من يتحكم بالآخر: أنا بالأكل أم الأكل بي؟

نص الحلقة :

مها مش الأكل اللي بيتحكم فيني أنا اللي بقرر كم ومتى رح يدخل على جسمي هي قاعدة فوزي الذهبية يلي خلته يخسر خمسين كيلو غرام وزن زائد لما كان عمره 35 سنة

فوزي خبطت بإمرأة بالغلط طبعاً لأنه ما قدرتش أسيطرة على السباحة تبعتي بتقول مين هادا فرخ الفيل اللي فات فيي كان نفسي حدا هيك يقولي تعال تعال أنا أنا أنا خلاص عندي الموضوع تعال بساعدك

مها فوزي السعيد مؤسس فريق وقناة فوزي موزي وتوتي الترفيهيه للأطفال ضيفنا في بودكاست صارت معي ضمن سلسلة أجساد تتحدى وهي سلسلة منقدملكم من خلالها تجارب أشخاص عانوا من ثقل الوزن والسمنة وقرروا بجرأة يغيروا مسار حياتهم لتصير أكثر خفة ولياقة فوزي بخبرنا أسباب السمنة وعدم اهتمامه بالبداية وبخبرنا أيضاً 3 مواقف أساسية كانت السبب الرئيسي بهذا التغيير الكبير فوزي السعيد أهلا وسهلا فيك

فوزي hi مرحبا

مها من حسن حظنا أنك جيت زيارة على دبي لنسجل الحلقة هون باستديو بودكاست أخبار الآن

فوزي إلي الشرف والله

مها أهلاً فيك فوزي بدايةً حابة أعرف كيف وصل فيك الحال لبعمر 35 سنة تقريباً إنه يوصل وزنك 137 أو 140 تقريباً يعني شو السبب الرئيسي برأيك 

فوزي وسؤالك كتير كتير عميق بعرفش إذا بقدر ألخصه بس بقدر أقول إنه بالنسبة لإلي كان الشيء الوحيد اللي كان أواجهه أو ألاقيه وأنا فرحان وأنا زعلان وأنا غضبان هو الأكل فدائماً الأكل كان مفر بالنسبة لإلي هو مفر سهل أي معضلة بحياتك بتواجهها أي مناسبة حلوة أي حزن أكل أكل أكل أكل أكل فدائماً كنت ألاقي المحل هذا اللي خلص بقعد هيك إذا جاي عبالي أدلع حالي يلا بقى باكلي وجبة إذا عبالي هيك أحتفل بنروح مطعم تقيل بيجي عبالي هيك يعني في مناسبة حلوة مع العيلة يالله نروح على مطعم إسى نزل صحون وسلطات إلى آخره وهيك فدائماً كان الأكل فيه إله علاقة مباشر مع حياتي 

مها شو السبب ليش عم ترتبط مشاعر الفرح والزعل بالأكل 

فوزي بدنا نرجع شوي صغيرة كتير سنين للوراء أنا إجيت من عائلة مع أوضاع إقتصادية مش كتير منيحة أمه وأبوه اللي كانوا دائماً يشتغلوا شغل كتير صعب ووضعنا المادي ما كانش يسمح وما كانش يسمح بكتير أشياء فأنا بتذكر دائماً أمي يعني دائماً لما عشانها بتشتغل كتير شغل كتير صعب فدائماً كان بالنسبة لإلها أنه لما تكون قاعدة معطلة مثلاً كانت يوم أحد مثلاً قاعدة في الشغل مثلاً فكنا كانت تاخدنا مثلاً لمطعم دائماً هيك دائماً مثلاً بالليل تروح من الشغل بالليل فجأة تطبخ الساعة 11 بالليل يطلع صحن رز ولبن وتصير تاكل بالليل يعني المفروض كون صرت نايم بس ساعات غير إعتيادية فدائماً كان فدائماً كان الشيء الوحيد اللي من واحد من الأشياء اللي كان مفرحتنا بهالبيت هو أنه الأم والأب ياخدونا على مطعم أو أكل أو أي شيء إله علاقة بالأكل فصفى أنه أخذت هذه العادة معي لما كبرت وصرت أترجم كل شيء بالمشاعر اللي بمرقها أترجمه مع أي شيء اللي فيه وبالآخر أصفي على سفرة أكل

مها Ok

فوزي فلأنه الأكل كان يعطي شعور من الفرح شعور من الانبساط بشكل فوري يعني فأنت ok متضايق أو أنت مافيش عندك وقت لسى مثلاً تسافر أو مافيش معك مصاري تسافر فيللا مطعم أو رغيف فلافل أو يللا كنافه أو فهي دقيقتين تاكل وبتنبسط بس هذا الشعور بيمسك لفترة زمنية كتير قصيرة فأنا أخذته معي وظل معي ولهذا السبب أنا أو تقول واحد أن الأسباب الرئيسة اللي أنا وصلت لجيل بعد ما تجوزت وعندي بنات إلى آخره فأنا 137 كيلو

مها فوزي أنت صار ازدياد الوزن عندك بالتدريج أو لأ من يعني ذاكرتك عن شكل جسمك من الطفولة إلى المراهق أنه لأ أنت شخص بدين 

