تحديات الطلاق

نص الحلقة :

الطلاق واتخاذ هالقرار من أصعب القرارات اللي ممكن يخذها الانسان والاصعب هي الحياة ما بعد ذلك سواء كان للرجل أو المرأة لأكون واقعية المطلق كمان عنده تحديات بس هاي التحديات بتتضاعف عند المرأة كل شئ مربوط بفكرة الطلاق وأنها مطلقة ۔

ما بتقدري تتأخري شو الناس بدها تحكي عنك مطلقة ومتأخره ما تسافري لمين بدك تتركي ولادك اقبلي فيه منيح انه حدا اجا دق باب بيتك بعد الطلاق الشاطر بدو يتحكم فيكي وعبارات ما بتنتهي عن هالموضوع

في حلقة بودكاست قصتها القصيرة بدنا نحكي شوي عن نسب الطلاق عن التحديات بتواجهها النساء من خلال قصة سيدة رفضت انها تكشف عن هويتها " هبه جوهر "

مرحبا انا حابه اخفي صوتي لأنه المجتمع ما بيرحم وما بعرف رح تكون كيف نظرتهم الي سلبيه يعني ما بعرف كيف ممكن يشوفوني فبحب اخفي صوتي وهويتي وشكرا الكم ۔ " الضيفه "

صدمة كبيرة بتعيشها السيدة بعد الطلاق كل حياتها بتنقلب تطلع من بيتها بتواجه أسئلة مع ولادها وبتصير قدام تحدي اقتصادي مش سهل ابدا ۔ مش بس تحدي اقتصادي لا كمان تحدي مع الذات ، شو لازم اعمل وين بدي اوصل كلها اسئلة بتحاول تجاوب عليها وكل جواب يعني طريق وحسابات مختلفه ۔ " هبة جوهر "

طبعا في البداية كانت صدمة لإلي وصدمة للولاد وصدمة لأهلي لأنه كل اشئ فجأة فحسيت حالي كل حياتي اتغيرت كل حياتي انقلبت وكأنه مش نفس الرجال اللي انا تزوجته اخدت وقت كتير لطلعت من القصه يعني انا حسيت انه كان صعب علي وكنت كتير اضايق من نظرة الناس ومن الولاد وهما رايحين علي المدرسة كانوا صغار وكانوا يقولولي وين بابا كانوا يشوفوا أي اب تاني رايح ياخد أصحابهم وهما دائما يقولولي وينه ليش هو مش معنا ليش تركنا فكان هذا اول صدمة كنت مضايقة عليهم وما بعرف شو ارد عليهم تاني شئ أنا في بداية أول ما اخدت الشهادة اشتغلت تقريبا سنتين وبعدين اتزوجت وقعدت فما كتير اعتمدت علي حالي فأول ما تركنا أوك يعني عطاني حقوقي كامله بس أكيد ما بيكفي أكيد الاولاد بدهم كتير وأنا بدي والحياة صعبة وغاليه كتير فكان هذا الموضوع ما بيكفي اللي يعطينا اياه ما كنت حابة انزل المستوي اللي هما كانوا عايشينه واللي انا عيشته فكان لازم اشتغل قعدت فترة للقيت شغل والحمدلله كان اول نجاح الي اني اشتغلت وقدرت الاقي شغل ولو اغطي شويه من مصاريف الولاد طبعا أكيد مش سهل أنه الواحدة تشتغل وتدير بالها علي ولادها وتوصلهم وتجيبهم وتدرسهم وتحضرلهم الأكل كتير كتير كان شئ صعب يعني أنا كنت حاسه أكبر تحدي الي هما ولادي أكتر من نظرة أي حدا أو أي مثلا أهلي جيرانا ما كان كتير فارق عندي قد ما أنا فارق عندي اني انا أقدر أخلي ولادي ما يشعروا أنه أبوهم مش موجود ۔۔ " الضيفة "

تمكين المرأة داخليا من خلال توعيتها ودعمها نفسيا واجتماعيا هادا رح يقودها الي تمكينها خارجيا لتواجه تحديات بثقة أكبر وبالتالي تتغير الصور النمطية ، لكن في مشكله في مشاركة االمرأة اقتصاديا في منطقة الشرق الاوسط وشمال افريقيا ما بيشارك الا 20 ونص بالمية من النساء في القوي العاملة بتشير التقديرات الي انه 33 % من النساء بهالمنطقة بيشاركوا بالعماله الهشه مقارنة بنسبة 23 % للرجال بتمثل المرأة تمثيلا زائدا بالمهن ذات الأجور المتدنية بينما يوجد عدد قليل جدا من النساء بالمناصب العليا من المنطقة علشان هيك التحدي الاقتصادي هو أكتر التحديات اللي بتواجة النساء والنساء المطلقات تحديدا ۔ " هبة جوهر "

