ما يحدث في جسد و عقل المراهقين

نص الحلقة :

محمد الشاعر : " النمو الفسيولوجي ، النمو الجسدي يصير عند المراهق عند المراهقة ، النمو العقلي ، النمو الحركي كذلك النمو الإنفعالي ، النمو الجنسي ، النمو الإجتماعي "

آميتس كراد :"بحسب رأي خبراء الصحة النفسية فترة المراهقة و فترة الشباب هي أتعس فترة عند كتير من الناس في العصر الحديث "

محمد الشاعر : " لأن هناك طفرة بالسلوك في هذة المرحلة ، مرحلة المراهق بيحس بالغرور بيحس انه هو القوي بمن هم حوله عنده عاطفة حساسة ، كذلك بنمثله كثير بمتقلب المزاج .

الآن وسائل التواصل الاجتماعي  بتشارك في التربية ، الاعلام بيشارك بالتربية ،المعروفين بالسوشيال ميديا باليوتيوبر هاي الأمور كلها صارت شركاء في التربية فتعددت شركاء التربية ليتعدد حب التقمص للآخرين عند بعض المراهقين صار يحب بده شهرة بده يشارك في التواصل الاجتماعي هاي كلها صارت  أكثر عند المراهقين "

   آميتس كراد : " بحسب رأي خبراء الصحة النفسية فترة المراهقة او فترة الشباب هي أتعس عند كتير من الناس في العصر الحديث بحسب الاحصائيات والدراسات الحديثة الي في كل مرة تظهر أرقام مرتفعة بمعدل الاكتئاب والاكتئاب والانتحار عند الفئات الشابة بين عمر ١٥ و٢٥ سنة ، وخاصة عند الاناث الي معدل اصابتهم بالاكتئاب ومحاولتهم للانتحار اعلى من نسبة الذكور وبهاي المرحلة السلوكيات يالي بتكون متعارف عليها هي :  الغضب، التمرد، الانعزال، الغموض، الحساسية الزايدة، وتقلب المزاج

هلا فسيولوجيا بفترة المراهقة بينتج جسمنا مجموعة جديدة من الخلايا العصبية وكمان بترتفع وبتتغير الهرمونات يالي بترافق تطور دماغنا بسرعه كبيرة مع عدم تطور قشرة الفص الجبهي يالي بيكون نموه ابطئ من باقي أجزاء الدماغ وهاي المنطقة هي المنطقة المسؤولة عن التحليل والسلوك العقلاني لهيك اعتماد المراهق بدوافعه وسلوكياته بيكون  على اللوزة الدماغية يالي بتكون المسؤولة عن المشاعر والعواطف اما من الناحية الأخرى فالمراهق بالعصر الحديث عم يتعرض لضغوطات وتحديات اكبر من اي وقت مضي وخاصة مع اتساع دائرة المقارنات مع الآخرين بسبب السوشيال ميديا يعني قبل كانت مقارنته مقتصرة على ولاد الخالة، العم، العمة ،الخالة والجيران كحد اقصى اما هلا فاتسعت دائرة الاشخاص يالي بيقارن نفسه معهم وصارت المقارنة مع اغلب سكان كوكب الارض وما بننسى كمان دور الاعلام يالي بيقدم احيانا رسائل عن السعادة والنجاح بطرق تجارية واكبر من توقعات المراهق سواء عبر الاعلانات او عبر افلام ومسلسلات غير هادفة و معتمدة فقط على الشكل والبزخ والمظاهر المادية وخطورة هاي المرحلة بتزداد كل ما كان المراهق غير مكتسب لمهارات مثل التأقلم في اوقات الازمات والضغوطات لهيك لازم نفهم انه المراهقين مالهم بطبيعتهم عنيدين او حساسين او غاضبين انما هما عم بيمروا بهاي المرحلة بتغيرات نفسية وجسدية سريعة بتخليهم حساسين ومتقلبين المزاج فالسؤال الجوهري هون شو هو فن التعامل مع هاي الفترة الحساسة في حياتي أنا كمراهق او في حياة أولادي المراهقين ؟ .

أعزائي مستمعي راديو الآن من كل مكان اهلا وسهلا فيكم معي انا آميتس كراد من برنامج مخمخة

موضوع اليوم هو أكثر موضوع بيشغل بال كتير من الاهالي : المراهقة ومو بس الاهالي إنما حتى المراهق بذاته بيكون عنده كتير اشارات استفهام عن كل شي حواليه هاي الفترة الحساسة بحياة كل انسان، الفترة الانتقالية من الطفولة الى النضج اما نمر فيها بسلام او نمر فيها بكتير من التخبطات والمشاكل وسوء التفاهم بينا وبين واهالينا او بينا وبين اولادنا فشو هي المراهقة؟ ، شو تفسيرها العلمي؟ ، شو الي عم بيصير باجساد المراهقين؟ ، وكيف نحنا كاهالي لازم نتعامل معهم وكيف نحنا كمراهقين لازم نتعامل مع انفسنا ونتعامل مع اهالينا ، شو العوائق يالي بتوقف قدامنا بهاي المرحلة وشو النصائح بالي بتساعدنا اننا نعيش المرحلة بسلام .

