ريما: هاجس الرحيل من سوريا جعلني هدفاً سهلاً للنصابين

نص الحلقة :

صارت معي مع مها فطوم بودكاست اخبار الان

يعني انا ما فيني قلك ان احنا اشخاص بسيطين وبيضحك علينا بس نحن اشخاص قرفنا قرفنا العيشه هون وما عاد فينا نتأقلم ۔

أنا من وق النصبة كنت بحاجة لطبيب نفسي ۔

طبعا بتروحي لعند الشرطة هون بيلموكي بيحطوا الحق عليكي انه وين كان عقلك وقت اللي اتنصب عليكي انه معقول انه تكوني بهالطيبة والسذاجة طيب اشتغلوا شغلكم مو علي اساس انتوا في خدمة الشعب ۔ " ريما "

ريما اسم مستعار لسيدة سورية متزوجة وام لبنتين 13 سنة و3 سنوات تعمل مدرسة وزوجها موظف حكومي بيعيشوا بمدينة صغيره وسط سوريا لكن هاجس الرحيل والمغادرة كان ملازمها دائما بسبب كل شئ حل بسوريا علي كل الاصعدة خاصة الاقتصادية هذا الهاجز جعلها ضحية سهله لعمليات النصب والاحتيال بحلقة اليوم من بودكاست صارت معي رح نسمع منها ضمن سلسلة " مش معقول " تفاصيل كل شئ صار مش معقول هي سلسلة عم نقدم من خلالها تجارب اشخاص تعرضوا للخيانة او النصب والاحتيال او كذب عليهم كذبات كبيرة غيرت مفاهمهم للتعامل مع البشر لنعرف منهم كيف اتصرفوا وشو كانت النتائج ۔ لكن ملاحظة صغيره قبل ما نبدأ مع ريما انه عدلنا صوتها بناء علي رغبتها ۔ " مها فطوم"

كنت عم داوم في المدرسة عادي مثل اي انسه واحنا قاعدين نحن والانسات فذكروا اسم شخص بيسفر العالم وبتعرفوا انتوا الوضع انه كيف هون بسوريا كيف عايشين فأنا كنت متشجعة كتير بس زوجي كان متردد كتير شجعتة وجيت قولتله انه هذا الشاب سمعت انه بيسفر ليطلع الواحد علي هولاندا وليوصل علي هولاندا بعدين بياخد المصاري سالني قالي طيب كيف نجيب رقمه واسمه او هيك قولتله في واحده رفقتي بهولاندا قالي ممكن تعرف خيته للشاب بنعرفوا بنتواصل معه وبنجيب رقمه قالي اوك المهم حكينا مع هاي اللي بهولاندا حكينا معاه وجبنا رقم اللي هون رفيقه لهادا واللي اسمه مالك صبحي كالو من عفرين هو كردي المهم اتصلت فيه وقولتله ممكن نشوفك قال لشو مفكرتيني شبح بجي لعندكم دليني علي البيت المهم دليته علي البيت واجا لعندنا لهون زارنا طبعا اجي فورا من لما دخل اخد وجه وهيك وانا بعمل وانا ما بعرف شو المهم حطنا فوق الريح المهم اتفقنا جهز جوزات السفر الي وللبنت الصغيره وانه بيعمل فيز سياحيه لزيارة معرض بهولاندا وانه بيعرف هونيك عالم كتير قال انه اهله كلهم هنيك طبعا انا وزوجي اتشجعنا للموضوع وبناتي كمان حبوا الفكره اتفقنا معو انه ما في دفع مصاري الا بعد نوصل لهونيك وبلش تطبيق الاوراق طبعا بعد كام فتره قال بده يحكي مع مكتب وهو بالشام فتح السبيكر حكي مع شخص وطلب هداك الشخص 1000 دولار وانه بدياهم ضروري وهيك احنا قولنا له معلش 1000 معلش انه خلاص نعتبرها هيك المهم صار سحب اول 1000 بعدين بعد فتره بده 100 بده وصايه شرعيه فتره مع فتره ضلينا سنه نتوصل معه انه يلا انه هاي السفره جهزي حالك يلا ها ۔ " ريما "

جاب حجوزات مزوره مع فيز مزوره واستمر بكذبته بان الاوراق انبعتت علي اربيل وبإنه ما انقبلت وما مشي الحال وانه رجعان عندهم يرجعلهم المصاري ۔ " مها فطوم "

كان هو علي اساس رجعان وقالنا انه ما مشي الحال انه الاوراق انبعتت علي اثاث علي اربيل في شاب راح علي اربيل تهريب ورجع هو رح يلاقيله بيلقي مشكله المهم وهو علي الطريق خلاص قال راجعان لعندكم وهعطيكم المصاري وانه خلصان ما في سفر المهم انه انا كتير انزعجت بس قصة انه بيرجع المصاري ريحتني شوي ۔ قبل العيد بيوم اتصلنا فيه قال يلا جهزوا الغدا انا جاي لعندكم جهزنا الغدا وضلينا ل 5 مسا علي الاتصالات معه فجأه انقطعت الاتصالات نهائيا ۔ " ريما"

