التكيّف مع بوكس العجائب .. كائنات فضائية ومزارات دينية

محمد علي

كيف تتأقلم مع التغيير ؟ ماذا تعلم عن الإنترنت العميق ؟ هل تعلم أن البشر قاموا بإرسال رسائل إلى الفضائيين ؟ كل هذا وأكثر في الحلقة الأولى من البودكاست المفضل! يقوم مستمعو البودكاست بترشيح برامجهم ...

تابعوا البرنامج على تطبيقات البودكاست

كيف تتأقلم مع التغيير ؟ ماذا تعلم عن الإنترنت العميق ؟ هل تعلم أن البشر قاموا بإرسال رسائل إلى الفضائيين ؟ كل هذا وأكثر في الحلقة الأولى من البودكاست المفضل!

يقوم مستمعو البودكاست بترشيح برامجهم أو حلقاتهم المفضلة و يتم اختيار الحلقات المميزة ومناقشة وتلخيص مواضيعها في رحلة ممتعة ، مسلية ومفيدة!

يمكنكم التواصل و إرسال برامجكم أو حلقاتكم المفضلة عن طريق الواتساب على الرقم: 00971568531592

بودكاست من المستمعين وإلى المستمعين!

في الحلقة الأولى تم اختيار ٤ حلقات مميزة:

١- “تكيُّف” من بودكاست كنبة السبت ، منصة مايكس.

٢- “بوكس العجائب” من بودكاست عناكب الشبكة ، منصة Rising Giants.

٣- “رسالة إلى الفضائيين” من بودكاست دبي المستقبل ، مؤسسة دبي للمستقبل.

٤- “المزارات الدينية الوهمية في العراق ، جهل مقدس و تجارة رابحة” من بودكاست بالعراقي مع سجد ، أخبار الآن بودكاست.

إنتاج ، كتابة ، تصميم صوتي وتقديم : محمد علي
الهوية البصرية: أحمد صادق و مديحة طه

..

 

 

نص الحلقة :

تعليق صوتي: "البودكاست المفضل .. بودكاست أخبار الآن"

محمد علي:

لما بتفتح أي أبلكيشن بودكاست عشان تسمع حاجة جديدة ، غالباً بيبقى هدفك الأساسي إنك تستمتع ، و يا سلام كمان لو هتستفيد!

في كل حلقة ، أنا هديلك فكرة و ملخص سريع عن أفضل حلقات بودكاست أنا سمعتها خلال الفترة اللي فاتت ، و اللي من وجهة نظري تستحق الاستماع و المتابعة.

أتمنى ليكم رحلة استماع مميزة ، أنا محمد علي ، و دا .. البودكاست المفضل!

في بداية أي تجربة جديدة بنعيشها غالبا بيكون في رهبة كده أو قلق مش هبالغ لو قولت خوف شديد ، طبعا في ناس بتحب جدا البدايات دي وبيقدروا يتكيفوا معاها ويستمتعوا بيها كمان بس في نفس الوقت في ناس تانية البدايات دي بتبقى بالنسبة ليهم صعبة شوية ومش سهلة عليهم انهم يتأقلموا معاها  أو يتخطوها أصلا ده زي ايه ؟ زي تجربتي مع الحلقة الأولى من البودكاست الي بقدمه لحضراتكم ده .. كنت مقلق منه بصراحة ،محمد ايه رأيك تعمل بودكاست بيلخص أفضل حلقات بودكاست انت سمعتها الفترة الي فاتت ، ايه ؟!، هتقول رأيك فيهم وتناقش مواضعيهم كمان لو حبيت! ، اممم ،ماشي تمام يالا بينا ، فبدأت أخطط للموضوع وأتخيل ازاي ممكن أقدم الفكرة دي وبدأت أسمع حلقات كتير وأتعمق في حلقات بودكاست مختلفة كل ده وانا قلقان شويه بيني وبينكم .. لحد ما لفت انتباهي عنوان الحلقة الي هبدأ بيها انهرده والي هي من كلمة واحده بس : "التكيف" ، الله! دي بداية عظيمة يا أبوحميد لرحلتك ورحلة مستمعينك الأعزاء ، حلقة بتناقش مرحلة التكيف من بودكاست كنبة السبت الي بتقدمه الدكتورة أفنان الغامدي ، وكانت الحقيقة من أمتع حلقات البودكاست الي سمعتها الفترة الي فاتت "

 

د. أفنان الغامدي : " مرحبا بكم في حلقة جديدة من بودكاست كنبة السبت ، البودكاست الذي يحمل طابع نفسي واجتماعي وفلسفي في احيان اخرى .