كل هاي الأسئلة وأكثر راح نجاوب عليها مع ضيفي الاستاذ "محمد الشاعر " .

محمد طلال الشاعر هو اخصائي نفسي في وزارة التعليم القطرية وكمان مقدم فقرات نفسية وتربوية على قناة الكأس ، كاتب مقالات نفسية وتربوية وأسرية وكمان مدرب معتمد في برنامج التفكر للاطفال والمراهقين ومدرب معتمد لوقاية الشباب من المخدرات ، كما انه هو محاضر في المجال النفسي والأسري وخاصة فئة الاطفال والمراهقين ، فأستاذ محمد أهلا وسهلا فيك معي واتشرفت بوجودك ومتحمسة اليوم لنسمع كل المعلومات يالي راح يتم ذكرها "

محمد الشاعر : "يا مراحب فيكي وانا صراحة اسم البرنامج يعني بيجذب المستمع ايش هذا البرنامج اسم جديد فاختيارك للاسم رائع جدا مخمخة ، الأمر الآخر تعليقات الناس لجميع حلقاتك يعني بداية موفقة شوقت الشخص لكل مستمع من خلال طريقة القاءك من خلال اختيارك للمواضيع بيجعل اي شخص يستمتع انه بده يحضر الحلقة ، بينتظر متى بتكون موعد الحلقة علشان يستمع ليها ، فبرنامج موفق واختيار موفق يعني انا سعيد جدا بتواجدي معك في هذا اللقاء "

آميتس كراد : " أستاذ محمد ، شكرآ إلك وكلامك شرف كبير إلي ، طبعا هدفنا الأول والأخير نفيد المستمعين ونقدملهم محتوى يليق بعقولهم ، فأستاذ محمد قبل ما نخوض بموضوع اليوم يالي هو عن المراهقة حابة أولا نفسر شو هو الفرق بين المراهقة والبلوغ "

  محمد الشاعر : "اختيار موضوع المراهقة ، موضوع مهم ويكاد كل بيت من البيوت عندهم مراهق بالبيت كلنا مررنا بمرحلة المراهقة ، فاختيارك لموضوع المراهقة من المواضيع المهمة كل الشكر ليكي لاختيار الموضوع .

الآن كثير  يخلط ما بين او يخلط ما بين البلوغ والمراهقة ويركز فقط على البلوغ في هذه المرحلة ، هي مرحلة عمرية المراهقة ، مرحلة انتقالية من الطفولة الى الرجولة هذه المرحلة يصاحبها الكثير من التغيرات الكثير من الأمور ، تمنو عند الشخص عند المراهق عند المراهقة اما البلوغية تعمل الغدة التناسلية وما يصاحبها من تغيرات او ميول البلوغ ، فالكثير من الناس يركز فقط على الجانب البلوغ عند المراهقين وينسى جميع جوانب النمو عند المراهقين كذلك نر؛ز في جانب مهم في المراهقة مرحلة المراهقة كما حددتها منظمة الصحة العالمية من عمر ١٠ الي ١٩ سنة فهي تقارب ٩ الي ١٠ سنين في مرحلة المراهقة فعمر كبير عند الشخص فهذه ٩ سنوات يصاحبها كثير من التغيرات يصاحبها كثير من أمور النمو فنركز على جميع الجوانب ولا نركز على جانب واحد عند المراهق الي هو البلوغ كثير ما يركز على الميول ،الجنسية عند المراهق ،التغيرات يالي بتصير فقط وننسى الأمور الآخري ومرحلة المراهقة مرحلة متكاملة، مرحلة نمو، ومرحلة عطاء ان احسنا التعامل معها "

آميتس كراد : " طيب أستاذ محمد شو هي خصائص هاي المرحلة بالظبط وشو هن المشاكل او العوائق يالي ممكن يتعرضلها المراهق او محيطي المراهق "

 محمد الشاعر : " الآن نتحدث عن اهم ٦ خصائص في مرحلة المراهقة الي هم اهم ٦ أمور : النمو الفسيولوجي ، النمو الجسدي يصير عند المراهق عند المراهقة ، النمو العقلي ، النمو الحركي كذلك النمو الانفعالي ، النمو الجنسي ، النمو الاجتماعي ، اهم ٦ أمور بتصير عند المراهق ٦ أمور النمو الي بيصير عند المراهق ،الآن  ايش اهم  السلوك بشكل عام عند المراهق وخصائص المراهق ، الآن هناك طفرة بالسلوك في هذه المرحلة ، مرحلة المراهق بيحس بالغرور بحس انه هو القوي بمن هم  حوله ، عنده عاطفة حساسة ، كذلك بنمثله كثير بمتقلب المزاج ، كيف الطقس بيكون بارد ثم ممكن يتغير كذلك المراهق كثير متقلب المزاج الآن كنت اضحك ماشاء الله عنك ليس معصب هاي من طبيعة مرحلة المراهقين لما نعرفهم نعرف نتعامل معهم كذلك اختلاف انتماءات اليوم معهم بكره انا ضدهم فبتختلف امورهم بهذه المرحلة ، عدم اطاعة الأموامر ما بيحب الأوامر نفذ نفذ نفذ ، ما بيحب اعطاء الأوامر بهاي الطريقة ، بيحب المجادلة كثيرا بينقاش  بينقاش لحد المجادلة ، عندهم عناد في هذه المرحلة ، هذه من أهم خصائص هذه المرحلة .

