الحب هيك يعني أنه بصير بصير بيتغير كل فترة 

مها تمام هلق بعد 5 سنين تقريباً صار مارق شو الوضع؟ 

داليا هلق شوفي أنا كنت عم باخذ دواء لفترة معينة وطبعاً لأنه كنت عم بعمل فحوصات دورية، فمرة عم بعمل فحص قام قلي الدكتور داليا طالع معنا بطانة الرحم عندك سميكة جداً، ونحنا منخاف لأنه ممكن تتحول لـcancer عرفتي كمان؟ فأنا من الأول قلي المفروض اتابعي مع دكتورة نسائية، فطلب أنه نعمل متل ناخد عينة ونفحصها، عملت هي العملية بقولولها Curettage، عملتها فحصنا والحمد لله طلعت العينة سليمة، أنا من خوفي وحذري يعني قلت خلص أنا إذا الموضوع الرحم رح يسببلي مشاكل فبعمل استئصال 

مها Ok 

داليا قلت خلص أنا بريح حالي يعني، سألت الدكتورة قالتلي متل ما بدك أنتِ براحتك يعني بس ممكن، بس أنا قبل ما بعمل أي خطوة برجع لدكتوري مرة تانية فرحت لعنده وقلتله دكتور أنا عم فكر إني شيل الرحم لأنه أنا بخاف ترجعلي السماكة، وبخاف أنه يتحول لـcancer وهي القصص، قلي هاد الشي بيرجعلك إلك أنتِ بس نحنا إذا فينا نعالج بأدوية تانية ليش لحتى نستأصل 

مها Ok 

داليا الاستئصال مو دائماً صح بحقك يعني قلي وبعدين هذا جسم، مو كل أي شي بدي استأصل على طول منشيل، قلي أنا هلق رح أوصفلك دواء هذا الدواء بقلل من سماكة بطانة الرحم، بعد 3 شهور قلي بيجي مفعوله بعد 3 شهور فعلاً بعد 3 شهور رجعت لعند الدكتورة النسائية وقالتلي ما شاء الله كلو راجع تمام، بس هذا الدواء عملي تأثيرات جانبية فظيعة يعني أنا بوقتها عملي قلة تركيز اكتئاب تعب بالجسم، رجعت لعند الدكتور أنا هيك بصير معي غيرلي الدواء الدواء التاني قلي كله له آثار جانبية بس أنتِ اللي فيكِ تتحمليه 

مها يعني هي الموضوع بصفي بقى متابعة ونقاش مع الطبيب ومنشوف شو اللي بناسب كل الوضع، كل تأثير جانبي هيك بدو يكون الحال بعد علاج سرطان الثدي 

داليا متابعة تماماً متابعة تماماً، يعني المفروض أنا أول أول فترة كانت كل 3 شهور حالياً كل 6 أشهر بروح بعمل، أنا من فترة أسبوعين كنت عاملة CT Scan كمان كرمال أعمل فحص لجسمي كله، الحمدلله يعني أنه كانت النتائج منيحة، بس المتابعة كتير مهمة حتى لو الواحد يعني حتى لو كنت شافية وناجية، بس ما منترك الموضوع من غير متابعة بهي الحالة أنتِ بترتاحي وبتطمني، ومنعرف أنه الدواء عم ياخد مفعوله وأن جسمك ماشي بالطريق الصح 

مها ذكرتيلنا مواقف حلوة خلال هالرحلة هي رحلة التعافي من سرطان الثدي، خاصة يمكن بعلاقاتك الاجتماعية مع الأصدقاء وهيك، طب إذا بدك تذكريلنا مواقف صعبة مرت عليكِ خلال هالتجربة أو أصعب أو أقسى اللحظات اللي عشتيها خلال هالتجربة شو كانت؟ 