فوزي يعني بالآخر كل سنة بتمرق كل فترة بتمرق أنت بتزيد أكتر 

مها Ok

فوزي فصح ممكن أنا ما كنت 137 بس أنا بتذكر حالي دائماً كنت 120 و 122 بس دائماً أنا بنساش نفسي وأنا ناصح دائماً كنت ناصح بس بتعرفي لما بتذكر بطفولتي وبجيل المراهقة وأنا ناصح يعني بفترة كتير مأساوية يعني بصراحة

مها ليش

فوزي بتعرفي هاي يعني أنا اليوم عشان ضعفت فهمت قديش كنت بتعرفي هادا كيس الكيك بوكس لما بصير تضربوا فيه بوكسات هيك ويطيحوا فيه فبتفهم قديش كنت كان مدى تسميع الحكي ومدى الإذلال ومدى البهدلة دائماً كانت موجوده صح هنن دائماً بتقصوا أو دائماً بيمزحوا بس هنن ولا مرة بيمزحوا هنن بيؤذوك يعني حتى إن كان العيلة دائماً كانوا يقولوا مثلاً يحكوا مع أهلي مثلاً يعني خلي فوزي يخفف شوي أكل عم ينصح كيف أنا اسمع الحكي هذا أو خلي فوزي ينتبه على حاله إنه خلاص يعني يتطلع شو بصير فيه بس يكبر دائماً هيك دائماً بهادل بهادل مش رح أنسى وحدة من اللحظات اللي كثير بتأثر فيي هي مؤسفة جداً يعني أنه هاي كلمة فرخ فيل بتعرفي هيك بتروح مع العيلة على بركة وتكون قاعد على الفلوت هيك أو خبط بإمرأة بالغلط طبعاً لأنه مقدرتش أسيطر على السباحة تبعتي فبتقول مين هذا فرخ الفيل اللي فات فيي فقديش أنا اليوم قوي وهيك بتذكر دائماً بتضايقني لأنه بفهم قديش كانوا الناس بتذل فيي أو مثلاً مرة من المرات مثلاً بجيل المراهقة خلصت السنة الدراسية وراحوا ولاد صفي وبنات صفي على بركة السباحة أو على البحر ما بتذكر بالضبط إيش كان لأ بالبحر فنحن نسبح هيك وكل لابسين أواعي البحر فايتين يتسبحوا إلا أنا واقف برا هيك ونفسي أتسبح بس بقدرش يعني بستحي وتعال ومالك وفوت وهيك لا عندي وجع دنين بفوت مي عديني فديني بتخرب أو عندي بشرتي إذا بيجي عليها مية الملح كل كان جاي عبالي أتسبح فكتير مأساوية وصعب بصراحة وطبعاً بقدر أقلك كل الوقت موضوع الوزن الزائد تبعي هو كيف بقولوا موضوع الساعة عند العيلة عند كل الناس اللي حواليي دائماً موضوع الساعة دائماً بسموها عنا ملطشة 

مها Ok لكن والدك ووالدتك كيف تعاطوا مع الموضوع كونن هم الدائرة الأقرب 

فوزي تطلعي بقدر أحكي شوي أبوي كان بهذا الموضوع كان كان دائماً يضل يقولي فوزي هدي هدي شوي شوي كول شوي شوي يا زلمة كول شوي شوي وأمي كمان عانت من السمنة الزائدة ودائماً كانت تقولي كانت تقولي دائماً يمه وحياتك يمه الله يرضى عليك يمه ما تعانيش زيي بديش ياك تعاني زيي بالنصاحة بديش ياك تكون زيي فدائماً كان عندها هذا اللي هيك الطلب هذا اللي بعدين بس بلشت أنزل وهيك صارت تقولي يمه وقف وقف أشوف يمه وقف خليني أتغزل فيك وقف قبالي أتغزل كانت توقف تتغزل فيي هيك تطلع عليي هيك وأحس وحدة يعني نازلة من الفضاء عم تقول waw فوزي محلاك فكانت دائماً عندها هذه اللحظات أنه يعني literally بدي أتغزل فيك فبتذكر أنه بس بتعرفي مها مع كل الطفولة والمراهقة والجيل اللي أنا موجود فيه قديه مرقت صعوبات وقديه مرقت إذلال وإهانات وإلى آخره قليل جداً قليل قليل إن مع أول صفر فاصلة صفر صفر واحد بالمئة شخص اللي إجا قلي فوزي أعطيني إيدك أساعدك أعطيني إيدك أمشي معك أعطيني إيدك أدلك أنا فاهمك شو عم تمرق أنا عارف شو عم تمرق أنا بعرف أنه صعب 

مها كان فقط انتقاد 

فوزي كان نفسي حدا هيك يقولي تعال تعال أنا أنا أنا خلص عندي الموضوع تعال بساعدك هسا بحكي بعدين مين ساعدني بس أنه يعني هو هدا البني آدم إجى بس بقولك أنه بكل هي السنين كان نفسي حدا اللي يقولي والله فوزي أنا فاهم عليك شو عم تمرق 