الآن نتحدث بشكل سريع عن بعض انواع النمو الي تحدثنا عنها الي بتصير بهاي المرحلة وكيف نتعامل معها بطريقة ايجابية ، الآن النمو الجسدي و يعني عند المراهقين النمو الفسيولوجي بيصير عنده زيادة في الطول، التغير في الصوت في هذه المرحلة ، ظهور بعض الأمور حب الشباب عند البعض وعدم التآزر ، النوم الطويل ، زيادة الاهتمام بجسمه لما انا اعرف انه المراهق بيهتم بجسمه اجي انا اقوله ليش جالسه على المراي ٣ساعات، ليش بتطولي من طبيعة يحب يبين افضل صورة فانا مرات بالإشي المميز عنده خصائصة لذلك انا بخلق المشكلة لما انا ما اعرف خصائص الموجوده عندة لان كيف بهاي المرحلة نحكي بالنمو الفسيولوجي اتعامل معاه بطريقة ايجابية ، مراعاة الفروق الفردية نفس الوقت ما اقرر ١٠ سنوات كما قلنا من ٩ الي ١٠ سنوات ممكن واحد زيادة طوله تكون باول مرحلة المراهقة المبكرة في ناس المراهقة المتوسطة في ناس متأخرة طيب في فروق فردية من الأمور الي اركز عليها نفس الوقت اركز على العناية بالتغذية في هذه المرحلة علشان اساعده بالنمو الفسيولوجي الي بيصير عند المراهق ، الحث على ممارسة الرياضة ، عدم التركيز النظر ليه ، اذا انت ركزت النظر اليه بيحس حاله ليش بيضل ينظر علي ايش فيا في اشي غلط في اشي عيب فما تظلك مركز عليه بالنظر او تظل تركزي على بنتك بيحس ان عنده شي غلط ليش بيظل يطلع علي شو في اشي فلط بجسمي علشان في امور مش ظاهره عندي ظهرت عندي الآن بيظل يطلعوا علي  ، فنظرك لأله تركز عليها هاي بتأثر فيه ، كسبه من خلال الحديث الايجابي معه هاي بالنسبة للنمو الفسيولوجي ، اما النمو العقلي في هذه المرحلة انا اسميها مرحلة نمو المراهق ، ان احسن التعامل معها في تغييرات كتير بتصير اذا احسنا التعامل معها بتكون نمو عند المراهق من الأمور : القدرة على الابتكار في هاي الأمور ، القدرة على التخيل بتخيلك امور انت ممكن ما تفكر فيها بطريقة المراهق بتخيل أمور خارج حتى عن الواقع اضيف هذا التخيل لشي واقعي ، حب المناقشة الي الجدال كذلك بيزيد عنده التركيز ، نعتمد في هذه المرحلة لكي نزيد عنده القدرات العقلية ، اعتماد الحوار لا التلقين مش بس القن لا اتحاور معاه ، زيارة المكتبات ، اشراكه في اندية رياضية متنوعة ، اندية بتراعي المواهب ، كذلك عرض نماذج لمبدعين وكيف يكون مثلهم لعلي اتحدث عن النمو الانفعالي وهذا اهم الأمور في هذه المرحلة يوم بتشوف البنت خجولة كثير ، يوم بتشوفها متشجعة كثير ، متغيرين عندهم سيولة انفعالية في هذه المرحلة ، عنده احساس بالذنب لما يعمل ذنب ممكن يظل يفكر فيه اشهر اذا ما علمته كيف يتفاعل مع هذا الأمر ، عنده خيال خصب كذلك ومن اهم أمور في النمو الانفعالي عنده الاهتزاز بالنسبة للثقة بالنفس يوم بتلاقيه عنده ثقة عالية يوم ما عنده ثقة بنفسه فعنده اهتزاز بثقته بنفسه وعنده مشكلة احلام اليقظة ، احلام اليقظة ليش موجوده عند هذه المرحلة بيهرب من العالم الي عايش فيه من العالم الواقعي الى عالم غير واقعي ، عنده أمور كتير بحياته مش قادر يحققها في هاي المرحلة فبيفكر في احلام اليقظة انه هو البطل كثير أمور مش قادر يحققها فبيحاول يحقق هذه الأمور الاحتياجات الي عنده من خلال احلام اليقظة والهروب الى هذا العالم ، الآن طبيعي احلام اليقظة موجودة احنا مرينا فيها احنا كآباء وامهات ولكن الها أثر اذا كانت كثيرة احلام اليقظة عند الشخص ، الآن كيف التعامل بهاي الطريقة انا كأب وأم بهاي الأمور باحلام اليقظة عند الطفل او عند المراهق أول أمر املأ وقت فراغة لما أملأ وقت فراغه اتحاور معاه ، احسسه بوجوده في البيت انا هشغله ولكن انا ما اشغلته سيشتغل بأمور أخرى ومنها  احلام اليقظة ، اشارة غير مباشرة احلام اليقظة اكثرها انك ممكن ما تركز في دراستك ممكن ما تركز بالأمر الي انت الآن بتقوم فيه ، تدريبه على حل المشكلات هو بيهرب بأحلام اليقظة مرات وأمور كثيرة مش عارف يعملها فأنا لما ادربه على حل المشكلات  بتغلب على هاي الأمور وتنمية الثقة بالنفس وننهي آخر خاصية ان شاء الله : النمو الاجتماعي ،هذه المرحلة وكثير منا ابني يقضي اوقات كثيرة مع اصدقاءه  ، ابني بنتي تقضي وقت طويل خاصة المراهق المتأخرة مع زميلاتها وصديقاتها ومعاي خمس دقائق بتصير اوف معاي في هاي المرحلة احنا من اهم الأمور بيحب عنده الشلة و الرفيقات والأصدقاء عنده  اهم من والده ووالدته فأنا من هو وصغير أسسله اصدقاء رائعين هيكونوا هؤلاء شلة الرفاق الأصدقاء مساعدين ليه فلما اعرف انه بهاي المرحلة ممكن يستمع لصديقه اكثر من والدته ووالده فأنا ما ارفض الأمر بأسسله اصدقاء من وهما صغار  بيأثروا فيه في مرحلة المراهقة فبيحب الاتصالات الشخصية بيحب مظهره الشخصي انه يكون افضل ما يمكن ، الاسقلال  الاجتماعي بيحب انه يستقل يحب انه هو يكون صاحب قراره ، يحب الزعامة ، يحب الشللية كما تحدثنا ، بينفر من السلطة ما بيحب السطلة انه كل اشي ابوه يعطي العمل ، بينفر من السلطة ، بيساير يعني المحيط المجمتعي الي حواليه ، كيف اتعامل مع هاي بطريقة ايجابية تقدير المراهق اقدره اعطيه مكانته اعطيه بعض المسؤليات الي يقوم فيها ، تحويل الزعامة الي قيادة ، تشجيعه بتحمل المسؤلية ، اعطيه قرار انه هو يأخذ القرارات ، التوجيه الواعي في اختيار الأصدقاء من الصغر مش استنى عليه انت كل اصحابك مش كويسين انت كل صحابك .. ، لا اعوده من هو صغير كيف يختار اصدقاءه، تشجيعه بالمشاركة المجتمعية ،اخذه معاي من وهو صغير ، اخذه معاي يشارك بالمشاركات الاجتماعية علشان اشجع عنده الجانب المشاركات الاجتماعية الايجابية ، مساعدته في اختيار التعليم والمهنة ، كذلك كل ما كان فيه حب وتفاهم وحوار بينا كل ما اتجاوزنا هذه الأمور كل ما كانت مراهقة مميزة بخصائصها المتنوعة "

