مدربة قيادة الشاحنات تتجاوز كل الصور النمطية

نص الحلقة :

نسرين : "أول مرة طلعت في التريلا حسيت برهبة وخوف جواي مش طبيعي أول اشي شو هاي الأبعاد شو هاي الحجم معقول اقدر اتحكم فيها ، بعدين شوي شوي لما بلشت اتدرب حسيت انه انا مالكة الشارع فأنا كاشفة الشارع الي ما بدي حدا يمشي معي بالشارع ، اي اشي جديد بيكون فيه معارضة بيكون فيه رأي شو بدك فيها انت بنت شو راح تستفيدي منها ، الأهل الجيران طبعا اي اشي جديد شو بدك فيه حتى لغاية الآن بعض التعليقات اذا على الفيس فقط انه شو بدك فيها ارجعي للمطبخ ارجعي للبيت بستغرب انه احنا صرنا لمرحلة لساتها الناس بتفكر  انه شو بدك فيها طيب انا مش غلط ما أنا بتعلم بزيد مهارة اذا ما فادتني انا كتريلا بتفيد بتعليم طاباتي بزبعادها ، قياساتها ، كمان تحدي للوحدة انها بنت انها قدرت تتحكم في مركبة كبيرة وتسيطر عليها كتير اشي حلو  أنا بحس انه كتير ممتع يعني "

 

هبة جوهر : " بدى الموضوع بشكل كتير بسيط وعفوي وكان الهدف شي شخصي بحت ليتحول لتغيير بالصور النمطية بس بالنسبة الها كان الموضوع هو تعلم ومتعة ، نسرين اللبدي مش بس بتسوق شاحنات وتريلات هي كمان مدربة ، مدرية على قيادة هذا النوع من المركبات وبهيك دخلت عالم كان حكر على الرجال ، راح تحكيلنا قصتها القصيرة "

 

نسرين : " عائلتي كانت مكونة خمسة اخوان شباب واحنا بنتين فأنا أكبرهم و أختي اجت بعد فترة طويلة يعني آخر اشي كان عمري ٨ سنوات فضليت لفترة طويلة كنت وحيدة البنت على شباب كنت مدللة أكبر واحدة أتحمل مسؤولية بالمدرسة كنت متفوقة ، كانوا يحكوا عني اني مشاغبة هيك كنت اسمع وانه كان اسئلتي كتيرة وباستمرار بحب الحركة ، بس كانت علاماتي متفوقة بالمدرسة بما ان الأخت الكبيرة ، كنت مسؤولة عن اخواني كنت اتابعهم ، اتابع امورهم ، ادير بالي عليهم ، هذا الاشي خلاني اتحمل مسؤولية واي اشي اعمله اني اتابعه وادير بالي انه يكون في أخطاء "

 

هبة جوهر : " طبعا بهذاك الوقت ولا كان في بال نسرين انه تتجه لتعليم السواقة ، كان حلمها وهي صغيرة تكون دكتورة وفعلا حققت الحلم بدراستها للتمريض لكن بعد الزواج والانجاب بدأت تتعلم قيادة السيارات "

 

نسرين : " كانوا لما يسألوني شو بدك تصيري لما تكبري أجاوب دكتورة  ، كان والدي يجيبلي الألعاب البلاستيك الي فيها سماعة ، علب أدوية ، الشغلات الطبية هاي الي كنا نلعب فيها واخنا صغار وكنت دائما حالي دكتورة لاخواني ولما كبرت كملت دراستي لغاية التوجيهي كنت أحب مادة الأحياء وسجلت تمريض ودرست تمريض ، اشتغلت بمستشفى فترة تدريب ٣ شهور بهد هيك اتخطبت واتزوجت والتهيت بالحياة الزوجية والأولاد صار عندي أطفال درت بالي عليهم ، بداية كنت حابه اتعلم السواقة مثلي مثل أي ست بعد ما يكبروا ولادها شوي وبدها تتعلم السواقة على أساس تخدم حالها ، تجيب أغراضها ، تخدم ولادها في حال مرضو ، سجلت وبلشت اتدرب وكانت أموري كتير كويسه بس أثناء التدريب لما بلشت أتقن حسيت حالي انه هذا الاشي الي بدي اياه "

 

هبة جوهر : " وهون صار الاختلاف بحياة نسرين وكأن في اشي جواتها مخبى طول السنين وما كان مبين وبذهابها للحصول على الرخصة لاقت الي كان مخبى جواتها "