اليوم في حديثنا عن التغيير ، احب ان اتكلم عن مدى أهمية التغيير قبل ما نقول كيف اتعامل او اتعايش مع التغيير "

 

محمد علي: " بتحس بإيه لما تبدأ مرحلة جديدة في حياتك ؟! ازاي تتكيف مع وضع جديد عليك ؟ ، شغل جديد ، بلد جديدة ، أو حتى بيت جديد ، طبيعي جدا انك تحس بقلق من التغيير ده مش بس طبيعي ده القلق ده إلزامي "

 

د. أفنان الغامدي : " بالتأكيد هو شيء إلزامي "

 

محمد علي : " ليه أكيد جانب ايجابي وفيه جانب سلبي ، انت بتكبر وبتكبر معاك أفكارك وخبراتك بس فيه كمان مشاعر سلبية أكيد ممكن تكبر معاك ، مشاعر نقدر نقول عليها انه هي مشاعر مضطربة ، طيب فين المشكلة ، المشكلة تكمن في انكارنا لهذه المشاعر ، الانكار يا عزيزي ، اعترف انه انت بتمر بمرحلة صعبة ، اعترف انه التغيير مش سهل عليك ، عادي مفيش مشكلة ، لما تسمع حلقة التكيف من بودكاست كنبة السبت هتلاقي الحلقة دي بتحلل المرحلة دي وتجاوب على أسئلة كتير زي ازاي أحمي نفسي من التقلبات ، ازاي اتغلب على القلق الي ممكن يحصلي في فترة التكيف واليكم خلاصة تجربتي مع الحلقة دي والي استفدته منها بعد ما سمعتها .

خلاصة الحلقة بتقول انه احنا يجب علينا مننكرش مشاعر القلق دي ونبقى مدركين تماما انه أي تغيير بيحصل في حياتنا أكيد هيكون في بعض المشاعر السلبية والقلق والخوف الي يجب انه احنا نحاول نتغلب عليها ونحاول نتأقلم معاها ونوصل لمرحلة التكيف .

في ناس شايفة أصلا مرحلة التكيف أو لما بتسمع كلمة التكيف بتحس بالأمان "

 

د. أفنان الغامدي : " تشعرون بأنه الله تكيف ، لما الواحد يوصل لمرحلة انه ارتاح مع التغيير "

 

محمد علي : " في ناس بتقولك التكيف ، اه يعني في تغيير ، لا دي حاجة تخوف جدا "

 

د. أفنان الغامدي : " قد تكون عند البعض قد يجي المعنى كده انه معنى سلبي ، التكيف لما الواحد يستسلم بعد محاولة انه يقاوم التغيير او يتعب مع التغيير فيستسلم فيتكيف مع الوضع الصعب "

 

محمد علي : " فكلنا شخصياتنا مختلفة ، وكلنا طريقة تعاملنا مع التغيير بتكون مختلفة ، خلال الحلقة دي كانت الدكتورة أفنان بتسجل ومعاها أخوها عبد الرحمن كان حاضر معاها وقت تسجيل الحلقة فهي أخدته كمثال للتعبير عن مشاعرة في تجربته مع التكيف فمن موقعي هذا انا هعتبر نفسي كمان عبد الرحمن في الحلقة دي وهحكيلكم نبذة عن قصتي مع التكيف والي اتعلمته منها واستفدته من الحلقة دي.

وجهة نظري وطريقة تفكيري مع أي حاجة جديدة ممكن تحصل في حياتي اتغيرت بشكل كبير وبقيت حاسس انه انا كمان متشوق جدا يحصل أي تغيير في حياتي لأنه أنا عايز ابقي بالعقلية الجديدة الي هتواجه التغيير ده وتحاول انها تتكيف مع الوضع الجديد ، أيا كان الوضع الجديد ممكن يكون حاجة ايجابية ، حاجة سلبية انا متوقع جدا انه التغيير ده ضرورة لابد منها  في الحياة ، احنا مش هنطور واحنا مش هنتغير غير لما يكون في تغيير حقيقي بيحصل في أفكارنا و في حياتنا ، في الأحداث الي بنمر بيها ، فده شئ طبيعي جدا "