مها قديش وضعك هذا البدانة اللي كنت فيها أثر على خياراتك المهنية والعاطفية 

فوزي هو يعني سؤالين صعبين هدول خلينا بالمهنية طبعاً مش كتير ناس يعني كتير ناس بتعرف بس في ناس بتعرفش أنه أنا بأدي دور شخصية فوزي موزي من وصاحب قناة فوزي موزي وتوتي باليوتيوب وأنا أعشق عالم الأطفال وأعشق الكوميديا من أنا وصغير دائماً كان بالنسبة إلي محل جداً حلو اللي أعطاني هيك نوع من shield نوع من من حدا بيحميك أنه يعني أنت لم أنت بتبسطنا بتضحكنا إحنا إسا فش عنا نقد عليك

مها Ok

فوزي فش عنا إحنا مكيفين عليك أسى مبسوطين منك مش فاضيين ننتقدك لأنه إحنا أسى والله شايفينك قدامنا مكيفين نشوفك فwaw أنت أسى عم تبسطنا فهذا المحل كان محل كتير مريح وهذا واحد من الأسباب ليش أنا أعشق هذه الشخصية أعشق شخصية فوزي موزي وتوتي وبحب ألعب دورها وسنين صرلي بهذا المحل ودائماً هيك الشخصية الناصحة هيك دائماً هيك بقول يعني بعرفش ليه بيقولوا أنه دائماً اللي هو ناصح بكون أكثر بضحك أو أكتر أكتر خفيف دمه خفيف بعرفش ليه لزق فينا هذه المقولة 

مها صورة نمطية 

فوزي فما ما بعرف مع أنه بقدر الإنسان يكون مضحك كمان هو كمان نحيف مش شرط يكون فهذا المحل من الناحية المهنية وبحب كمان هيك أحكي عن يعني عن نقاط التحول أنا صار معي 3 نقاط تحول اللي فيها عنجد أنا بلشت هذا المحل بلشت التغيير العميق بدي أحكي بس طبعاً اللي متابعني بعرف المدربة تبعتي اللي هي اسمها بولينا اللي هي توجهتلي قبل تقريباً 3 سنين ونص قالتلي فوزي شو رأيك أدربك وأنظملك أكلك وأساعدك وهيك قلتلها يا بولينا ماليش خلاق حلي عني أنا ما عندي وقت وأنتي بتمرني صعب ولسا بتخليني ألهت وهيك بديش أتمرن قالتلي اسمع أنا بعطيك المقترح وأنت وأنت بدك تعال كان فترة الكورونا أول الكورونا فهذه النقطة أسى منحطها على جنب وبرجعلها والنقاط التحول الثلاثة اللي خلوني عنجد أعطوني هذه الشرارة أنه أنه التغيير أبلش واحد الذي هو بفترة الكورونا أمي كانت مريضة بالسرطان وحتى بمرضها كانت دائماً تقول يمه وحياتك تتغلبش زيي تتغلبش دائماً صوتها بعقلي دائماً تقلي دائماً كانت توصيني تقولي يعني ما تعانيش زي ما أنا عانيت بالنصاحة وحتى حتى حتى اكتشفت تخيلي اكتشفت أنه ما قالتليش أمي اكتشفت أنه أمي كانت عاملة عملية قص معدة من من قد ما هي مستحية مني ما قالتليش خبت عني كل هذه السنين مستحية تقولي أنا عملت قص معدة بالرغم هي ضلت ضلت ناصحة وما ما ساعدتها العملية فانصدمت لما عرفت أنه هي عاملة عملية وعرفت بس لم مرضت لأنه أخدتها على المستشفى وسألوها أسئلة هيك عن شوية خلفية عن المرض وقالتلي إنه أنا عاملة عملية فأنا انصدمت

مها ليش برأيك خبت عنك يعني شو ليش في خجل أنه تخبرك هيك شي 

فوزي انه بدهاش تفرجيني أنه أنا فشلت بأنه ما نجحتش أضعف

مها Ok

فوزي مش حابة تفرجيني فشلها فخبت عني أنه يعني أنا يعني أنا أنا عم بحاول قلك أضعف وأنا مش قادرة أضعف بس ضلت ضلت براسي أنه هي دائماً كانت توصيني هذا الموضوع والشغلة التانية وهي بناتي نحنا بالكورونا هيك كنا قاعدين بالبيت كتير واحدة من الأيام رحت جبت هيك شوية همبرغر وبيتزا للبنات وقعدنا ناكل على الطاولة أنا وبناتي تالين وجوليا وإجاني تليفون فأنا وقفت أكل رحت أرد التليفون وبناتي كملوا ياكلوا وأنا بلف وأنا عم أحكي بالتلفون هيك بلف راسي بتطلع عليهن كملوا ياكلوا لسة أنا هون قلت Ok فوزي بدك تخرب حياتك فهمنا 137 كيلو تمام أما أخرب حياة بناتي لأ كتير هي فيكي تقولي انتبهتلها لهذه اللحظة أنه أنا بإيداي عم فوت دمار عبيتي والشغلة التالتة طبعاً تابعني بال social media مرة بحط صور لزوجتي وشريكة حياتي فاتن