آميتس كراد : "طيب أستاذ محمد ليس كتير ناس بتعتبر التعامل مع المراهقين أمر صعب وشو المهارات يالي الاهالي لازم يكتسبوها ليقدروا يتعاملوا مع المراهقين بأسلوب صحيح؟ "

 محمد الشاعر : "الآن المراهقة مرحلة عمرية كمرحلة الطفولة ليها خصائصها كمرحلة الشباب ، كزي مرحلة ولكن تركيز العالم كامل مراهق مراهق مراهق بيضع المراهق نفسه بيحس حاله بنظرة المجتمع انا مراهق انا منبوذ انا غير مقبول مجتمعيا ، انا غير مقبول بأسرتي ، فمرات طريقة التعامل بيحس كلمة مراهق حتى مرات احنا بنسميها يافع بنسميها مرحلة أخرى مرحلة العطاء لأنه كذلك مرات بعض الأشخاص بيسمعوا المراهق انا في بيتي مراهق يعني انا عندي هذا الشخص ايش في خلل في اشي فطريقة تعاملنا مع الأشخاص هي الي بتضع الشخص في مشكلة ، كذلك عدم فهم الولي الأمر بخصائص الي عند المراهقين ما يحتاج المراهقين ،الآن ما تحتاجه انتي وانا غير الذي يحتاجه الجيل الحالي ، الآن الخصائص هيا هيا ولكن متطلبات الحياة ، التكنولوجيا هاي الأمور ما كانت موجوده نحكي قبل ٢٠سنة ممكن ٢٠ سنة كانت موجودة على آباءنا قبل ٤٠ سنة ما كانت موجوده  كانت لعبة كرة هي وقت المراهقين الآن الجوال ، وسائل التواصل الاجتماعي ، التغيرات كلها هاي بتأثر على المراهقين ، الآن بدي اعددلك شركاء التربية سابقا امرين اثنين التربية الاسرة ، المدرسة واذا كان في نادي في المنطقة ، الآن وسائل التواصل الاجتماعي بتشارك التربية ، الاعلام بيشارك بالتربية .