راحوا وسألوا بيت حماة لأنه هو متزوج واحدة من نفس مدينتهم ۔ " مها فطوم "

راح زوجي فورا لعند بيت حماه طلع مطلقها قبل بيوم كمان مطلقاه يعني هو لا مسافر ولا شئ كله هو عم يعمل اجرأت الهروب والنصب بعد بفترة صيرنا نتعرف علي الاشخاص اللي نصب عليهم مثلنا وفي اشخاص واخدلهم جوزات السفر نحن الحمدلله بس المصاري طبعا وضعنا النفسي سئ جدا لأنه نحن بيعنا بيت وبيعنا السيارة وكان عندي ورثي كمان بعته وما ضل عندنا شئ نهائيا غير رواتبنا فقط في البيت وضعنا النفسي سئ وخاصة انا انا كتير متأثرة بالموضوع كتير زوجي الله يعينه بناتي كمان اتأثروا بالموضوع يعني ضلينا بفتره بكي كتير انا كتير ببكي عاطفية زيادة عن اللزوم وكتير مأثر عليا الموضوع ولهلا طبعا عم بدعي عليه بس هذا اللي صار طبعا نصبه كلها 8 الاف دولار نصب علينا غيرنا طبعا اكير في اشخاص كان اخد منهم 120 مليون ليره سوريا يعني في شباب كمان اخد زوجات السفر طبعا ما رجعهم فروحنا اشتكينا هون بس ما بعرف ما استفدنا شئ نهائيا ولا ابدا طبعا بس اشتكينا وخلاص خالصين لازم نتناسي الموضوع شوي عم نحاول نقوي لكن الفكره الوضع المادي هون بسوريا كل مره للاسوأ لهيك عم نتعذب شوي ، طبعا في شاب هون هذا رفيقه نفسه وقت اللي اتعرفت عليه اول مره لهذا مالك اتصلت علي رفيقه هون حكيت معه قولتله انت واثق منه قالي ايه واثق قولتله مدي قد ايه واثق قال 100 % واذا ما ظبط برجعلكم المصاري طبعا احنا اشتكينا علي هالشاب وحبسوه هون حبسوه فترة وطلع يعني ولا كأنه في شئ مع انه علاقته فيه مثل الاخوة كانوا ونايم قايم عندهم بالبيت طبعا واثقه انه هذا الشاب بيعرف مكانه وبيعرف كل التفاصيل يعني واكيد يعني انه خطط هو لنصب علي العالم واكيد بده يسافر يلحقه مدري سافر ما بنعرف شئ عنه يعني انا ما فيني قلك انه نحن اشخاص بسيطين وانضحك علينا لا فيني قلك 1% بس نحن اشخاص قرفنا قرفنا العيش هون وما عاد فينا نتأقلم طبعا في تفصيل صغير ما قولتلك اياه انا اخدت استداع سنه وطبعا كان يشجعني اني اترك الوظيفه هو انه اتركي وظيفتك وخلاص شو بدك بكره بهولاندا بتعيشي حياة رائعه وليش بدك ترجعي علي الوظيفة وما بعرف شو وقالي زوجي لا انه لازم تاخدي استيداع سنه بلكي هونيك اذا سافرتي ما ظبطت امورك ورجعتي انه اخدت استيداع سنه طبعا وضليت سنه قاعده بالبيت اضايقنا كتير وكنت كتير ابكي قدامه لمالك الله لا يوفقه كتير ابكي قدامه انه نحن مضايقين ماديا انه نحن عم ندين انه في قسم كتير من المبلغ مداينينه ولهلا العالم اللي ادينا منهم بس الله يوفقهم انه مطولين بالهم علينا ، نحن كنا لما بدنا نسأل عنه يقولنا الموضوع سري للغاية وياريت ما تقولو لحدا وياريت ما بعرف شو علي اساس هو كان عم يشتغل مترجم للروس ويجي لعندنا ويقولنا ناطرين القافله مادري وين بده يروح معاهن يترجم ويجيب البدله اللي عندنا اللي هو بدله روس اللي هو مترجم نظامي علي اساس صارله فتره ونحن لما سالنا عنه هون لما اشتيكنا عليه هو طلع فتره صحيح اشتغل مع الروس فتره بس من زمان يعني اول الاحداث مو هلا مو حاليا يعني بس هو لهلا معه بطاقة الروس انه اللي عم يمشي فيه علي الحواجز انه بيخلوه يمشي بالحواجز طبعا