 

د. أفنان الغامدي: " التغيير واجب ، التغيير لازم "

 

محمد علي : " زي ما قولت لحضراتكم انا كنت شوية قلقان لما اتقالي انه مطلوب مننا نعمل بودكاست جديد وانت يا محمد الي هتقدمه والفكرة عبارة عن كذا كذا كذا  ، هل انت متحمس ، انا في الأول اه أوك  متحمس بس برده في خوف ، في رهبة ولكن مع مرور الوقت والفكرة بدأت تتدخل دماغي ، بدأت أقول لنفسي طيب ما دي حاجة جديدة ، حاجة جميلة يعني ممكن انت تشتغل عليها وتطلع منها حاجة كويسة وتنفذها انت بشكل جميل وفعلا الناس تستمتع بيها ، لقيت انه انا تفكيري بيوديني لناحية انه انت لما تنفذ الحاجة دي وتطلعها بشكل انت راضي عنه ، شكل يعجبك ، انت هتكون مبسوط في النهاية .

أنا بلاقي نفسي بتحمس جدا لما بنفذ حاجة وتطلع فعلا حلوة بالشكل الي انا متخيله ، فهنا بدأ عقلي يستوعب انه انا علشان اتخطى المرحلة دي من التغيير لازم أبدأ تنفيذ وأشوف النتيجة بعينايا وأسمعها وساعتها انا هكون في قمة سعادتي وهكون مرتاح وقدرت انه اتكيف مع الوضع الجديد وبالعكس هحبه وهبدأ انه انا أسجل حلقات أكتر وأكتر وأكيد الحلقات دي هتتطور مع مرور الوقت وهتبقى أحلى وأحلى "

 

د. أفنان الغامدي : " فدائما احنا نسعى إلى التغيير الداخلي من أجل أن نحصل على التغيير الخارجي "

 

محمد علي : " دكتورة أفنان قالت في الحلقة انه تقريبا ٣ شهور هي دي الفترة المثالية الي ممكن يحصل فيها  التكيف وفي ناس بياخد معاها الموضوع شوية وقت وفي ناس تانية لا تتقبل التغيير وبتتعب و بتعاني جدا جدا ، حاجة كمان .. طريقتك في التكيف مع التغيير ده مش بالضرورة أبدا تكون مفيدة لغيرك أو انه مثلا لازم يعمل بالظبط نفس الي انت عملته علشان يتكيف هو كمان مع الظروف الي عنده  الظروف الخاصة بيه ، هو ظروفه وشخصيته مختلفة تماما عنك وطريقة تأقلمه وتكيفه مع أي وضع هو بيمر بيه أكيد مش بالضرورة تكون زيك ، فالصح انه انت تعمل ايه ، الصح انه انت تنصحه من خلال تجربتك نصيحة بشكل عام و لكن تسيبه هو يلاقي الطريقة المناسبة الي تريحه في التأقلم والتكيف مع ظروفه هو الشخصية ، انت ممكن تكون بتتعامل بسرعة من التغيير وتقدر تتكيف لكن هو ممكن يكون محتاج شوية وقت ، فخلاصة الحلقة دي : ..  "

 

د. أفنان الغامدي : " اسمح للقلق أن يكون موجود ، اسمح انك تطلب المساعدة ، اسمح لنفسك أن تفضفض ، تأكد أنه حتى لو كان تغيير إيجابي من حقك أن تقلق من حقك أن تخاف نوعا ما ، تضطرب مشاعرك نوعا ما لكن هي مسألة وقت "

 

محمد علي : " بس زي ما قولت ، أنت وشطارتك في مرحلة التكيف والتأقلم المفروض انها متزيدش عن ٦ شهور ، ولو ده حصل وقعدت معاك أكتر من ٦ شهور غالبا ساعتها هتكون في حالة نفسية وصحية أكيد مش كويسة ، فالنصيحة انه مش عيب أبدا انك تراجع طبيب أو مختص عشان يساعدك ويستمعلك ويحاول انه هو يوجهك في رحلتك في التأقلم مع التغيير ، و علشان كده لازم انتوا كمان تتحملوا معايا مرحلة التغيير الي هنمر بيها دلوقتي حالا علشان احنا قربنا نوصل على المنطقة التانية "

 