المعروفين بالسوشيال ميديا ، باليوتيوبر هاي الأمور كلها صارت شركاء تربية فتعددت شركاء التربية وتعدد حب التقمص للآخرين عند بعض المراهقين انه صار يحب بده شهره بده يشارك بالتواصل الاجتماعي هاي كلها صارت لها أثر عند المراهقين احنا مرات ما نطلع ممنوع نستخدم وسائل التواصل الاجتماعي بس ممنوع بس ليش خلاص ممنوع طيب انت بتعرف لا خلاص بس ممنوع ما تناقشني ما تحاورني طيب كل اصحابي بالمدرسة بيتعاملوا فيها كل صديقاتي بيتعاملوا فيها فيا أولياء الأمور اعطي أمر من غير ما يعرف هذا الأمر فمرات بعض الأوامر انه انا قبل ٤٠ سنة ربوني هيك الآن ربوك هيك ولكن الجيل اتغير ، المتطلبات الحياة اتغيرت فضروري علشان تكون حياة رائعة مميزة نواكب عصر ابنائنا ، نعرف ايش الخصائص الي بتميزه بهاي المرحلة  هي مرحلة انتقالية دائما اي أمر حتى انت بتنتقل من بلد لبلد بتحس بصعوبة بأوليتها فأنا لما طفل عنده خصائص الطفولة بده ينتقل بيصير رجل هاي الانتقال هيكون صعب على المراهق نفسه عمن حوله لانه اسألك سؤال الآن نعامل المراهق كطفل ام كرجل ام نسأل المستمعين الي بيستمعونا بنعامله كطفل ام كرجل الآن في ناس يقول كطفل في ناس يقول كرجل الآن انا بقول نعامله معاملة الرجل ولكن نتوقع منه تصرفات الاطفال لانه لسه ما صار رجل لساته هو في مرحلة انتقالية فلما انا اضع المراهق في مكانه الصحيح لا تقول انه رجل وكذلك ولا تقول طفل تعامله كطفل انت عامله معاملة الرجل ولكن اتوقع بكل سهولة ان يتصرف تصرفات الاطفال لانه الى الآن لم يصف رجل وكذلك هو ليس طفل مرحلة انتقالية فالمرحلة الانتقالية بتغيير هرمونات بتغيير أمور كثيرة بجسمه بتغيير الجانب الاجتماعي عنده الانفعالي هاي كلها بتأثر على المراهق عمن هم حوله ، كذلك من الأمور الي بتأثر على المراهقين كثير الآباء والأمهات بدي ابني يكون مثالي بكل اشي مثالي ، المثالية مفيش شخص بالحياة مثالي ولا شخص بالحياة بيكون مثالي بكل شي نحن نسعى انه نكون مميزين ابناءنا ولكن نرضى بالوسطية ارضى بالإشي الوسط ولكن اسعي بكل اشي مثالي مثالي لن تحقق المثالية وهتظلك بحرب ومعركة ما بينك وما بين ابنك اسعى للتميز ولكن ارضى ان تكون بالمتوسط ما بينك وبين ابنك هون بتكون كسبت المراهق عرفت تفهم المراهق ، اتدربت عليه ، عرفت هو بيرجع ليك لما يكون عنده مشكلة بيرجعلك ولكن اذا عرف المراهق لما انا ارجع لوالدي او والدتي هتكون المشكلة صغيرة هتصير اكبر ما هيرجعلك وهتكبر المشكلة وحترجعلك بعد ما تكون مشكلة كبرت ولكن اذا عرف الإبن انه انا لما ارجع لوالدي ولوالدتي هيسمعلي فقط هيسمعلي قبل اي اجراء هيسمعلي بطريقة مناسبة انا هون فهمت ابني وكان قريب مني ولكن اذا كان عرف الابن او البنت انه انا لما بروح لوالدي ولوالدتي قبل ما يسمعني هيبلش بمحاضرة ونحنا كلنا ما بدنا محاضرات هيبتعد ما هيتقرب منك فضروري ما يكون احنا محاضرين دوما محاضر محاضر محاضر هيسمع يقولك خلصت حاضر شكرا وما هيستجيب ليك فنبعد عن اسلوب المحاضرات الي يتخذوها بعض الآباء في كل كبيرة وصغيرة محاضرة فهاي ما بتأثر في الأبناء "

آميتس كراد : " طيب هلا بدنا نحكي من جانب المراهق كمان لانه هو كمان بحاجة انه يتعلم ويكتسب مهارات ليقدر يتعامل مع الفترة يالي هو فيها مع التغيرات يالي عم بيواجها فشو هنا مهارات تعامل المراهق مع المراهقة ؟"

محمد الشاعر : " طيب الآن ايش اهم المهارات لهذه المرحلة للمراهق أول اشي اعرف نفسي انا كمراهق الآن هذه مرحلة بناء ، بناء متكامل بناء في الجانب الفسيولوجي ، الجسدي ، كذلك بناء في جانب هرمونات عندي كذلك بناء في جانب الانفعالي ، الاجتماعي ، الجانب النمو الجنسي ، مرحلة بناء متكامل عندي انا كمراهق في هذه المرحلة اذا نميت جميع الجوانب بناء صحيح هتأثر علي في جميع حياتي بجوانب ايجابية ولكن اذا ما ركزت بس ركزت على جانب واحد بالنمو ، الميول الجنسي عندي بالتغييرات الغدد الجنسية عندي بس ر؛زت على جانب واحد الجوانب الأخرى  الخمسة الأخرى فالتركيز يكون على جميع الجوانب في هذه المرحلة ، اذا عرفت انا ايش بيصير معاي في هذه المرحلة ايش خصائص هاي المرحلة ، كيف تكون مرحلتي مرحلة ايجابية هتكون بناء لإلك ، بناء للجانب العقلي ، الانفعالي الجسدي بجميع مراحل الي عندك ان شاء الله في اي مرحلة.