نحن بعدها صار يتواصل مع زوجي علي الماسنجر وانا اقوله انا واثقه منك انه رح ترجعلنا المصاري وبتعرف انه كله دين وكنا بنحكي قدامك للناس اللي عم ندين منهم انه نحن بس اعطونا 100 دولار علشان نعطيه بكره بنرجعلكم اياهم يقولي لا انا ياختي وانا عندي محادثاته علي الواتس والماسنجر انه لا ياخيتي انا ما باكل حق حرام ومادري شو وانا بدي رجعلكم اياهم بس طولوا بالكم علي شوي وبعدها حظرنا طبعا ضل فترة بعد ما عرفنا انه نصب علينا ضل فتره شي شهر يحاكينا علي الماسنجر انه لا اكيد رح يرجع اياهم وانقطعت اخباره بعد ما انصب علينا حتي صيرنا نسمع انه فلان اتنصب عليها وفلا وروحنا شوفناهم والتقينا عده مرات وصار يحكولنا قصصهم ونحن نحكي قصصنا يعني نحن ما بعرف كيف ما اتعرفنا عليهم يعني هيك كانه عامي علي قلبنا انه متعلقين بقشايه بس مشان نسافر الشباب كلهم كانوا بيعرفوا بعضهم يعني هم كانوا يعرفوا اكتر منا انه هو نصاب يعني كان يبذخ عليهم بيجوز من المصاري اللي كان بياخدها منها بيصرف عليهم انه رحلات وروحات علي البحر علي حسابه وقعدات علي الكفاتريا ولا في قصه صارت كمان وقت اللي كان عندنا انه حط صوره علي الواتس وكلمناه عزيناه وقال هو جاي لعندنا انه تعبان نفسيا كتير واجي صار يبكي عندنا طبعا انه متوفايه امه وبكاني طبعا انه اتوفت امه وما بعرف شو وانه اتوفت امه بهولاندا طبعا ولا بعد ما عرفنا طبعا الشرطه طلعت لا امه عايشه وبيه عايش واخواته كلهم عايشين كلهم ساكنين بعافرين يعني يعني لا بهولاندا ومافي علاقه له ابدا بهولاندا هلا كل ما راح زوجي عند عمه اللي هون ساكن ولا مره خلانا نشوف مرته يقولنا مرته بالشام عند خيتها طبعا نحن عرفنا انه ما بعرف عن طريق عالم هنيك انه ممكن يكون عند عديله بالشام وهي موجودة هنيك بس مشان تطلع معه بس حكي عمه هون مغاير ابدا وقالنا هو لا نصب علي عمه كمان مصاري وشئ باعله السياره واخد مصرياته وبنته لا وبنته هون بسلاميه انه تروح وتيجي يعني ومطلقه فعلا هي انا نحن بالسريا كمان الشرطه طلعت انه مطلق مرته كان قبل باسبوع انه هو مجهز اوراق الطلاق وهيك بس ما بعرف ما بعرف شو صار بعد هيك طبعا كان يحكيلنا كتير عن تفاصيل حياته هو وزوجته انه فتره من الفترات يحب واحده غير زوجته وكان بده يطلق زوجته علشان هي الواحده وطبعا احنا بكل صراحه انه لا حرام وما بعرف شو كمان زوجتك حبابه عم تحكي لينا عليها طبعا اشرلنا علي بيته انه دلنا علي بيته بس نحن ما بعرف ليش يوم مارحنا ولا سالنا عنه يعني نحن النهار اللي نصب علينا زوجي راح سال علي البيت طلعوا كانوا مستاجرين بالبيت وطالعين قبل بفترة طويله طبعا وكان مستاجر بيت هو لحاله طبعا راح زوجي عليه وراحت الشرطه وكان لهلا عم يدفع ايجار الايجار البيت بعدين سلم البيت كيف سلم البيت ما حدا بيعرف يعني قولنا للشرطه يعني ما عقول ما تيجبوا المستأجر عندهم تسالوه وهيك بس تركنا الموضوع للشرطه وهيك لانه هيك نسي الموضوع طبعا بتروحي للشرطه هون بيلموكي انه بيحطوا الحق عليكي انه وين كان عقلك وقت اللي اتنصب عليكي انه معقول تكوني بهالطيبه والسذاجة انه يتنصب عليكي يعني  طيب اشتغلوا شغلكم مو علي اساس انتم في خدمة الشعب ۔!