مها اسم على مسمى

فوزي yes طبعاً وشو بقولوا nice looking و great looking woman هو امرأة كتير جميلة بالكورونا حسيت بالرغم من هي ولا قالتلي حسيت أنه أنه كمان هي عم بعرفش بعرفش إذا عم بتطلعلي الكرت الأحمر بس حسيت أنه هي عم تقولي أنا خلص

مها شو

فوزي أنه يعني أنه خلص أنه 

مها لازم تتغير 

فوزي أنه آه خلص أنا Ok تمام أنا معك

مها بس 

فوزي 18 سنة 

مها Ok 

فوزي خلص طفح الكيل يعني 

مها يعني هي برأيها أنه أنا تقبلتك وتعرفت عليك وتزوجنا وأنت 

فوزي وهي قبلنتني

مها وزن

فوزي هي قبلنتني ولكن شعرت هيك مع مع مع كل ثلاثة عوامل هدول مع بعض هيك حسيت أنه أنه إذا أنا ما تغيرت أنا ممكن أخسرها ممكن أخسرها وممكن لأ بس شعرت إجاني هذا الشعور بالرغم من هي ولا قالتلي فأنا هون شو سويت رجعت حكيت مع بولينا وقلتلا المقترح بعده موجود قالتلي طبعاً the rest is history فبلشت أتمرن وبلشت أنظم أكلي وهو بلش الحرب وقلت وقتها أنا يا خلصت تدمرت يا بربح يا بخسر وأنا اسمي فوزي واللي ما بيعرفش فوزي هو فوز فوزي فقلت أنا مجبور أربح هون بلشت مها بحب أقول شغلة لصالحك أنا بحبش اللقاءات

مها حلو من حظي

فوزي بحبش اللقاءات وبحبش مع هذا أنا حاسس شعور كتير مهم أنه بصفتي مين أنا بمجال الأطفال وبصفتي مين أنا كأب كثير أطفال بتحبه كتير مراهقين بتحبه كتير أهل بتحبه أنا هون عشان حابب أثر ورح أحكي عنه لاحقاً عندي مشروع للتأثير عن عن نمط حياتنا كيف نحن ممكن نغير كيف ممكن نتحسن من ناحية أكل من ناحية الحياة بقدر أقولك أنه أنه فوزي السعيد كان شايف باب واحد بالحياة اللي هو باب الأكل فجأة انفتح معاه بواب بواب صرت أشوف أشياء مختلفة بحياتي ما شفتها بحياتي ما حسيتها بتعرفي شو يعني يعني أنا أروح على على على ملاهي water parkمع بناتي وألعب معهن أسبقهن على السحاسيل أنا أروح عدكانة الأواعي فجأة كل دكانة الأواعي بتفوت علي صرت أروح مع مرتي قلتلها فاتن تعالي تعالي مشان الله مش عارف شو أنقي كله حلو فجأة بطل الأشياء اللي بتبسطني وبتفرحني في إلها علاقة بالأكل فصلت موضوع الأكل عن الفرح حزن عن الأكل فصلته فصل تام وبتعرفي كيف الواحد لما بفوت بهذا المحل زي الواحد اللي نفسه بنوع سيارة معينة بده يشتريها فجأة بصير يشوف بالشارع بصير يشوف نفس السيارة اللي هو عم بدور عليها وهون أنا لم فتت بهذا الراس صرت ألاقي بس أكل صحي وصرت ألاقي بس طلعات وشمات هوى وصرت أبتعد عن عن عن المناسبات هذه اللي فيها كله أكل المناسبات اللي هي بس عنوانها أكل صرت أشوف بس كل بس الأشياء اللي امتنعت عنها كل حياتي ما كنتش أشوفها ما كنتش فاهم أنه أنا عم بعيش حياة بمنظور واحد كل هذه السنين عمر أنا خسرت خسرت كتير متع من الحياة اللي كنت مفكرها أنه بس بصحن كنافة أو صحن طبق بيتزا هو يفرحني وهذا أكبر غلط فالحياة تغيرت وبقدر أقولك أنه بقدر أقولك أنه صرت أشوف أشياء تانية صرت أنتبه لشغلات تانية وحدة من الأشياء اللي صرت أنتبهلها وعم بتضايقني اليوم كتير بصراحة هو كميات الأكل اللي منستهلكها نحن منستهلك فوق طاقتنا بس نحن ما منستهلك أو بديش أحكي عن الناس بدي أحكي عن حالي أنا كنت استهلك كميات لأنه أنا كنت أعبي فراغ فراغ بالمشاعر فراغ بأنه أنا زهقان أنا عطشان أنا مفلس أنا فش عندي شو أعمل فأنا بعبيه بأكل بعبيه بالطلعات بعبيه بسفر بسفرات مفتوحة وبلشت أشوف وأنتبه لكل العادات اللي وصلتني لوين أنا وصلت بلشت أفهم كتير كتير أشياء اللي ما كنتش أفهمها صرت أنتبه للمكونات صرت يعني يعني صرت أنتبه صرت أدور على مأكولات اللي هي مصنوعة من أحادية من مكون واحد مش من عدة مكونات فصرت كتير أنتبه 