ايش انا كمراهق اهم شي ، اختيارك للأصدقاء ، اخترت اصدقاء صالحين اذا اخترتي ، كل فتاة اختارت صديقات رائعات مميزات هيكونوا  يعاونوك في هاي المرحلة للخير كذلك من اهم المهارات عندك لا تسرع في اتخاذ القارارات ، اتخاذ قرار سريع من الممكن ان تضر اقرب الناس ليك ممكن انت غصبان كمراهق تضرب اخوك تضرب اختك ممكن هاي الضربة بقوتك الجسدية الآن ، ممكن ضربة منك تأدي فيه يذهب للمستشفى ممكن تخسر عين اخوك تخسر عين اختك علشان اخدت قرار سعيد فما تأخذ قرار سريع وقراراتك السريعة بتكون اكثر قراراتك كمراهق داخل اسرتك فمن الممكن الأثر الي هتعمله هيكون أثر الآن ويبقي على طول الحياة فتخيل لا سمح الله ان يخسر احد قريب منك يده ، عينه علشان انت معصب ضربت أحد فما تأخذ قرار او تضرب شخص قريب منك سريعا .

طلب المساعدة كثير أمور  والله بيصير معاه ما حصل اشي اول مره بيصير معي انا أول مره وان شاء الله تمر مرحلة المراهقة بسعادة ولكن صار معاك امل بلجأ لوالدي بلجأ لوالدتي بلجأ لشخص عندي ثقة فيه بسأله سؤال عن مرحلة المراهقة .

النظر الى الجانب الايجابي كلنا عندنا ايجابيات وسلبيات مفيش شخص كامل ولكن انظر كيف يستمر الجانب الايجابي الذي يجعلني سعيد وكذلك كيف ممكن ان اتجاوز الجانب السلبي ، الآن اتحدث بالمشاكل التي تواجه المراهقين نقسمها ٣ اقسام : الجانب الأول : افكر بقليل من الوقت بتجاوز المشكلة ، الجانب الآخر بده شويه وقت بده شويه مال بده شويه أخر ممكن يأخذ قرار ، الجانب الآخر لام يمكن تجاوزه عندك بعض اذا صار عندك حالة وفاة خلاص حالة وفاة لا يمكن تجاوزها عندك والدك والدتك عصبية وشديدين بالتعامل تقدر تغير والدك او والدتك ما تقدر تغيرهم الآن ايش المشكلة بهذا الأمر كيف نحل هاي الأمر ، التكيف مع الوالد والوالدة ، والدي عصبي طبيعته عصبي هتغيره انت الآن انت والدك ما هتقدر تغير انطباع والدك ولكن بقدر اغير تعاملي مع والدي اني ما بعمل اشي بيخلي والدي يعصب ما بعمل اشي بيخلي والدتي تعصب فأنا بقدر اتكيف مع نفسي ، كيف اتكيف لكي تكون اسرتي بسعادة فكلا بركز على الجانب الايجابي ، كيف نتجاوز الجوانب السلبية ، ساعات ما هو ضروري بهاي المرحلة تكون عندك ساعات نوم كافية ، النشاط البدني من الأمور المهمة والنشاط البدني بيزيد عندك هرمونات الساعدة احنا نبحث كلنا عن السعادة بحياتنا فتخيل يعني تمارس رياضة كل نحكي في الاسبوع ٣ ساعات كل نص ساعة تقريبا في اليوم هاي النص ساعة بتزيد هرمونات السعادة عندك افرازها فتكون سعيد فالنشاط البدني بيساعدك انك تكون سعيد في حياتك كذلك اتباع نظام غذائي صحي علشان ينمو جسدك نمو صحيح افعل ما تحب دون ان يكون له أثر على الآخرين ، نمي علاقاتك مع الآخرين ، نمي قدراتك ، استغل طاقاتك لديك طاقات عظيمة لديكي طاقات عظيمة ، استغلي هاي الطاقات لتكون مرحلة المراهقة مرحلة متميزة مرحلة عطاء مرحلة انجاز"

آميتس كراد : " عظيم كتير يعطيك الف عافية على كل النصائح وهلا كنت عم بقول بيني وبين نفسي انه ياريت انا كمان بالمراهقة قدرت اسمع هاي النصائح وياريت لو وقتها كان في توعية أكبر عن المراهقة اكيد كنا عشناها بسلام اكتر وبانجازات اكبر طيب هلا بدنا نعكس السؤال بدنا نعرف مهارات تعامل المراهق مع أهله "