 

نسرين : " أثناء التدريب كنت أسأل المدرب كيف الواحد ممكن يصير مدرب شو الاجراءات ، طيب أنا حاسة حالي كويسة متقنة في اشي بعد هيك في اشي ممكن اتعلم كمان فدائما كا يكون في اشي جديد في اشي اتعلمه كل ما أطلع درجة بالسلم بيصير عندي فضول للدرجة الي وراها شو بدي اتعلم شو في متخبي ورا هذا الدرجة ، اتعلم أشياء جديدة وكانت تنقلني من درجة لدرجة لما سألت عن الشروط اني أصير مدربة كان من ضمن الشروط بعد الحصول علي الرخصة الي هي الثالثة انه لازم بعد سنة آخد رخصة العمومي الي هي فئة رابعة وبعد ما أحصل على الرخصة الرابعة كمان في عنا دورة مدربين نخصع لها بعد سنتين من العمومي من رخصة العمومي وتابعت الخطوات وضليت مسجلة وتابعت أخدت الرخصة الخصوصي بعد السنة العمومي بعد سنتين دورة مدربين الحمد لله اني جبت الأولى وكنت متفوقة لكن بإستمرار كانت أسئلتي كتيرة حتى الميكانيك كنت أسأل عنها أسأل عن كل اشي وصرت مدربة اشتغلت في مجال التدريب تقريبا لمدة سنتين حسيت حالي برده كمان  انه خلاص اكتفيت وبدي الاشي التاني الاشي الي بعده رديت حكيت مع المدرب الي بيدرب على الفئة الخامسة الي هي الباص صرت من التعليم للقيادة هل هي سهلة بقدر أسجل ،شجعني مش غلط خلينا نجرب ، سجلت وبلشت وامتحنت وأخدت الفئة الخامسة كمان نفس الشي حسيت حالي اني وصلت لمرحلة انه خلاص عرفت هيك بدي أعرف الي أكبر كيف بيشتغل كيف طريقة القيادة رديت سجلت على التريلا ومشيت في المعاملة واتدربت وامتحنت عليها وبعدين سجلت للباص وامتحنت ولغاية الآن لساتني بتعلم وبآخد معلومات .

تسلسل الرخص أخد معي سبع سنوات تقريبا الي هي المدة القانونية بين كل رخصة ورخصة وفي سنتين انا اشتغلت فيهم بعدين فكرت أطور رخصتي في حدود السبع سنوات  كان جميع الرخص معي الي هي من الفئة الثالثة لغاية السادسة ، ناحية التدريب كان أصعب اشي التريلا انها عبارة عن جزئين وفي الرجوع بدها مهارة وبدها طريقة معينة فكانت أكتر شي اتغلبت فيه الي هي تريلا من ناحية العملي أخدت فيه شويه حصص زيادة من ناحية النظري كان أصعب اشي أسئلة الخامسة فأتذكر بالإمتحان الفئة الخامسة كان ضلي سؤال ولازم سؤال بجاوبه يا برسب "

 

هبة جوهر : " شعور نسرين لما أول مرة قامت بقيادة الشاحنة الكبيرة كان الرهبة لكن سرعان ما اتحول لمتعة ، حولتها لنصائح لتعليم طالباتها رغم ان اقبال السيدات وحاجتهم لتعلم الشاحنات قليل الا انه رخصة التدريب رخصة تدريب الشاحنات تحديدا فادها في تعيلم طالباتها حتى الي بيدربوا على سيارات صغيرة "

 

نسرين : " أول مرة طلعت في التريلا حسيت برهبة وخوف جواي مش طبيعي أول اشي هيك شو هاي الأبعاد شو هاي الحجم معقول أقدر أتحكم فيها وبعدين شوي شوي لما بلشت اتدرب حسيت انه انه مالكة الشارع ، فأنا كاشفة الشارع الي ما بدي حدا يمشي معي بالشارع ، أنا كنت حاطه هدف انا بدي آخد الرخصة وبدي اتعملها مش غلط اني اتعلمها وأكيد ما راح تكون صعبة حتى لو كلفتني عدد حصص زيادة كنت اتعلم وكل مرة كنت اكتشف شي جديد لكن كنت أشعر بالمهارة ، بالمتعة اني أنا متحكمة في اشي كتير كبير وصعب ممكن مش أي حد يتقنه .