داليا أصعب شي أصعب شي لما اكتشفت المرض، وبرجع بقلك هي كانت بس أنا بنتي، أنا بنتي يعني أنا كان كل خوفي مو علي أنا كان على بنتي، لما بنتي إجت لعندي عالمستشفى وعيونها دموع يعني هي شايفة ماما بالمستشفى وشايفة أنه صاير معها شي صعب، بس هي مو عرفانة تعبر أصعب شي لما بدي خبر ماما، أنه أنا طلع عندي cancer أنا ماما ما قلتلها بالموضوع تماماً إلا لإجت لعندي وكنت حاولت إني خلص كل فحوصاتي وكل صوري قبل ما تجي ماما، أحياناً في موقف أنا ما بقدر أنساه ما بقدر أنساه، كنت رايحة أعمل AMR بالمستشفى، وكنت كتير ضعيفة يومها أنا لهلق بتذكر كيف رفيقتي كانت واقفة مقابيلي على بالغرفة وأنا عم ببكي، وقلها أنا ما بدي أعمل شي ما بدي أعمل شي مشان الله ساعديني أنا ما بدي أعمل شي، هي كانت عم تبكي هي عم تتطلع عليي إنه أنا ما بقدر أعملك شي وأنا عم بستنجد فيها وخايفة، بس أنا ما كنت بعرف ليش خايفة يعني بوقتها كنت رايحة أعمل فحص وبعرف أنه أنا عندي cancer، بس في لحظات ضعف بتمرق على البني آدم ما بكون بيعرف أسبابها عرفتي؟ يعني الحمد لله يعني هدول أكتر شي كانوا كانوا صعبين عليه يعني

مها طيب داليا أنا بالنسبة إلي يعني هيك سألتك كل الأسئلة اللي كنت حابة اسألك ياها، صفي إذا أنتِ بتحبي هيك تقولي شي للنساء بشكل عام عن سرطان الثدي بشكل خاص 

داليا هلق هلق أهم شي أنه نحنا نعمل فحص دوري، يعني أنا بتمنى أنه كل سنة معلش كل سنة بهذا الشهر تروح كل وحدة فينا وتعمل فحص دوري، لتطمن على حالها وبرجع وبقلك أهم شي نروح عند أخصائية ثدي إذا لقينا شي مانه طبيعي بالجسم، ممكن تكون الطبيبة النسائية شاطرة أنا ما عم قول بس بس نحنا للإطمئنان، يعني أنا يلي صار معي خلاني أتأكد تماماً انه لأ لازم نروح عند أخصائية ثدي، تلاتة أنتِ قوية وبتقدري أنك تكوني قوية وبتقدري أنك تعملي حياة من بعد التجارب الصعبة اللي بتمرقي فيها، أنا هي التجربة بحد ذاتها خلتني أقوى أكتر، وحب الحياة أكتر ودور على شغفي، ودور على حياة داليا اللي هي حابة أنه تكمل فيها، وتعمل الشي اللي بتحبه، يعني أنا حالياً بعد بعد كل هالفترة يلي مرقت عليي وهالصعوبات، وبعد 5 سنين قلت داليا أنتِ في شي بتحبيه فابتديت دور على شي أنا أنا أنا بدي مارسه يعني، حالياً أنا من بعد كل هالقصص هي عملت دورات تعليق صوتي، عملت دورات دوبلاج عم حاول إني فوت بهذا المجال، الشي اللي أنا بحبه عرفتي؟ عم حاول إني دور على الحياة الحلوة يلي رب العالمين عطاني ياها مشان عيشها، عطاني فرصة جديدة عطاني حياة جديدة عطاني أمل، عطاني أمل إني يعطيني الصحة والعافية وشوف بنتي كبيرة قدامي وبس 

مها شكراً كتير لإلك داليا ومنتمنالك التوفيق، اسمحيلي يعني نوه للمستمعين والمستمعات والمشاهدين يلي عم يحضرونا على كل المنصات بودكاست صارت معي، أنه من خلال حلقات شهر أكتوبر الوردي يلي قدمنا فيها تجارب متنوعة، كانت الغاية الأساسية والأولى أنه يعني نفتح أبواب الوعي لأهمية الفحص المبكر حول سرطان الثدي، وكمان لنشوف ونسمع تجارب نساء مروا بهالتجربة كيف تعاطوا مع الموضوع؟ كيف كانت حالتهم النفسية؟ يعني لما نسمع قصص غيرنا ممكن نحنا نستلهم بعض الطرق لحتى نقوي أنفسنا بالدرجة الأولى، ونقدر نستمر متل ما قلتي يعني نشعر بفرص الحياة الدائمة والمستمرة

داليا تمام 

مها شكراً كتير لإلك 

داليا شكرا لإلك حبيبتي 

مها انتظرونا الأسبوع القادم بحلقة جديدة، ومن هلق لوقتها روح اسمعوا الحلقات السابقة في موقعنا أخبار الآن دوت نت، أو عبر متابعتنا في تطبيقات البودكاست المختلفة، وإذا كنتم عم تحضرونا في يوتيوب تركولنا بطريقكم like وshare وsubscribe ليوصلكم كل شي جديد منا أنا مها فطوم وهذا بودكاست صارت معي