محمد عبد الحليم
السيسي: “معانا دولارات” و “منقدرش نعمل أكتر من كدا للأسعار”
- الرئيس المصري: “الناس ماسكه شوية في الدولار وإحنا معانا دولارات برضه”
تحدث الرئيس المصري عبدالفتاح السيسي عن الجدل المثار حول صندوق قناة السويس وغيره من الصناديق التي يتم إنشائها.
وقال السيسي، خلال افتتاح مشروعات جديدة في مجمع الصناعات الكيماوية في محافظة الجيزة، إن أموال هذه الصناديق يتم التعامل معها وفق ضوابط وتخضع لرقابة وتفتيش الأجهزة الرقابية.
وأضاف الرئيس المصري: “بالمناسبة دي الصناديق دي كلها محدش يقدر يصرف منها غير لما يقولي، وأنتوا متعرفونيش في الفلوس”، متابعًا: “الفقير معندوش غير إنه يخلي باله من كل مليم، وأنتوا متعرفوش يعني إيه مليم”.
أزمة الدولارات
وتحدث السيسي، مع الدكتور مصطفي مدبولي، رئيس الوزراء، حول الإفراج عن البضائع والمنتجات الموجودة في الموانئ، قائلاً: “أرجو أن نطلق هذا الأمر بتغطية إعلامية والناس تشوف حجم المواد اللي هتخرج من الموانئ خلال الأسبوعين اللى جايين دول، علشان يبقا الحمد لله أنهينا المشكلة دي “.
وأضاف الرئيس المصري: “عاوز أطمنهم وإحنا لما قولنا ده.. ربنا سبحانه وتعالي وفقنا ننفذ الالتزام.. بنتكلم عن مليارات كتير من الدولارات.. الناس ماسكه شوية في الدولار.. لا بأس.. وإحنا معانا دولارات برضه”.
أزمة الأسعار
وقال السيسي إن الدولة والمسؤولين يقدرون ارتفاع أسعار السلع الأساسية خلال الآونة الأخيرة، مؤكدًا أن الدولة تحاول قدر الإمكان السيطرة على الأسعار.
وأضاف السيسي: “أنتم فاهمين يعني إيه النهاردة المنتجات الزراعية أو المواد الغذائية بتاعة الناس يزيد تمنها مرتين تلاتة؟، هو مين يستحمل ده؟.. بس خلوا بالكم البلد إلى حد ما كيف هتقدر تجابه استمرار الحالة دي لسنة أو إتنين مش عارفين هتخلص إمتى وهى بتحافظ ما أمكن على إن الأسعار متزيدش”.
وأكد الرئيس المصري: “أنا بقول الكلام ده للمصريين كلهم إن أنتم لازم تكونوا عارفين، إوعوا تكونوا فاكرين إن إحنا مش حاسين كبني آدمين وكمسؤولين إن الأسعار حمل على الناس، بس والله ما في أكتر من كدا نقدر نعمله”.
أوعية ادخارية
وشدد الرئيس المصري على ضرورة وجود أوعية ادخارية لدى الوزارات والهيئات المختلفة، مستشهدا بصندوق قناة السويس، مشيرا إلى أن إيراد القناة بلغ 220 مليار دولار منذ عام 1975 وحتى الآن، لافتا إلى أنه لو تم استقطاع 10% من ذلك الإيراد ووضعه في صندوق كان من الممكن استخدامه لتمويل مشروعات هيئة قناة السويس والتطوير في القناة.
وأضاف السيسي: “لما جه الفريق أسامة في 2019 بقوله قولي عندك أموال إيه قالي لا أنا معنديش حاجة قولتله: يعني أنت لما تيجي تعمل مشروع لقناة السويس لتطويرها هتعمل إيه قالي هروح لوزارة المالية وده النظام”.
وتابع: “قولتله أنا عايز أقول لكم على حاجة، في البلاد اللي زي حالاتنا اللي ظروفها الاقتصادية متستحملش الكلام ده لازم يكون في أوعية على جنب والكلام ده أنا عملته في وزارة الصحة، وفي دلوقتي 70 مليار يا دكتور.. طب ليه عملت الصندوق ده في وزارة الصحة، عملته عشان التأمين الصحي”.
واستشهد الرئيس السيسي، بصندوق وزارة الصحة والسكان الذي أنشيء لتمويل المشروعات ورفع كفاءة المستشفيات في ضوء الارتفاع في معدلات الطلب والتكلفة في قطاع الصحة، إلى جانب صندوق وزارة الإسكان الذي يتم من خلاله توفير السيولة لإنشاء مليون وحدة سكنية سنويا.
يذكر أن مجمع الصناعات الكيميائية المتوسطة الجديد بأبو رواش، يساهم فى تغطية احتياجات السوق المحلى من الأكسجين الطبي اللازم للمستشفيات والمراكز الطبية ودعم العديد من المشروعات الإنتاجية، كذلك الاستخدامات الصناعية بشركات المنتجات البترولية وصناعة الورق والمنسوجات، وعدد من الصناعات الغذائية والدوائية، وتم تنفيذ تلك المشروعات بالتعاون مع العديد من الشركات المدنية.