انا كنت كتير انسانه اجتماعيه وطموحة وطاقة ايجابيه وبحب الضحك والطلعات مع اصحابي وكتير بحب الطلعات والفوتات بس بعد الموضوع اللي صار معنا انقلبت 180 درجة صيرت انعازليه تقريبا 0 اجتماعيا اذا حد بيسالني كيفك ببكي ممكن ابكي اذا قعدت مع رفقاتي ممكن يسالوني شو بيكي ليش هيك متغيره صاير شئ معك يعني دايما بشرد وهما عم بيحكوا ما بعرف اتغيرت كليا حتي جسمي اتغير بشرتي اتغيرت شكلي اتغير هالسنه اللي مرت علينا كبرتني اكتر من 10 سنين تعب تعب نفسيا ۔

بعد ما صار الموضوع يعني عرفنا انه نصب علينا طبعا صار مشاكل كتير بيني وبين زوجي انه انا السبب انه انا اللي شجعته علي الموضوع وانا اللي كنت بصراحة اقوله معلش ادفعله معلش ادفعله اول فترة انه يلا مبين عليه صادق ومع انه قلبي من جوا عم يقولي انه لا مانو صادق بس انا ما كنت مصدقه امته اطلع اسافر مشان انقذ بناتي من هون لانه الوضع يرسي له ماديا ومعنويا ۔

اتخطينا المشاكل بعد مالنا فترة طويله طبعا انه اتخطينا المشاكل انه ما بعرف شو بدي احكي انه قدرنا شوي انه خلاص لازم ننسي الموضوع لازم نعيش ونرجع علي حياننا الطبيعه ما في نرجع لحياتنا الطبيعيه طبعا بس عم نحاول ما نفتح الموضوع بالبيت لانه بس الفتح بيصير مشكله في كمان العالم اللي نصب عليهم انه خلاص ما عاد نشوفهم ما عاد نقصد نشوفهم مشان ما عاد ينفتح الموضوع ولا حتي السؤال عنه ولا حتي مراجعة الشرطه انه صار معكم شئ او هيك خلاص لازم نتناسي الموضوع ونبلش من جديد ۔

طبعا البيت اللي بعناه كان بيت عم نأجره ونستفاد من حقه كان بيت باسمي طبعا يومها كان هو عندنا وقولنا له بدنا نبيع البيت هذا اللي ساكنينه حاليا قالنا لا ما تبعوه هلا بس بدك تطلعي لهونيك زوجك بيبعه هون وبتكملولي حق السفره يعني كانت علي اساس انه 6 الاف دولار وبنيتي الصغيره كمان 6 الاف فدفعناله اجمالي المبلغ 8 وعلي اساس نوصل لهنيك بنكمل له الباقي بس كان الاسعار ما كتير غاليه وبيعنا السيارة وسيارتنا قديمة طبعا فالمبلغ كله صار 5 الاف ما ايجمالي ورثي مع كل شئ كان 5 الاف دولار بس يعني ما كان كتير ضيلنا 2 الفين طبعا زوجي باع الاراضي لحتي جمعنا مصاري ودفعنا ما دفعنا الدين طبعا بس دفعناله لهداك المبلغ كله 8 اللاف دفعناهم ايه طبعا 2 الفين دين وصاروا 6 الاف وهيك صار يعني ما بعرف يعني هلا نحن اذا وصلت لايدنا الفين هيك الحمدلله بنقول انه ما بعرف قدرة قادر طبعا مستحيل تصير كنا نحن بالاخير صيرنا نفاوضه ونقولنا بس ابعتلنا نص المبلغ وخد نص مسامحينك فيه بس ابعتلنا نص المبلغ نوفي ديونا بس نرجع للعالم اللي مديننا بلا البيت وبلا السياره وبلا شئ بس ابعتلنا نوفي ديونا لانه صار ديون علينا يعني هلا شو ما اشتغلنا يعني انا مدرسه وزوجي موظف يعني نحن كيف نوفي دين يعني حتي القرض ما فينا انا بضل عندي ايمان بالله انه ممكن يصير هيك الله ما رح يتركة طبعا انا واثقه من هالشئ وبيرجعلنا حقنا حتي لو مش مصاري المهم نضل بخير وما حد يوجعه شئ من البنات طبعا من ولادي رح نستمر ونقاوم لحتي الله يفرجها ان شاء الله خير  ۔ " ريما "

للأسف تجربة ريما صارت مع كتار  وعم تتكرر اليوم بسبب استغلال اصحاب النفوس الضعيفه للناس ورغبتها بالحياه وتمسكها بالامل في بلادنا المرهقة شكرا لاهتمامكم وحسن استماعكم وشكرا لريما علي شفافيتها انتظرونا بالحلقات القادمة واستمعوا لجميع الحلقات السابقه عبر زيارة موقعنا اخبار الان ۔ نت وجميع منصات البودكاست مثل ابل بودكاست اسبوتفاي  جوجل بودكاست ديزر وانغامي لاقترحاتكم ومشاركتكم اتواصلوا معي علي رقم 00971568531592 بالإعداد والتقديم برافكم دايما أنا مها فطوم اللي اللقاء