طبعا في شئ تاني كمان كان كتير صعب علي في البداية طبعا غيرت بيتي وصيرت ادور علي بيت شوي صغير علشان اقدر علي مصاريفه علي اساس اقدر اوفر اول ناس اعترضوا هما أهلي أخواني كتير اعترضوا انه ما بيظبط تسكني لحالك وأنا بنفس الوقت ما بقدر اسكن معهم أنا عندي عيله وبيت التيته مش دايم بيكون مناسب اربي ولادي فيه أكيد التيته أحسن حدا وجدوا أحسن حدا وبيتهم أحسن شئ بس المشكله انه ممكن أنا في شغلات لازم أكون حازمه فيهم وما بقدر بوجود اي حدا اكون حازمه تاني شئ الترتيب بيختلف يعني بيت العيله غير عن بيت يكون الي خاص كتير اتغلبت لقتنعوا اهلي انه انا اسكن لحالي طبعا أكيد كنت ببيت مش كتير بعيد عنهم وهادا الشئ الصح يعني ممكن أحتاج لأي حدا فيهم يكونوا قراب علي ۔۔" الضيفة"

في مجلة بريطانية انتشر تقرير قبل سنة تقريبا بيحكي عن الطلاق في المنطقة حكي انه عدد الحالات ارتفعت مقارنه عن الجيل الماضي وانه تلت الزيجات في دول مثل الاردن لبنان وقطر والامارات بتنتهي بالطلاق بينما بتوصل النسبة للنص في دول مثل الكويت وهو عدد أكبر بكتير من الولايات المتحدة مثلا ، في مصر تضاعفت حالات الطلاق في عام 2000 بالتزامن مع تعديل القانون اللي جعل اجرأت الطلاق أسهل بالنسبة للنساء ورغم تصدر مصر بأعلي عدد حالات الطلاق بيتردد نحو مليون حالة سنويا علي محاكم الأسرة الا أنه مصر تحتل المركز التاني بين الدول العربيه من حيث نسب الطلاق الي اجمالي الزيجات لأنه ارتفعت حالات الطلاق خلا ال 50 عام الأخيرة من 7 % الي 40 % ووصل عدد المطلقات الي 3 ملاين مطلقات أما المركز الأول في نسب الطلاق فكان من نصيب الكويت فبالرغم من انخفاض عدد سكانهم مقارنة لمصر ارتفعت نسبة الطلاق في البلاد الي 48 % من إجمالي عدد الزيجات حسب احصاء نشرته وزارة العدل الكويتيه، في المركز الثالث والرابع بنلاقي الأدرن وقطر ارتفعت نسبة الطلاق فيهم الي2۔37% نحكي عن الاردن و37 % نحكي هون عن قطر رغم كل هذه النسب نظرة المجتمع مازالت واحدة لسه النساء بيواجهوا الكتير من التحديات بعد الطلاق ولكن اذا كان الزواج صعب بيصير الانفصال هو حل وشوي شوي بترح التحديات وبيصير التأقلم مع الحالة الجديده هو الحل ۔۔۔ " هبة جوهر "

في شغلة تانية بحب أحكي عنها اللي هو أنه علاقات الإجتماعية كتير اختلفت كتير اتغيرت الناس الكابلز اللي كانوا أصحاب صيرت أحس أنه مش كتير أنا مفضلة أكون بالقعدات العائلية اللي بتكون كوني أنا لحالي فدايما بس أخلي طالعاتي لحالي يمكن هذا الموضوع مش كتير مبين بس صارت نظرة كل حدا الي هيك فصيرت اختصر عن حالي كتير من العلاقات الإجتماعية اللي كانت موجودة ، الحمدلله بعدين حاولت اغير شغلي اشتغلت بمدرسة حطيت ولادي معي فأكيد اللي بيشتغلوا بمدرسة بيكون عندهم خصومات والوضع الإقتصادي صار أحسن المدسة كتير كانت منيحة كتير صاحبين المدرسة ساعدوني وكانوا يعرفوا اني لحالي فأي وقت كانوا يسمحولي اذا في مغادرة اذا في عطله فيعني في ايام في ناس بتيجي بتوقف معي والحمدلله هلا بلشت أتأقلم بلش ولادي يتأقلموا وإن شاء الله أقدر زوصل للبدي ياه وأوصلهم للمكان اللي أنا نفسي أشوفهم فيه ۔۔ " الضيفة "