د. أفنان الغامدي : " واذا احنا ما تغيرنا وتواكبنا مع الحياة ربما فعليا لا نصل إلى الأشياء التي نريدها وأحيانا نعتقد أننا سنصل ولكن للأسف بدون التغيير الداخلي لن نصل الي الأشياء التي نتوقع انه نصل لها "

 

محمد علي : " الحلقة التانية المميزة الي لفتت انتباهي كانت واحدة من الحلقات الي ممكن تمون مخيفة للبعض ، بس متخافوش انا بس هديكم فكرة بملخص سريع عن الموضوع ، البودكاست الي معانا انهاردة في المحطة دي هو عناكب الشبكة وهو بودكاست متخصص في سرد قصص وجرائم من عمق الانترنت وفي اطار يثري التجربة السمعية واحدة من الحلقات بعنوان بوكس العجائب الي بتقدمها منصة Rising Giant Network  ما تيجوا نسمع مع بعض برومو الحلقة الي هما نزلوه ونرجع لبعض تاني "

 

مقدمة بوكس العجائب  : " موضوع اليوم هو عبارة عن شخص يصور وهو يحفر وفي لحظة يوقف حفر تسمع صوت صندوق السيارة الخلفي وبعدها يتابع حفر وفي الخلفية تسمع صوت كيس يتحرك وتسمع صوت ضرب المحرفة وبعدها يسحب الكيس ويرميه ويرمي عليه التراب "

محمد على : " اممممم، حلو جدا حلو جدا ده ، اعتقد انه انتوا اتخضيتوا شويه والله وانا كمان ، البرومو الي سمعناه من شويه ده أثار فضولي جدا وقررت ساعتها انه اسمع الحلقة كاملة ولما سمعت الحلقة الكاملة كنت فعلا مستمتع بطريقة السرد وصوت مقدمة البودكاست والجو العام الي بيثري فعلا التجربة السمعية زي ما هما كاتبين أصحاب البودكاست ، هو أه بيثري التحربة السمعية وكل حاجة بس كان يخوف شويه الصراحة ، كنت هستمتع أكتر لو كانوا مثلا قللوا حدة الموسيقى والsound effects  حاجة بسيطة او كانوا يخرجونا من المود ده بأي حاجة كده سريعة مثلا افيه مثلا تخرجنا شويه برا الجو المرعب ده بس مش مشكلة كل ده تمام ، المهم ان القصة نفسها كانت مثيرة فعلا وهي الي شدتني ، القصة باختصار عن شاب يوتيوبر عنده قناة كبيرة اسمها Mind seed Tv   قناة بتقدم محتوى مريب وعجيب عن استكشاف الأماكن المهجورة او الي بيتقال عنها اساطير وحاجات مثيرة للشكوك وبيستكشفوا فيها تجارب من الجانب المظلم من الانترنت او ما يعرف او ما يعرف ب deep web  او dark web  وهو ده موضوع الحلقة "

 

Mind Seed TV : There are a lot of  bad things that happened on the deep web

 