أنا أصلا مدربة ولما أخدت رخصة التريلا ضفتها اضافة على تصريحي فمن الأساس انا مدربة شو كنت اتعلم كنت أعطي الطالبات شو كان المدرب يشرحلي صرت أشرح للطالبات بس صرت أشرح من وجهة نظري أنا الأشياء الي انا بشوفها الي انا بقدرها شو أخطاء البنات كمان وجود بنت على التريلا صار يصير فضول عند البنات انه معقوا احنا البنات بنقدر نسوق التريلا طيب تعالوا جربوا ، كتير كانت ممتعة حتى لطالباتي في السيارة الصغيرة لما بدربهم صرت ادربها ، شايفة التريلا هاي مش شايفتك انتي بالنقطة العميا الها لما يلف ما تيجي جنبه فصرت أنا أحمي الطالبات من أكتر الحوادث الي بتصير مع سائقي التريلا من السيارات الصغيرة فكانت كتير ممتعة حتى الطالبات لما يعرفوا ان مدربتهم مدربة تريلا كنت أصل أحكيلهم شو هاي الي معاكي سيارة صغيرة هاي السيارة لازم تتعلميها أنا بسوق تريلا "

 

هبة جوهر : " هذا المشوار الي مشيته كان في أكتر من تحدي من بينهم المالي والمجتمعي ، عن نظرة المجتمع حكت نسرين مين دعمها ومين استهجن الفكرة "

 

نسرين : " أي اشي جديد بيكون فيه معارضة بيكون فيه رأي شو بدك فيها انتي بنت شو راح تستفيدي منها ، زوجي كان مشجع الي كان يضل يحكي طول ما انتي نفسك تتعلمي اشي مش غلط اعرفي هيك لازم تعرفي شو بدك الي بدك اياه اتعلميه اسألي عنه فما كنا ابدآ معارض كان بالعكس هو يساعدني حتي أحيانا كان ممكن أتأخر على البيت أتأخر عن الصغار ما كان ابدا فيه مشاكل بينا بهاي الأمور وكنا متفاهمين وموزعين المسئوليات هذا الاشي كتير ساعدني بالمراحل الي انا اخترتها بالدورات الي انا اتعلمتها ، الأهل ،الجيران طبعا اي اشي جديد انه شو بدك فيه حتى لغاية الآن بعض التعليقات اذا على الفيس أو فقط انه شو بدك فيها ارجعي للمطبخ ارجعي للبيت بستغرب انه احنا وصلنا لمرحلة لساتها الناس بتفكر انه شو بدك فيها طيب انا مش غلط انا بتعلم بزيد مهارة اذا ما فاتتني انا كتريلا بتفيدني بتعليم طالباتي على ابعادها على قياساتها، كمان تحدي للوحدة انها بنت انها قدرت تتحكم في مركبة كبيرة وتسيطر عليها كتير اشي حلو  أنا بحس انه كتير ممتع يعني "

 

هبة جوهر : " دائما لقيادة المرأة للسيارة كتير من التعليقات والانتقادات والسخرية، دائما المجتمع بيوصم السيدات بعدم قدرتهم على القيادة وبيسخدم النكت للتنمر والاساءة لكن نسرين الي قادرة اليوم تقود وتعلم على قيادة الشاحنات كسرت هاي الصورة "

 

نسرين : " أنا دائما بحكي انه الست بتعمل حادث والشاب بيعمل حادث لكن لو اطلعنا على نتائج الي بتعمله الست او بيعمله الشاب ، الست ممكن جناح غماز جنب السيارة بتضربها اما الشاب كل حوادثهم كلها قاتلة ، اغلب نسبة الحوادث من ورا الشباب وتهور الست مهما كانت مهما عملت بيضل عندها الالتزام بيضل عندها حس المسؤولية ، بتخاف على ولادها ما راح تكون متهورة في السواقة طبعا لكل قاعدة شواذ لكن في بنات بنلاحظ احنا بالشارع هاي الشغلات في شباب ابدا والله حرام انه بركب سيارة "

 

هبة جوهر : " أما من الناحية المادية كان هناك تحديات واجهت نسرين لنه بكل تأكيد كل هاي الشهادات بدها شغل ووقت وتكلفة مادية "

 