مها من لما أخذت القرار بسنة 2020 لليوم صار قاطع تقريباً 3 سنين نزلت خلالهم أكثر من 40 كيلو 

فوزي تقريباً 50 

مها 50 كيلو Ok لكن هدول سنوات أيام أكيد الإنسان يقدر يضل على نفس السوية من الطاقة النفسية وال mood والإيجابية أكيد مريت فيهم بتقلبات يعني دائماً لأنه بعد 35 سنة مش سهل كمان الإنسان completly يخلق من جديد أو يغير عادات مترسخة فيه من الطفولة فحابة تخبرني عن التحديات اللي بهالتلت سنين مريت فيها نفسياً أولاً وثانياً شو كانت المحفزات اليومية اللي كنت تتبعها في كل يوم كنت تشعر فيه بالإحباط أو بالتراجع 

فوزي أول إشي واحد من الأشياء اللي كان دائماً يحفزني ويشجعني دائماً دائماً دائماً هو أنه أنا كنت دائماً أتخيل صورة فوزي اللي حلمه يكون فيها 

مها Ok

فوزي دائماً كنت أحطها براسي أنا بدي أن أكون هيك أنا بدي أصير هيك وأنا أنام وأنا عم بتمرن وأنا عم باكل وأنا مع العيلة وأنا حاطط الصورة هاي براسي دائماً كنت اهتم ما أغيبهاش عني دائماً موجودة معي ودائماً كنت أشحن نفسي أشحن يعني كنت كتير أحكي مع حالي بعدني لحد اليوم بحكي مع حالي لما برد باجي بصير بدي أوقع بالأكل هيك أو هذا بوقف قبال المراية فوزي وين رايح شو عم تعمل وقف انتبه كتير كتير بتعرفي شو يعني الواحد يحب حاله أنا هي ما كنتش أفهمها أنا اليوم بحب نفسي اليوم أنا بحب فوزي بحب جسمي بحب بحب مين أنا أنا ما كنتش أعرفها هي يعني فأنا لما بتحب حالك أنت بتحكي مع حالك أنت في عندك مع مين تحكي فاليوم علاقتي بيني وبين نفسي كتير جميلة كتير في علاقة ثقة كتير قوية وأنا كثير بحب أثر وكتير بحب أحكي عن الطرق اللي أنا متبعها وبحب كل الناس تستخدمها وهذا رح يكون هذه الطرق جزء من مشروعي لتوعية وتأثير بالمجتمع على تغيير نمط حياة صحي وبتمنى أنه الناس تستفيد منه أول شي المي المي أنا بعرف كتير ناس بتحبش المي وأنا بحب الأكل وبشرب المي وأسكر منخاري وإلى آخره محبش المي بس أنا فهمت أن المي هي مركب كتير أساسي للتغيير لأنه أغلب الحالات اللي نحن فيها جوعانين نحن مش عنجد جوعانين نحن عطشانين بس نحن منترجمها لأكل فدائماً أنا متذكر أنه قالولي أنه 3% من وزنك هو مي فأشرب 3% وخاصة أن بشرب دائماً عندي قبل الأكل دايماً المعدة فاضية لما أنت بتوكل فأنت بتعبي كل المعدة الفاضية هذه أكل فلم تشرب 3 كاسات ماء أنت عبيت نصف الكمية فأنت already من دون ما تقول ريجيم وإلى آخره أنت اختصرت بالأكل هذا واحد وطبعاً مي يعني سوائل وكل المشتقات اثنين واحدة من الأشياء اللي اكتشفت أنه بتأثر على فشل أي على فشل الطرق التي حاول فوزي ينزل فيها الوزن هي أنه أنا كنت دائماً أربط النتيجة مع وقت دائماً كنت بدي أنزل 30 كيلو بثلاثة أشهر بدي أنزل 20 كيلو للعرس بشهر 12 دائماً في وقت فلما كنت دائماً أحط لنفسي وقت هون بلش السباق وبطل تغيير لأن فتت أنت بمرحلة سباق بتصير بتطلع على الميزان حتى وأنت نازل أنت مش مبسوط ليه لأنه أنت حاولت تنزل 20 كيلو بدك تنزل كيلو بالجمعة طب أنت نزلت نص كيلو بالجمعة هون السباق بودي لمرحلة إحباط والإحباط بودي لمرحلة أنه أيش أنه توقف الريجيم وترجع تأكل أكثر لأنك أنت انحرمت واحد من الأشياء اللي ساعدني هو فصل الوقت عن التغيير اذا بدك عنجد تتغير تحطش رقم لوقت أنسى الرقم أنت رح تتغير إذا منحت نفسك وقت كافي Sorryإذا أنت فصلت الوقت عن الرقم إذا أنت بدك فصلت إذا كان بدك عنجد التغيير يكون حقيقي سيبك من الوقت تطلعش عالوقت أنت لازم تتغير ورح تتغير اذا منحت نفسك كتير وقت أنت رح تتغير تالت نقطة واكتشفتها بصراحة ما كنتش أعرفها بس اكتشفتها وهي أنه العدو الأساسي للسمنة الزائدة اللي كانت عند اللي كانت عندي العدو الأساسي اللي كانت عندي أنا هو مش نوعية الأكل هي كميات الأكل فوحدة من الأشياء اللي اللي اكتشفتها أنا أنه أنا بقدر أكول إيش ما بدي بس بالكميات الصح بينما حتى لو أكلت healthy foodبس من كميات كبيرة أنا بطلع بوزن منه فموضوع الكميات هو مصيري جداً أنا ما بخاف آكل أنا باكل كل إشي بس بكميات ودائماً الناس لما بحط عندها social mediaبحط الأنواع الأكل فبتقلي كيف مسموح تاكل وكيف بتاكل هيك بقلهم أنا باكل كل إشي بس أنا بوزن كل إشي وبوزن أنه واحد بيعطيني سيطرة عشان أعرف قديش أكلت وتنين بيعطيني مجال أكل إيش بدي وبحب أحكي كمان على النقطة الأخيرة اللي بتساعد للتغيير وأنا بتأمل أنه أنه السبب واحد من الأسباب الرئيسية اللي ساعدني أنا أتغير هو أنه بحب شو بعمل بحب شو بتمرن بحب الأكل اللي باكله وبحب الحياة اللي عايشها في عنا عندي أنا كانت عادة اللي دائماً دائماً التغيير اللي أعمله هو عبارة عن أكل بحبوش عبارة عن تمارين رياضية بسويها غصب فدغري بتفرط معك فلأ أنا هون بتمرن بعمل شو بحب بختار أنواع الرياضة اللي بحب أسويها بختار أنواع الأكل اللي بحبها وهيك أنا ببطل في عندي 