محمد علي : " في فترة كده كانت طلعت موضة بين اليوتيوبرز و  تحديدا الي بيعملوا فيدوهات ال unboxing الي مش عارف ال unboxing   هو  انك تصور فيديوهات وانت بتفتح علبة لمنتج جديد اشتريته أو حاجة زي كده وعايز المتابعين بتوعك يشوفوا ايه مكونات المنتج ده وازاي بتستخدمه ، ازاي بتفتح العلبة وبتلاقي جواها ايه والكلام ده بس الموضة الجديدة دي بقي كانت انك تعمل unboxing  لطرد عشوائي انت بتشتريه من ال dark web  متعرفش ايه محتوياته ولا حتى مين الشخص الي بعتهولك ، الdark web  معروف عنه انه وسيلة لبيع وشراء وتسهيل عمليات و أشياء مرعبة غير قانونية كتير ، أقلها رعبا مثلا المخدرات ، المهم ان الشاب ده صور ال unboxing  ده هو وصديقة ليه كانت موجودة معاه في الفيديو وقت التصوير وبتتفرج على الي هو بيعمله ، بس كانت متحفظه شويه كده وخايفه من ال dark web  والي ممكن يجي منه فطلعله ايه بقي في الbox  العشوائي ده ، طلعله حاجات غريبة جدا و كريبي غالبا ممكن تكون دليل على جريمة بشعة وارد جدا تكون حصلت لطفل او لمجموعة من الأطفال! ، وليه بقول ممكن وغالبا كتير ؟ لأنه الموضوع  منقدرش نجزم انه هو حقيقي ، ممكن برده يكون مفبرك او صاحبنا ده عايز يعمل مشاهدات من وراه لقناته ، الموضوع فعلا يثير الفضول بشكل غريب لأنه لقي في box  ده شنطة مدرسة شكلها لطفلة بنت بس جواها ملابس لطفل ولد وعرايس شكلها يخوف عليها خصلات شعر وحقيقية ودبدوب شكله كيوت بس جواه قلب ، القلب ده بقى جواه usb flash   شكل كده عليه مصيبة ، طول الفيديو هو بيستعرض الحاجات الي جوا الbox  كان باين عليهم التوتر وعدم الراحة هتقولي عرفت منين يا أبوحميد التفاصيل دي ،شوفت ازاي؟ هقولك مهو انا بسمع في نص الحلقة بتاعة البودكاست الفضول عندي زاد جدا ، فقررت اني انا اروح ادور ورا القصة نفسها واشوف الفيديو الي على قناتهم .. المهم انه الفلاشة دي كان عليها فيديو واضح كده انه غريب وعجيب ومريب سبب لصحابنا دول قلق جامد جامد جامد ، وده خلاني أسأل نفسي .. تفتكروا ان صناع المحتوى في سبيل انه هم يعملوا مشاهدات للقناة بتاعتهم على يوتيوب ممكن الموضوع ده يوصل بيهم لنوعية زي كده من الفيديوهات؟! "

 

Mind Seed TV: If we get a thousand views on this video , I will upload a part2

 

محمد علي : " فلو القصة دي بقى شدتك ادخل اسمعها في الحلقة رقم واحد من بودكاست عناكب الشبكة ، ايه ده ، اوك احنا بنقرب من المنطقة رقم ٣ ، طيب استعدوا معايا بقى اعزائي الركاب هننزل في منطقة لذيذة كده ورايقة تخفف عنكم شوية بعد الي سمعتوه ده

 

مؤثر صوتي: صوت رائد فضاء يتحدث في الجهاز اللاسلكي

 

محمد علي : يا جماعة هو انتوا فاكرين انه احنا لوحدنا في الكون ده ؟! ، اعتقد معظمنا شاف الصور الجديدة الي صورها أقوى تليسكوب فضائي على الاطلاق ، تليسكوب جيمس ويب الي قدر يصورلنا احنا البشر أعمق وأدق صور للكون العميق البعيد القديم جدا ، الصور دي خلتنا وخلت ناسا والعالم كله يرجع تاني يتساءل .. هل معقول احنا لوحدنا في الكون الهائل ده ؟! ، الكون الي مش قادرين حتى نقدر نستوعب حجمه الهائل! ، ناسا قالت ان الصور دي حرفياً زي ما تكون مسكت حبة رمل من وسط صحرا بتبص عليها ده الحجم بتاع المنظر الي لقطه التليسكوب! ، تخيلتوا بقي معايا حجم كوكبنا الجميل ده في وسط الكون ممكن يبقى عامل ازاي؟! ده احنا ولا حاجه في وسط الكون ده كله! ، انا شخصيا بحس انه احنا البشر -معظمنا يعني - عايز يحس انه فيه كائنات تانية عايشة معانا في مكان ما في الكون ، او ان في حضارات تانية ممكن تكون سابقانا كتير من الناحية العلمية او التكنولوجية ، دايما بقعد أقول لنفسي مش تبقى حاجة حلوة كده لو حالفنا الحظ ولحقنا الزمن الي ممكن نكون فيه بنتواصل فعلا مع فضائيين؟!! وبنتبادل بقى الزيارات الرسمية والحاجات دي وتسمع بقى في الأخبار حاجة زي : التقى اليوم رئيس وكالة ناسا مع السيد الكائن الفضائي فلان الفلاني سفير الكوكب الشقيق من مجرة مش عارف ايه الي جنب درب التبانة! وذلك في زيارة تاريخية الى كوكب الأرض والتي تستمر لثلاثة أيام ضوئية ، وذلك بعد مباحثات ومناورات عديدة على مر العصور بين البشر والكائنات الفضائية ، توصل الطرفان من خلالها لآلية آمنة للتواصل وتبادل الثقة والخبرات ، تصدقوا والله الموضوع ده مشوق فعلا ! ياسلااام !  بس الموضوع مش بالصورة الوردية دي خالص ده في علماء شايفينه حاجه خطيرة جدا أشهرهم  Stephen Hawking "

