إصابتي بسرطان الثدي قوتني!

نص الحلقة :

مها الهروب منه وإنكاره ما بينفعك بشي لا تخافي وروحي فحصي هيك خبرتنا فريدة عن سرطان الثدي

فريدة لما منكون قاعدين الناس بيقولوا هداك المرض يعني لهلق في ناس ما بتقول عنه سرطان

مها فريدة الببيلي أم وصيدلانية سورية مقيمة في الإمارات من حوالي 9 سنين لما كان عمرها 33 سنة بعد الولادة وخلال فترة الرضاعة أصيبت بسرطان الثدي والحل بحالتها كان استئصال لكن القرار ما كان سهل

فريدة فأنا ما كنت بعرف طبعاً وقتها بابا بحاكيني بقلي تعي لعنا عالبيت أنتِ وزوجك هيك يعني هون أنا بتقليلي هلق شو كانت مشاعرك بهي الفترة كنت رامية كل شي على بابا

مها ببودكاست صرت معي ضمن حلقات شهر أكتوبر الوردي شهر التوعية بسرطان الثدي شاركتنا فريدة تفاصيل تجربتها وخبرتنا عن دور والدها بقرارات العلاج وعن أهمية وجود زوج وعائلة وأصدقاء داعمين فريدة أهلا وسهلا فيك في بودكاست صارت معي

فريدة أهلين فيكي مرحبا

مها نحن بشهر أكتوبر حلقاتنا مخصصينها لاستضافة نساء عانوا من سرطان الثدي ليخبرونا تجربتهم كيف كانت المشاعر المصاحبة لإلها وشو التحديات اللي واجهوها والدعم اللي تلقوه من المحيط فحابة تكون البداية بالفترة اللي عرفتي فيها أنه أنت خلص معك سرطان الثدي كيف كانت شو السبب اللي خلاكِ تشخصي

فريدة تمام هلق بصراحة هي أكيد فترة كانت فظيعة يعني بس هي بدايتها كانت بفرح سبحان الله لأني كنت عم رضع ابني أنا يعني فترة رضاعة ومبسوطة أنه عندي بيبي جديد وهيك وبعد فترة من الرضاعة بعد بكم شهر صرت شوف يعني إفرازات لونها بني فطبعاً أول شي أنه بدنا نروح نشوف شو الموضوع قالولي أنه معك papilloma على القنوات الحليب فبدها عملية بس أنه يعني 99.9 أنه هي ما فيها شي حميدة ففعلاً بعد ما شفنا كذا دكتور وهيك وعملنا العملية وعأساس أنا خلصت العملية يعني خلصنا وعم عيش حياتي عادي ولا خاطرلي فكر بشو كانت نتيجة الpapilloma اللي شالوه هنن شالوا يعني كمية منيحة من قناة الحليب إيه بيحكوا مع بابا بابا لأنه بالمجال الطبي أصلاً عنده مختبرات وهيك فدكتور يعني فاللي عملي العملية اتصل ببابا وقله هيك هيك هيك فأنا ما كنت بعرف طبعاً وقتها بابا بيحاكيني بيقلي تعي لعنا عالبيت أنتِ وزوجك هيك يعني فعم نحكي ونحكي قلي بدنا نعمل شوية فحوصات بكرا بالمستشفى هلق أنا كمان pharmacist فبعرف شو يعني هالفحوصات فلما رحنا تاني يوم عالمستشفى نعمل الفحوصات عرفت شو قصده بابا طبعاً بس عم حاول مثل ما بيقولوا كذب الخبر يعني أنه خلينا نشوف تاري هي كانت الفحوصات لحتى نشوف هل هو كان أصلاً منتشر بالجسم ولا لأ فهي اللي كانت الفترة لبينما تطلع نتيجة الفحوصات أصعب شي لما تلاقي أبوك أنه هيك متأثر كتير يعني أنا كنت خايفة على مشاعر ماما وبابا أكثر علي مني أنا يعني بالمستشفى أنا وماما وبابا لما عم شوف بعيونهم خوف هم يعني صرت بقى أنا ما عم فكر بحالي أنا أو أنه شو رح شو ما كان يصير معي بس ما شوف ماما وبابا هيك الله يخليلي ياهن يعني فعلاً الحمد لله رب العالمين بعد ما مر شي أسبوع لحتى طلعت النتائج كلها الحمد لله بفضل الله أنه طلع مو منتشر بس بثدي واحد بس بقى فتنا بمرحلة أنه نحنا شو لازم نعمل يلي هل هون نضل ولا نسافر ولا كم دكتور شفنا لحتى طلع القرار شي أنه منعمل لأ منشيل قسم من الثدي ومنفوت كيماوي شي لأ أنه منشيله كاملاً فهي كانت هي الفترة حوالي شهر صعبة جداً لبينما أخذنا القرار هون أنا بتقليلي هلق شو كانت مشاعرك بهي الفترة كنت رامية كل شي على بابا وأنا مثل ما بيقولوا أنه خلص يعني صرت دعاء أنه الله سبحانه وتعالى بعتلي هذا المرض ما في غيره حيطلع هذا المرض مني إذا الله كاتبلي أتعافى رح أتعافى فأنا ليش لحتى وجع راسي بهذا الشي وفعلاً بابا هو اللي صار عم بيشوف المواضيع كلها يعني لحتى ما طلع قرار أنه لأ لازم نستأصل الثدي كاملاً بجراحة وفعلاً طبعاً خلال العملية كلها لازم بالعملية يبين معن هل هو لازم نكمل علاج بكيماوي وهيك ولا لأ كمان لبينما خلصت العملية وهنن أهلي كمان على أعصابن لبينما عرفوا الحمد لله رب العالمين أنه طلع ما بيحتاج يعني فهي هي كانت الفترة لحديت ما عملنا العملية بعد العملية بقى الcheck up كل فترة كل يعني لازم كل 6 شهور تصوير MRI Mammo يعني هي ما بتخلص يعني هي كلما كلما بيكون في فحص كلما بيكون في stress