مها يعني انزعاج

فوزي بالضبط بالضبط لإنه عم بعمل تغيير حقيقي يعني عم بحب شو عم بعمل وموضوع الوزن رح ينزل بس أعطي نفسك الوقت أنه ينزل مش بشهرين مش تلاتة مش أعطيه سنين هذه حياتك بدك تعيشها هيك أعطي حالك وقت يعني واحد مرة شفت واحد بالشارع قلتله يعني مين أهم منك في أحد أهم منك طب أعطي نفسك فش مشكلة 

مها بالحديث عن مين أهم منك في حدا كان كاتب تعليق عندك على هذا الفيديو كاتب لك أنه أهم مني ابني ففي حد تاني رد عليه أصلاً كرمال ابنك لازم تهتم بصحتك لأنه إذا أنت إنسان ما عندك طاقة صحتك بتراجع ما عندك همة للعب عندك ثقل بالوزن كيف أصلاً رح تقدر تستمتع مع ابنك فهذه نقطة كمان جداً مهمة

فوزي طبعاً

مها الواحد يحطها بباله لما يفكر أنه مين أهم أنا ولا ابني

فوزي صح

مها لما نقول أنت الأهم أهم حتى من أطفالك لحتى تكون قادر تكون يعني بكلك بكل كيانك مع أطفالك 

فوزي أنا بعرف إشي واحد أنه لما أنا قوي أنا بقدر أعطي عيلتي أكتر لما أنا ضعيف أنا محدود جداً وأنا هذا اللي اكتشفته اليوم أنا لما بقوم الصبح باكل صح بروح بتمرن أنا عندي قوة أعطي بناتي عيلتي مرتي شغلي كل إشي بس إيش أول إشي أنا أول إشي أنا أقوي فوزي بعدين عشان فوزي يقدر يعطي بس لما فوزي ضعيف بيقدرش حدا فأنا هذه فهمتها بسام كتير ناس بتسألني okبدي بس أنزل بطني من هون وبدي شوي إيداي وبدي وبدي 2 كيلو و5 كيلو رح يفتح معكم باب أوسع من هيك باب بدكم يفتح الباب هذا ولا بس بدكم تطلعوا على الخمسة كيلو القاعدين هون الباب أكبر من هيك وأنا فتح معي باب كتير وسيع شوفي أنا يعني أنا الناس بتعرف متابعتني بال social media وبتشوف قديش أنا بجي يوم مرة بالأسبوعين اللي باكل فيه كل إشي بس أنا هذا اليوم إجى بصراحة بالصدفة ما كنتش ما كنتش أسمع عنه أنه فيه إشي اسمه cheat dayبس بتعرفي أنت لما بتبلش تتغير وبتاكل أنواع أكل معين بتضل عينك هيك زايحة على هدول المأكولات الدسمة فأنا إيش صرت أساوي قلت أنا بطلع الميزان مرة بالأسبوعين بزين حالي طبعاً اليوم مازنتش حالي بس أنه لما كنت أنزل بالوزن كنت أزين حالي قلت لنفسي من أول الطريق قلت بتعرف شو يا فوزي لأنه أنت في هون ببطنك بالون قاعد ينفخ وإذا حرمت حالك هذا البالون بينفخ وإذا فقع البالون رح ترجع على عاداتك السلبية القديمة فبلشت أساوي كل ما أصادف شغله هيك نفسي فيها أسجلها أقولها أنتي أنا راجعلك كمان أسبوعين أنا رح أتلاقى فيكي بس بالوقت المناسب إلي مش إلك وأسجلها وأجي مرة بالأسبوعين عليها أقولها تعالي أبلش من الصبح لليل آكل اللي بنفسي فيه واكتشفت أنه هذه الطريقة زبطت معاي أنا فوزي أنه والله ما أثرت على وزني وخلتني ما أشعرش بالحرمان اللي كلياتنا منحسه لما منبلش ننزل بالوزن والأهم من هيك كانت دائماً تذكرني بفوزي القديم اللي أنا بديش أرجعله هذا cheat day هيك عمل فيي 