 

صوت د. محمد قاسم ، مقدم بودكاست دبي المستقبل : " لقد حذر Stephen Hawking قبل وفاته من ارسال أي رسالة الى الفضاء الخارجي حتى لا يلتقطها فضائيين ويستدلوا بها على وجودنا في الأرض ، لكن العلماء لم يستمعوا له ولن يستمعوا له ، أرسلوا عدة رسائل سابقا وفي هذه الأيام يحاول العلماء ارسال رسالة مشفرة جديدة الى الفضاء الخارجي "

 

محمد علي : " حلقة رسالة الى الفضائيين من بودكاست دبي المستقبل لفتت انتباهي جدا حقيقي للقصة دي لأنها فعلا مثيرة للفضول والتساؤلات الي ملهاش نهاية Stephen Hawking كان شايف قبل وفاته اننا مفروض  منحاولش أصلا نتواصل مع الفضائيين لو كانوا موجودين ، وده لأنه الكون قديم جدا واحنا حضارتنا العلمية نفسها تعتبر مش قديمة خالص بالنسبة لعمر الكون "

 

د. محمد قاسم: "حضارتنا العلمية المسؤولة عن تطور البشر تكنولوجيا عمرها ٥٠٠ سنة فقط "

 

محمد علي: " فوارد جدا ان يكون في حضارات تانية كتير سابقانا بكتير اوي اوي اوي ، الحضارات دي لو وصلها الرسايل الي احنا خلاص اوريدي بعتناها مش هنعرف نعملها unsend for all  زي الواتساب كده لو وصلتهم بقى الرسايل دي مش بالضرورة خالص يكونوا كائنات طيبة ومسالمة ، ممكن اوي ساعتها يستغربوا ويقرروا هما كمان يستكشفوا مجرتنا وكوكبنا الي جالهم منه الرسالة دي ويجوا بقى يحتلونا ويسيطروا على الكوكب بتاعنا "

 

د. محمد قاسم: " يعتقد    Hawking انه قد تنظر لنا حضارة متقدمة على اننا حضارة ضعيفة وتستغل الفرصة للهجوم علينا فهو لا يود ان يجعل الأرض هدفا لهذه الحضارات ويتفق معاه Elon Musk في نفس التوجه وأيضا يحذر من ذلك ويدعو للتأني في ارسال الرسائل الى الفضاء "

 

محمد علي : " فلو حابين بقى تعرفوا تفاصيل أكتر عن الموضوع ده انصحكم تسمعوا الحلقة دي رسالة الى الفضائيين من بودكاست دبي المستقبل من .. مؤسسة .. دبي .. للمستقبل! زي ما قالها كده مقدم البودكاست "

 

د. محمد قاسم : "من .. مؤسسة .. دبي .. للمستقبل! "

 

محمد علي : "عاجبني جدا خامة صوته وطريقة سرده للمعلومات ، بودكاست بينشر الثقافة والعلم والتكنولوجيا وبيعمل مقابلات مع شخصيات عالمية في مجالات متنوعة ، طيب نروح لمنطقة تانية ، منطقة شائكة شوية ..

 

تعرفوا ايه يا جماعة عن المزارات الدينية ؟! مش المزارات الدينية الحقيقية لا ، المزارات الدينية الوهمية ، الأضرحة أو المراقد المنسوبة لشخصيات حقيقية وغير حقيقية ، مزارات بيروحوها عامة الناس من الي مضحوك عليهم باسم الدين علشان يتباركوا بيها او بيبقوا فاكرين انها حاجة بتقربهم لربنا لما يزوروها او انها هتحققلهم مثلا طلباتهم وأمانيهم في الحياة لما يطلبوا الرضا والقرب من  أصحابها .. قد ايه في شخصيات ومنظمات مريضة و يمكن جهات مسؤولة كمان مستفيدة من وجود المزارات الوهمية دي ، مستفيدة بشكل مادي وسياسي من تجهيل مجتمعاتها والسيطرة على أفكارها ومشاعرها ، هو ايه سبب الايمان المطلق بالمزارات دي من دون حتى البحث عن الحقيقة؟! ، مش عارف! .. الظاهرة دي للأسف منتشرة في دول كتيرة جدا من ضمنها العراق ، بس الفوضى وسوء الإدارة الي في الدول دي بيسمحوا لأصحاب النفوس الضعيفة وتجار الأزمات انهم يستغلوا عواطف الناس وحبهم للشخصيات الدينية او أهل البيت مثلا علشان ينصبوا ويحتالوا عليهم! ويحققوا من وراهم مكاسب مادية مهولة! وطبعا  .. بتحصل كوارث كتير بسبب وجود المزارات دي ، مثلا الحادثة الأخيرة الي حصلت في ما يسمى بقطارة الإمام علي في محافظة كربلاء في العراق ، انهارت القطارة فوق الناس الي كانوا موجودين فيها وكان في مصابين كتير وضحايا وناس أكتر كانوا محبوسين تحت التراب بعد ما وقع عليهم التل الترابي المحيط بالمزار "