مها طيب فريدة بدي تحكيلي كمان عن شعورك الداخلي تجاه نفسك أنت قلتي أنه كنت مشغولة أكثر على مشاعر الوالد والوالدة بس هلق أنا فهمت منك من حديثك أنه كونه هن يعني داخليين أو الوالد داخل بالمجال طبي فكان قوي وساندك بالمعنى الحقيقي يعني وعم بساعدك بخياراتك الطبية

فريدة طبعاً يعني القرارات الطبية إي مو الخيارات القرارات لأنه هو اللي كان يأخذ القرار بصراحة يعني أنه شو أعمل

مها بحالتك هون يمكن شوي القدر والحظ ساندك أنه في جنبك حدا داخل بالمجال الطبي وساعدك أكيد أنت صادفت خلال هالسنوات سيدات تانيات يمكن ما عرفوا أو عرفوا متأخر وكانوا محتارين يتجهوا للاستئصال أو يتجهوا لالكيماوي كيف ممكن الوحدة عنجد تعمل سيطرة على مشاعرها بهيك خيارات

فريدة أول شي بدها تسلم أول شي تسليم أنه هذا المرض إيجا وإيجا يعني في ناس بتضل بتنكر أنه لأ أنا مو هيك وما يعني عرفتي كيف يعني ما بتتقبلها أول شي لازم تتقبل أنه هي إيجاها هذا المرض هي أول شي لأنه حتضيع وقت كثير يعني أنه ليش أنا ليش أنا أكيد أنا صارت معي يعني أنا مرة كنت ماشية بالمول وعم شوف الناس مع ولادها وهيك قول طب لأنه نحن عنا أنه هاد المرض معناته خلص خلصت حياتك عرفتي فقول طب أنا ليش ابني ينحرم مني يعني بتحسي أنك صرت لأ أنا أنه لأ ما بصير هيك فكر ما بصير قول أنه ليش هنن أولادهم يعني عرفتي بتحسي بيجي هذا الشعور الضعف هون بقى اللي حواليها المفروض هي يعني أنا مثلاً زوجي كمان كان طبعاً يعني الداعم الأول لإلي يعني نحن كنا عم نحكي بابا وماما طبعاً وبابا بالمجال الطبي بس زوجي كمان يعني متحمل النفسيات كلها والدعم كله يعني كان يترك إذا مثلاً أنا عم بحكي بالتلفون حاسس صوتي هاه يترك الشغل يكون عندي قومي نروح عالمكان الفلاني على أي شي بس إنه نطلع من هذا الجو لازم يكون في حدا قوي بالعيلة يعني بحال هذا الضعف مو معقول يعني العيلة كلها تصير عم يعني