محمد الشاعر : " الآن طريقة تعامل المراهق بتع اسرته الآن نعطيكي أمرين للمراهق اما ان يقبل اسرته اما ان يرفض اسرته قبلت اسرتك قبولك ليهم بيجعلك تقبل نفسك بيجعلك تقبل تعاملهم ، رفضت اسرتك هترفض نفسك ، هتضع نفسك بمشاكل كثيرة فمن اهم الأمور للمراهق اقبل اسرتك انت الآن مش احنا اخترنا مين ابونا وامنا احنا نختار هاي سنة الحياة  فبدك أول أمر انك تقبل اسرتك بعد قبول الأسرة ، كيف اتعامل مع والدي ووالدتي من أجلي أنا قبل من أجل الآخرين لكي اكون سعيد في حياتي بدي اتفاهم كل ما كان في لغة تفاهم ما بيني وبينهم ما اضع نفسي قاضي ومحامي وهناك شخص بشكي عليه نحن أسرة ، أسرة نقضي حياتنا كلها مع بعض فاذا نظرنا نظرة للأسرة ، أسرة سعيدة من أجل نفسي ومن أجل الآخرين بتكون حياتي حياة سعيدة .

التفاهم مع الأسرة ، الثقة بالأهل ، الآن والدي ووالدتي بعض القرارات ياخذوها  أكون مش راضي عنها بس وجهة نظري انا ،فك أنا بنظر نظرة واحدة ، ابوي ما بيحبني امي ما بتحبني لانه اخذوا هذا القرار ولكن لما أفكر بطريقة أخرى نفكر بطريقة أخرى ليش أخذوا هذا القرار أسأل نفسي ممكن لأنه حريصين علي زيادة شايفين ان هذا الأمر الي عملته بيأثر علي فدوما لما انظر بنظرة أخرى ، فكر ضع نفسك دوما مع ضد محايد

حط أول اشي ضدهم خد انه والله بيحبوني  طيب مع لانهم خايفين علي محايد ممكن هيك ممكن هيك لما افكر بهاي الطريقة بصير اعرف ان اهلي لما بياخذوا القرار ما بياخذوه علشان بيكرهوني لا هم بيحبوني ولكن انا نظرتي بس اني ضد فكرت انهم بيكرهوني ، كذلك كل ما انا كنت حنون بالتعامل معهم هيكونوا حنينين بالتعامل معي كل ما تقبلت رأيهم شوارتهم بيحسوا ان ليهم دور مش خلاص انا بعيد عنهم لن تنفصل عنهم كليا انت جزء من هاي الأسرة فهتكون قريب منهم وكذلك اذا كان في لغة حوار هاي لغة الحوار بتأثر على الآسرة كاملة فأنا كمراهق اذا اوجدت لغة حوار مع والدي مع والدتي لما اطلب الأمر اطلبه بطريقة ايجابية ، هذا الأمر بيخليك تحصل على الي بدك اياه ولكن اذا كان ما فيه لغة حوار لغة تفاهم لغة قبول للأسرة هيكون رفض وهتكون أواجه مشكلات أخرى ، فتقبل أسرتك ، اوجد لغة حوار معهم ، اتفهم عندما يأخذون قرار انظر نظرة شاملة للموضوع بتكون حياتي افضل وبيكون تعاملي مع أسرتي افضل "

آميتس كراد : " سؤال اليوم من صبية بتقول انا عايشة مع اهلي واهلي كتير عم يضغطوا علي وعم يمنعوني ويحرموني حتى من ابسط الشغلات بالحياة فبرأيك كيف اتصرف معهم بطريقة صحيحة طبعا هي قصدها كيف تتصرف مع الاهالي المتعصبين والمتشددين مع اولادهم ؟ "