نسرين : " من ناحية مادية كان الموضوع مكلف طبعا بدي أسجل بدي آخد حصص ، فيه حصص كنت اروح مش فاهمة اشي طيب أشعر حالي انه انا مش فاهمة بدي ارد اعيد هاي الحصة لانه ما فهمت اشي ، أخد حصة تانية ما كنت ابدا اني انا اتأخر او احاول أاقصل بينهم لاني انا دائما بدي اتعلم فما كنت افصل بين الحصص وأخدت عدد حصص بالمقابل كانت زوجي متعاون ما كنت أخجل اني اطلب منه مصاري لأنه انا ما بدي اعمله عبئ على اشي انه حابه فانا كنت اشتغل حصص عادي على تدريب سيارة كان جزء منه مخصص لتدريب الي بدي اتعلمها "

 

هبة جوهر : " التعلم والمزيد من المتعة والشغف هي الأشياء الي بتشوف فيهم نسرين انعا قادرة تحقق فيهم الأحلام "

 

نسرين : " بالنسبة لموضوع الأحلام والطموحات بحس حالي بختلف شوي عن باقي الناس ، فيه ناس بيكون عندها حلم انها توصل لشي ، انا ماعندي سقف لطموحاتي ، انا حلمي كل اشي جديد طموحي اتعلم كل اشي "

 

هبة جوهر : " وأكيد مش ممكن نختم الحلقة بدون نصائح من نسرين لكل الي بيسوقوا سيارات او بيتعلموا القيادة "

 

نسرين : " بنصح كل شخص مقبل على أخذ رخصة انه يتعلم القيادة ما يبخل ابدا بعدد الخصص ما يبخل في المعلومات مش غلط اني اتعلم مش غلط اني اطور مهارة حتى لو شعرت اني عند ضعف في شغلة معينة بضل اشتغل عليها لغاية ما اتافاداها ، نسبة الحوادث مرتفعة كتير اذا فكرنا في الأسباب راح نلاحظ ممكن سرعة ممكن ما حاطه حزام امان فبيكون السبب كتير تافه لكن هو أودى بحايتها فهي كتير بتوقع على عاتق اي شخص بيدوا يعمل عملية القيادة مسؤولية نفسه مسؤولية المركبة مسؤؤلية المشاة مسؤولية المركبات الي حواليه كل هذا بالمسؤولية هو على السائق نفسه .

مش غلط اني أحط حزام الأمان ابدا مو ضعف اني اسأل أي شخص عن أي معلومة انا بجهلها شو الغلط لو انا التزمت بالقواعد والأولويات شو الغلط لو اني اعطيت اولوية للأسف هو بالشارع ما في حدا بيعطي الأولوية ، الكل بيأخذ فبيكون مجرد التفكير لمدة ٣ ثواني قبل ما اتصرف كافية في انه يبعد اي انسان عند الحادث دائما احنا بنحكي للطلاب بنحكي للطالبات مو شطارة انك انت تضرب سيارتك والغلط مش عليك ، الشطارة انك تتفادى الحادث من الأصل بعد ما يصير الحادث بيبطل المهم هو الغلط علي ولا مش علي بالنهاية انا خسران وهذا عديك على اني ممكن اتعرض لأي شي بالجسم انه يصير فيه معي ضربة يصير معي اي اعاقة فأنا طول ما في مجال اتفادى الحادث عادي اعطي أولوية طلع الناس اي حدا بده يأخذ الأولوية أعطيها أبدا ما بتكون متمسك فيها ، أحط حزام الأمان مش ضعف أنا مدربة وبحط حزام الأمان كل متر انا ما بضمن شارع شو بيصير معي ، القواعد والأولويات انعملت أكيد لحماية الناس لو الكل التزم بالقانون  التزم بالسرعة ، التزم في الأولوليات ابدا ما بيصير حادث ، المشاة بالذات لازم حتى الست او الشاب لما بيتعلم السواقة مشيته بالشارع بتختلف بلش يفهم من وين يقطع الشارع من وين يعمل وقوف هو مرئي ولا مش مرئي فهذا الشغلات لازم وعي مروري سواء للشخص معاه رخصة او ما معاه رخصة مش غلط اني افتح في عنا النت في عنا اي مجالات اي شي ممكن اقرأه بيفيدني انا حتى لو فادني كسائق بيفيدني كمشاه بيفيدني كأي شخص ممكن استعمل الشارع "