مها تعبانة نفسياً

فريدة وخايفة وهيك لازم يكون في أشخاص هنن اللي يعطوا القوة هنن يلي يدعموا بأي طريقةٍ كانت يعني كل واحد بيعرف أنه هذا الإنسان شو الدعم اللي بحاجة له ممكن يكون معنوي ممكن يكون مشوار ممكن يكون رفقات

مها حكي دردشة 

فريدة بالضبط كل واحد فهون بقى الشخص اللي بده يدعم يعرف كيف بده يدعم غير الرفقات طبعاً يعني هي فترة بتحسي عنجد بتعرفي أنه في كثير ناس بتحبك فيها طول ما نحن مشغولين وهيك عادي أنه رفقات وهيك بس لما بشوفوك هيك عنجد بتتعرفي على الناس بطريقة تانية تماماً بتشوفي شو أنه هنن محتارين شو بدم يقدموا

مها كنت عم بقرأ عن الاستئصال اليوم وللأسف يعني الناس مو كلها بتعرف أنه الاستئصال أنواع كمان لأنه بس نسمع كلمة استئصال أنه خلص بيتبادر للذهن أنه بتر هذا العضو بالكامل وبيأثر على نفسية المرأة لأنه هو بعبر عن هويته الأنثوية وبيترافق معه عوارض تانية فإذا ممكن بس من من خبرتك أو من تجربتك واطلاعك تخبرينا عن أنه إذا في نساء مثلاً متخوفين من الاستئصال شو في معلومات ممكن تريحهم

فريدة هلق حالياً صار في الـReconstruction دغري التجميلي بصير بنفس وقت العملية يعني ما بتشعر أنه هو راح مو موجود عرفتي هون يعني هي كمان فترة أنك تاخدي القرار شو بدك تعملي إنك هل استئصال وبس وبعدين نعمل الترميم مثلاً ولا لأ بنفس العملية ولا كمان كله بياخد فهو يعني هو هذا الصح أنو هي بنفس العملية يصير الـReconstruction طبعاً في حالات ما بصير لأنه بكون في عندهن علاجات تانية ما بيقدروا يعملوها بس هو ما بعرف يعني أنا كيف بدي أوصفها هي مانها سهلة هي يعني هي خطوة مانها سهلة أبداً بس لما الوحدة بتفكر أنه طب هوي هاد يلي رح يخلصها من شي أكبر هو هاد اللي رح ممكن يخليها لولادها يعني عرفتي لعيلتها للناس اللي بحبوها لهي لسة شو بدها تعمل بحياتها فحيكون هاد جزء من هدول الشغلات بس مو كل شي يعني ما خلصت الحياة هون أنا ما بعرف يعني هي قرار صعب بس الوحدة بدها تكون قوية هو كله بده قوة هذا المرض كله بدو قوة

مها تماماً

فريدة هيك فيعني بده الواحد يعرف كيف بدو يقوى بحاله وكيف

مها بلحظات الضعف اللي مرت عليكي يعني الإنسان أكيد ما بيقدر محافظ على نفس السوية من القوة والثبات كيف كنتِ تقوي حالك شو كنتِ تعملي