مها كيف كان تذكرك يعني

فوزي كنت آكل over هيك وأبطل أقدر أتحرك ومش قادر أنام وبالليل أعرق أقوا لا لا لا لا أنا مس هأرجع لغاد بديش أروح لغاد بديش أروح للمحل اللي عن باكل غصب لأنه بدي أعبي فجوة بحياتي بدي أعبي بدي أفرح نفسي أو بدي أبسط نفسي بأكل وهذا اليوم اللي هو مرة بالأسبوعين أثر جداً أثر علي كثير أنه أنا أستمر وما أرجع لهديك الأيام 

مها بالحديث عن cheat day بعض المختصين سواء مختصي اللياقة البدنية أو مختصي التوصية يقولون أن فكرة cheat day ما منطقية وغير صحيحة هون النقطة بتاخذنا لنركز على مسألة جداً المهم أنه الأنظمة الغذائية متنوعة ومختلفة وتختلف باختلاف بنية الأشخاص يعني مش ضروري اللي بينطبق على فوزي أو اللي نجح مع فوزي ينجح مع غيره صح بتتفق معي بهالكلام 

فوزي أنا دائماً بقولها هاي أنه وكثير بتسألني هل بينفع نعمل cheat day زيك بالضبط أنا بقول اسمعوا هدا البرنامج بيمشي معي أنا ما بعرف إذا رح يظبط معاكم أنتوا بس التغيير اللي اللي صار هو أعمق من أنه أنا آكل الهمبرجر ولا بيتزا هو يعني حياتي كلها تغيرت يعني أنا اليوم أسى بعد ما يخلص البودكاست أنا عارف بالضبط شو بدي أروح أتغدى عارف يعني صرت مسجل إيش بدي أكل ووين وإلى آخره أنا بطلعش من البيت إلا ما أنا أكون عارف كيف نهاري بده يمشي وما بخلي النهار يمشي في فيش عندي أنه مثلاً أنا يعني أنا طلعت الصبح من البيت وفجأة وقعتلي على صحن كنافة هيك فجأة فش إشي يعني بقولك لدرجة حتى لما بطلع مثلاً بسهر مع أصحاب برفع تلفون بقلها معليش خيتا إيش طابخة إيش عاملين اليوم عندكم أكل بتقلي واحد اثنين ثلاثة بشوف أنه مش مناسب لإلي بقلها اسمعي أنا وفاتن رح نيجي بس مش رح ناكل مش رح أكل أنا لأنه أكل مش مناسب لإلي وبديش إحراجات طبعاً هني بس أطلب منهم بديش إحراجات بتزيد الإحراجات فبصفي أنه كل السهرة ولك كول يا زلمة خدلك لقمة يازلمة أنت عاد طلع كيف صار شكلك بينفع تاكل المهم كل الليل وهني طالعين نازلين علي وسط الساعة بس أجي أروح والله فوز فظعت كل احترام طلع طلع ما أحلاه ولك كيف مسكت حالك هيك ما انغريتش وما أكلتش فبالأول تهجموا علي وبعدين بصيروا يصقفولك

مها حلو طيب بس أنا عندي هون نقطتين بحب أسألك عنهم فكرة cheat day كونك أنت عم تسجل بعض الأشياء اللي بتحب تاكلها وبتنتظر ليوم معين تاكلها ممكن حدا يتساءل معناها أنت فوزي ما خلصت تماماً من إدمان هي الأشياء لساتها بنفسك التغيير الحقيقي هو إنك أنت توصل لمرحلة إنك تاكها أثناء أيامك العادية لكن بكميات معتدلة ليش لتنتظر أيام وتحرم حالك منها وتجي توصل ليوم تاكلها بهذه الطريقة المكثفة ممكن حدا يقلك أنه معناتها أنت ما تغيرت جذرياً لسا هي بنفسك هي الأشياء التغيير الحقيقي أنه ما تصير بنفسك 

فوزي بس أنا ما قلتلك أنه مش مكمل عادة cheat day عادة cheat day وقفتها 

مها ok

فوزي لأنه أنا يعني وصلت الوضع أنه صرت ماكل كل أنواع الأكل فبالنسبة إلي صار كله نفس الشي ففش عندي هي الرغبة والشهوة هالقد هيك أنه يعني أكل وجبة معينة