محمد الشاعر : " هاي كثير البنات بيواجهوها اكثر من الشباب بهذا الأمر بيواجهوها لأكثر من جانب خوفا بنظرة المجتمع على البنت فبيخافوا عليها الخوف الزائد زي ما بنحكي انه حتى بتكبر بتتزوج خايفين عليها زيادة عن الشباب دائما البنت نظرة الآباء  ، أول رسالة برسلها لكل أب ولكل أم البنت الشاب انسان لديه مشاعر لديه احاسيس ، انسان طبيعي احنا انسان فهاي المشاعر والاحاسيس اذا انا ما راعيتها لابني وبنتي مين هيراعيها اذا انا الأب والأم انا المصدر الأول للاحتواء لكل بنت فاذا انت ما احتويتهم مين هيحتويهم فانت اذا ما احتويتهم هيلجأ لغيرك علشان يغطي هذا الجانب الي عنده هيغطي جانب العاطفة الي عنده جانب الحنان هيبعد عن الأسرة علشان يغطي هذا الجانب فأول رسالة لكا أب وأم : احتوي ابنك ، انت اذا ما سمعت بنتك منك بحبك وتحضن بنتك في ناس تقول انا احضن بنتي طيب مين يحضنها اذا ما شعرت بهاي الأمر وهي لسه بنت صغيرة وهي مراهقة فكثير من الآباء عندهم يقولك لا ما عندي هاي ما بيصير انت تكون اقرب تحضن بنتك ،تحبها ، نفس الأمر تحضن ابناءك في ناس عندهم هذا الأمر مش موجود في اسرته للأسف مرات بيلجأوا لأمور أخرى بغير قصد ولكن جانب عاطفي كنا بحاجه لحب كنا بحاجة مين يحترمنا اذا ما غطوه الأهل للأسف بنلجأ لجانب آخر ، الآن البنت الآن هل من الممكن أغير بأسرتي اتحاور معهم مين أقرب واحد بالأسرة والدي والدتي اختي ، أحاول اوجد شخص يكون قريب مني احاول اغير معهم قدر المستطاع ، اركز على الجانب المشرق في أسرتي ، الآن ما في أسرة كلها سلبية وكذلك ما في أسرة كلها ايجابية ، كل أسرة لديها جانب ايجابي وسلبي وهنا علم النفس الايجابي ايش بيقولك بركز على الجانب الايجابي في حياتي و الي يجعلني سعيد في حياتي وكذلك الجانب السلبي كيف نتجاوزه ، الجانب السلبي والدتي ما بتحب اطلع من البيت كثير بحاول اطلعها معاي اذا بتوافق تطلع معاي بحاول اطلع بتوافق اطلع بيت خالتي يعني احاول اي اشي بيوافقوا عليه اعمله ، كذلك البنات كيف ممكن اتكيف الأمر ما تركزي على الجانب السلبي بأبوكي وأمك ، كيف اقضي وقتي بعيد عن هذا الأمر ايش ممكن اشي بس يكون شخص لديه اشي بيخليني ارتاح ، فيه شخص بيسمع موسيقى بيسترخي ، فيه شخص لما بيتحدث مع حدا بيحبه بيسترخي ، فيه شخص بيحضر مباراة ، كل واحد بيحب اشي في الحياة علشان تتغلبي على هذا الأمر ، اسرتك عنيدة ، اسرتك لن نغير طباع الوالدين ولكن بنحاول نعمل الشغلات الي ما بتخليهم يعصبوا ، الشغلات الي ما بتخليهم عنيدين وآخرا احاول بالحوار مفيش اشي ما بيتغير ولكن بده طريقة حوار ، اتحاور معهم واقول شو رايك نعمل هيك شو رايك هيك وضع  ولكن للأسف في كثير الى الآن نظرته زي ما أنا والدي ووالدتي ربوني بدي اربيكي بالصراخ بالعناد خلاص لا يعني لا هاي الآباء العلاج مش للبنت بده العلاج للأب والأم يعني نحاول بطريقة غير مباشرة نخليهم يسمعوا محاضرات نشاركهم ببعض الورش نبعتلهم فيديو نبعتلهم بعض المقالات ممكن تغير فيهم ولكن هي المشكلة مش البنات هذا العلاج بيكون للأب والأم قبل ما يكون للبنت بس البنت ركزي على الجانب الايجابي لأنه الجانب السلبي بتظلي تفكري فيه هتظلي تعيشي حياتك تعيسة ، فكري اني أنا الآن معهم بعد سنتين ممكن آكون مش معهم اكون ببيت آخر ففكري كيف هاي السنتين تكون ذكريات ايجابية مع اسرتي قبل ما اركز على الجانب السلبي مع اسرتي "

آميتس كراد : " أستاذ محمد يعني على قد ما هذا الموضوع مهم لكتير فئة من الناس وعلى قد ما عندك معلومات تعطينا اياها وعلى قد  ما في ناس منتظرة تسمع معلومات اكتر واكتر فأكيد حديثنا ما انتهي لهيك راح نكمل بشكل أعمق وتفاصيل أدق بالحلقة الجاية كمان عن هاي السؤال وكتير أسئلة تانيه كل شخص انا ما راح اقول المراهقين انما راح اقول الفئة الشابة المقبلة على بناء حياتها فلهيك بتشكرك كتير لليوم أستاذ محمد وأكيد الأسبوع  الجاي راج نرجع نلتقي وراح نرجع نكمل الأسئلة يالي في بال كل مستمع لحتى ما نعطي كل المعلومات يالي ممكن تساعد  هاي الفئة في بناء حياتها بشكل سليم ومسالم شكرا كتير مرة تاينة أستاذ محمد شرفتني جدا وأسعدتني بحضورك وشكرا لكل المستمعين وانتظرونا الأربعاء القادم تكملة لموضوع اليوم مع أسئلة مختلفة ومعلومات جديدة "

محمد الشاعر : " الله يسعدك وأنا سعيد جدا كان لقاء ممتع جدا الله يحفظك ويسعدك وصراحة اسلوبك كان رائع جدا الله يحفظك وان شاء الله نظل على تواصل دوما بإذن الله وان شاء الله نكون قدمنا إشي يليق فيكي ويليق في برنامجك المميز "

آميتس كراد : " شكرا كتير أستاذ محمد انت ما قصرت علينا بالمعلومات وشكرا أعزائي المستمعين لحسن استماعكم ولوقتكم ودمتم بأمان الله واذا كنتوا حابين ترسلولنا سؤال بإمكانكم دائما تتركوا سؤالكم بالتعليقات على انستجرام راديو الآن دمتم بأمان الله .