فريدة ما أقعد لحالي أول شي مثل ما قلتلك بعدين الدعاء أكتر شي يعني أنا كنت يعني هي الفترة بتحسي هيك الله بيبعتلنا شغلات حتى نرجع لالله أكتر لنحس أنه إي لأ أن الله معي لما الوحدة خلاص الله معي معناته أنا قويت فعلياً يعني هي بس لنعرف نوصل لهيك كمان بياخد منا لنحس بأنه إي نحن هلق قربنا من الله والله عم يسمع شو بدنا كمان بدها كتير هلق أنتِ عم تقليلي على فترة مرقت أنا ما كتير بفكر بسلبياتها عنجد أنا دائماً بفكر بالإيجابيات اللي طلعت منها لأنه أنا بعتبر أنه هي كانت فترة بحياتي طلعت منها بكتير إيجابيات علاقتي بالناس التانيين مثل ما قلتلك كيف شوف محبتهم يعني مواقف لهلق ما بنساها من كتير أشخاص كيف كانوا عم يدعموني وكيف عم يدعموا ماما لأنه كمان ماما بدها دعم يعني الإم بدها دعم الأولاد بدهم دعم يعني أنا الحمد لله أخواتي كانوا دائماً معي لأنه أنا ابني صغير تركته يعني لما عرفت المرض كان عمره أشهر فأنا كنت ماني فاضيتله أبداً هذه الفترة ما فيني أبداً يعني ما كنت متعرفة عليه ولا شوفه فترة طويلة ما شوفه فكانوا أخواتي يعني الله يخليلي ياهم هنن خلاص مستلمينه كاملاً فوجود هذا الدعم بساعد أني أنا خلص ماني أكله همه لإبني شو عم بيصير معه شو عم بساوي شو عم يعمل أنا مأمنة أنه بالضبط بأيدي أمينة يعني كأنه معي مع أخواتي يعني الله يخليلي ياهم يعني هي العيلة العيلة والرفقات هنن اللي بقوو يعني ما كنت ضل لحالي ما حاول إني أنا فوت بهذا الـMood كتير

مها طيب طبياً هلق صار مارق حوالي 9 سنوات من بعد العملية إذا بتخبرينا هيك يعني بالتدريج كيف الوضع الطبي وحالياً كيف الوضع كمان

فريدة تمام هلق المشكلة بيجيكي كتير آراء وأفكار طيب ليش ما عملتي عملية استئصال للجهة التانية بركي رجع انتقل مثل ما إجا لهون ممكن يجي لهون فبتصيري صح ليش طب ما أنا فتت عالعمليات وفتت ليش ما عملت هيك لأ هاد بضل هذا السؤال دائماً براسي لأنه طول ما يعني برجع بقول طب ما كنت خلصت من كل هالفحوصات يلي أنا خايفة أنه هو يرجع كل فحص تطلع شغلة منقول بقولولي لأ حنرجع نفحص بعد 3 شهور حنرجع نفحص بعد 6 شهور لنتأكد منها لن يعني يعني ما بتحسي أنه خلص خالص الموضوع لأ لو أنا ما حكيت فيه بس شعوري كل ما بيكون عندي فحص بكون ناطرة يعني عم بتطلع على عيون الدكتورة بالضبط وهي عم تفحص شو شو بدها تقول بكون متوقعة شي دائماً عرفتي يعني ما أنه خلصت لأ دائماً عندي هاد الهاجس أنه ممكن ليش لأ يعني لأنه صارت فالـRisk بكون عالي أنه يرجع مرة تانية فكرمال هيك لازم كل 6 شهور فحص هلق وقتها قالولي إنه بس أول 5 سنين بس لأ لأنه كل مرة بيطلع شي بقولوا لأنه أي شي بيطلع بالوضع الطبيعي عادي ممكن يكون Fat ممكن يكون أي شي بس بحالتي بحالة اللي عندهم هذا الـRisk دغري بكون Alarm عرفتي أنه لأ لازم نحن نتابعه فبتصير كتير بضل الواحد هيك يعني

مها قديش هالوضع أثر على خياراتك المهنية والاجتماعية وبشكل عام يعني

فريدة ولا شي ولا شي هلق مهنياً لأنه أنا كنت بفترتها بما أنه كنت مولدة وحامل وعم رضع وهيك فما كنت عم بشتغل أصلاً بهي الفترة فما أثر علي مهنياً يعني مو مثلاً كنت عم بشتغل بشغل واضطريت أتركه لإتعالج أو شي لأ اجتماعياً ما أثر أبداً بالعكس قلتلك كان فيه إيجابيات كتير يعني