مها تمام

فوزي أنا كنت أستعملها لما كنت أشعر أنه عنجد في مأكولات معينة بحب أكلها اليوم بعد ما دقت كل أنواع الأكل وكل أنواع بأنواع البلدان كلياتها فمش عم بعملها بصراحة الcheat day بطل في إلها حاجة 

مها ok كمان نقطة تانية 

فوزي بس هي قوت الثقة الcheat day قوى الثقة تبعتي أنه آجي وأدخل مأكولات بين أقواس اللي هي مغرية ok أو بتنصح ببرنامجي اليومي العادي أعطتني القوة أنه لما أنا آجي آكل إسى بان كيك ما أكلش وكأنه ماكله أول مرة إنما آكله لأنه بعرف طعمته يعني طعمته شو رح تكون مختلفة نفس الشي ففتحلي مجال أنه أكل نص بان كيك أو ربع بان كيك 

مها ok كمان حديثك الأخير 

فوزي وsorry وأعطاني الثقة أنه ما أخفش من هذه المأكولات لأنه دائماً إحنا خلص لازم لازم ناكلها كلها هيك عشان خلص نرضى فبطلت أخاف منها ما بخاف أشوفها صرت حتى أحاكيها أقولها أنت مش رح توقعيني أنت مش أقوى مني فخف ضنا

مها ok حلوة هي الطريقة 

فوزي طبعاً بطلع فيها بقولها اسمعي أنت مش أقوى مني يا دونات مش رح تخربيني 

مها ok حلوة بحديثك الأخير بياخذنا للسؤال كمان أنه هل يعقل كمان أنا ضل حياتي كلها عم بحسب وعم بحرم حالي من العزايم وبينفعش يعني هيك ما في حل وسط طيب ليش أنا لازم أعمل بحالي هيك لو فرضنا أنا قررت أنحف 

فوزي بس أنا ما عم قولك مين قلك أنه أنا محروم أنا مش محروم أبداً أنا باكل اللي بدي ياه بس أنا أنا مسيطر عالوقت اللي أنا باكل فيه أنا مسيطر وبقرر وأيمت أنا مناسب لإلي ومش إذا عنا مناسبه يللا كول أو إذا أنت التقيت بوجبة لا أنا بقرر وأيمتا فأنا بروح كثير عمناسبات اللي بيكون باني برنامجي من ناحية الأكل أنه أنا بالليل أكل بس أنا الاندفاع هذا بطل عندي منه 

مها تمام

فوزي فأنا مسيطر يعني أنا بقدر اليوم أسى أقعد قبالك تحطيلي عالطاولة هون كل مغريات أقلك اسمعي مها مش رح أكل ولا إشي ولا باكل ولا بتفرق معي ولا كأنه موجود بس هذه المقدرة بالسيطرة أخذت معاي فترة زمنية كتير طويل تأوصلها اللي هي 3 سنين وكمان 3 ونصف فلأنه أنا عملت الcheat day وما بخفش من الأكل ولأجل هذه المرحلة أنا بقدر أقول بالضبط شو بدي آكل إسى يعني مها من قبل الأكل هو اللي كان يسيطر علي فأنت فاهمة كان هو هو يقولي أنت أسى بدك تاكل اليوم لأ اليوم أنا باكل وأيمتا أنا مناسب لإلي بالرغم من إيش في إسى عالطاولة أنا بقرر أنا بختار هي ما كنتش موجودة 

مها ok بدي تسمحلي نوه للمتابعين والمستمعين أنه نحن بحلقاتنا في سلسلة أجساد تتحدى يعني ندعوكم جميعاً إذا كنتوا عم تعانوا من السمنة بداية تاخدوا الخطوات الصحية بأنه تتوجهوا لأطباء تعرفوا شو أسباب السمنة تتخذوا النظام الغذائي المناسب لإلكم القرار لو فرضنا كان جراحي بلكي يعني هذا أنتوا بتقرروا مع أطباءكم مش عم نحاول نقدم أنظمة غذائية أو تجارب للتبني لتبنيها بالمطلق نحن عم نحاول نقدمها بس لحتى تكون بلكي عامل للتساؤل والتحفيز يعني هذا من جهتي إذا أنت بتحب تختم بشي أو أي معلومات بتحب تضيفها لحلقتنا 

فوزي أنا بحب أقول شغلة أنه أنا بحس اليوم أنه لما أنا قدرت أتحدى الأكل وأتغلب على عاداتي وأغيرها أنا ممكن أتحدى أي إشي بالعالم لأنه الرغبة والعادة إذا بتتغير خلص كل شي صار هوين 

مها شكراً كتير 

فوزي شكراً لك وبالنجاح 

مها انتظرونا الأسبوع القادم بحلقة جديدة من هلق لوقتها روحوا اسمعوا الحلقات السابقة في موقعنا أخبار الآن دوت نت أو عبر متابعتنا في تطبيقات البودكاست المختلفة وإذا كنتوا عم تحضروا في يوتيوب تركونا بطريقكم like وshare وsubscribe ليوصلكم كل شي جديد منا أنا مها فطوم وهذا بودكاست صارت معي