مها تمام خلال هال9 سنوات كلها هيك شو أصعب موقف هيك أو لحظة هيك عشتيها

فريدة لما منكون قاعدين والناس بقولوا هداك المرض يعني لهلق في ناس ما بتقول عنه سرطان بتقول يي هداك المرض فلانة طلع معها هداك المرض منسمعها كتير كتير بتضايق

مها ليش

فريدة أنه ما بحب هي الكلمة ما بعرف ليش

مها شو بتحبي يعني

فريدة خلص مثل ما هو يا اسمه سرطان الثدي سرطان خلص هو هاد مرض يعني عرفتي أبداً ما بحبها كلمة هداك المرض وخصوصاً لما بكون قاعدة مع ناس ما بيعرفوا مثلاً أنه أنا هيك والله يا حرام فلانة هيك بحس طب لأ مو يا حرام بالعكس أنتوا دعولها بجوز تتعافى يعني الناس لسة عندها هيك بخافوا يحكوا بهذا الموضوع

مها صح

فريدة كتير بقابل ناس هيك مرات بكونوا غرب ما خرج صححلهم معلوماتهم وهيك بس أنا بتضايق ما بحبها أبداً هي الكلمة أو أنه يي يا حرام أنه خلص صار معها هيك أي هذا الشي بيزعجني

مها بحكم تجربتك ومن بعد العلاج جربتي تفوتي بمبادرات مجتمعية خاصة بالتوعية بالفحص المبكر أو الحديث عن التجربة لنساء أخريات أو هيك شي

فريدة هلق نحنا بشهر October بتعرفي فدائماً بصير في Events كتير فبيجيني دعوات أنه بهيك Eventبتحكي إي ما بقول لأ بحب أنه نعرف الناس أنه هو مرض وفينا نعالجه بحال بين بكير فلا نضل خايفين منه وهربانين منه يعني في ناس بتقلك أنا لأ ما بدي أفحص بلا ما اتفاجأ خليني أموري ماشية بلا ما أتفاجأ ويطلعلي شي لأ فحصي روحي وفحصي وشوفي وإن شاء الله ما بيطلع معك شي وبحال الله لا يقدر طلع شي لحقي تعالجي هو مرض وفي فيكي تقوي عليه وفيكي تتعالجي منه ما تهربي يعني قرار الهروب كتير صعب وكتير غلط Sorry يعني كتير غلط قرار الهروب فإي لأ ما عندي مشكلة أبداً أني أنا روح أحكي وروح أنصح الكل أنهم يروحوا إيه

مها حلو بالنسبة إلي يعني أنا هيك سألتك كل الأسئلة اللي متعلقة بتجربتك صفي إذا هيك عندك شي أنتِ بتحبي تقوليه للنساء بشكل عام وبخصوص سرطان الثدي بشكل خاص كمان

فريدة أنه يهتموا بحالهم يحبوا حالهم يكونوا قواية أنا بحس حالي أنه أنا قويت بهي الشغلة شخصيتي صارت أقوى الوحدة سبحان الله ما بقولوا بتمري بتجارب بتقوي فهي هي من التجارب اللي خلتني أقوى فإي لازم نحب حالنا نحن نهتم بحالنا بصحتنا ما نهمل حالنا ما نقول كرمال حدا منهمل حالنا كرمال لأ أنتِ أولاً يعني أنتِ قبل الناس كلها Ok منحب الناس كلهم وعيلتنا بس نحن موجودين أنا موجودة أنا لازم أهتم بحالي لازم أعمل شي لإلي أنا يعني هي أهم شي

مها فريدة شكراً كتير لإلك على وقتك وعلى حضورك وعلى يعني شفافيتك بمشاركة تجربتك الملهمة وإن شاء لله دائماً بصحة وعافية أنتِ وكل أحبابك

فريدة الله يسلمك يا رب شكراً لإلك

مها انتظرونا الأسبوع القادم بحلقة جديدة ومن هلق لوقتها روحوا اسمعوا الحلقات السابقة في موقعنا أخبار الآن دوت نت أو عبر متابعتنا في تطبيقات البودكاست المختلفة وإذا كنتم عم تحضرونا في يوتيوب تركولنا بطريقكم Like وShare وٍSubscribe ليوصلكم كلشي جديد منا أنا مها فطوم وهذا Podcast صارت معي