 

صوت سجد الجبوري من بودكاست بالعراقي مع سجد : "الخضراوات بنت الحسن ، كمون ، مربط الإمام حمزة و قطارة الإمام علي .. هذه ليست أسماء كتبت من وحي خيالنا ، انما هي مراقد دينية منتشرة في وسط وجنوب العراق يقصدها الناس لطلب الحاجات منها  كما يقولون ، ما علاقة السياسة والفساد المستشري في العراق بهذه المزارات"

 

محمد علي : "حلقة المزارات الدينية الوهمية في العراق من بودكسات بالعراقي مع سجد ، أحدث إنتاجات بودكاست أخبار الآن ، حلقة بتناقش وبتحقق في تفاصيل الظاهرة المنتشرة بشكل مخيف في العراق بودكاست بالعراقي مع سجد بيقدم تحقيقات صحفية عن قصص غير مروية عن العراق منها مثلا حلقة عن رتب عسكرية ارتبطت اسماؤهم بحماية فاشونيستات والي بالتأكيد بيشوه جدا في سمعة جهاز الأمن العراقي ، طيب خلوني اكلمكم شويه عن فكرة بودكاست " البودكاست المفضل " زي ما سمعتوا كده في الإنترو الفكرة ببساطة انه انا بسمعك او بديلك فكرة عن أفضل حلقات بودكاست أنا سمعتها خلال الفترة الي فاتت بس الحقيقة أنا عاير ان انتوا كمان تشاركوني في تقديم الحلقات دي وحابب جدا جدا ان المشاركات دي تكون فعلا مسموعة ومؤثرة ،طيب ممكن تشاركوا معانا ازاي أنا بكل بساطة بسألكم ايه هو البودكاست المفضل عندكم أو مثلا ايه هي الحلقات الي انتوا سمعتوها الفترة الي فاتت ولفتت انتباهكم جدا ، اتمنى تقدروا تبعتولي المعلومات دي على هيئة تسجيل صوتي مثلا يكون بجودة عالية في بداية التسجيل مثلا تعرفونا بنفسكم وانتم من أي بلد ، وايه هو البودكاست المفضل بالنسبالكم او ايه هي الحلقات الي بتحبوها ، وبتحبوها ليه وهكذا ، بس اتمنى علشان خاطري انه التسجيلات دي تكون بجودة مش هقول جودة احترافية بس جودة على الأقل مقبولة أقدر انه انا أعرضها في حلقات البودكاست بدون مشاكل لتقنية وتكون يعني الموضوع كله واضح والناس الي بتسمع تبقى حاسه انه هي مستمتعه وهي بتسمع ياسلام كمان بقى لو تدونا رأيكم في البودكاست المفضل الي هو البودكاست الي انتوا بتسمعوه حاليا ده مش البودكاست المفضل بتاعكم لا يعني انتوا أكيد فاهمين يعني ، واتمنى ان البودكاست المفضل يكون هو البودكاست المفضل بالنسبالكم ياسلام أكون في قمة سعادتي ، طيب معرفناش هنبعت ده فين يعني ، هنبعت ده على الواتساب على الرقم ده 00971568531592  أو هتلاقوالرقم ده مكتوب أصلا في وصف الحلقة والي حابب يشارك بس مش حابب انه هو يبعت رسالة صوتية ممكن يكتبلنا رسالة على الواتساب وأنا هقرئها عنه بصوتي ، من كل قلبي بتمنى ليكم رحلة استماع مميزة ، أنا محمد علي وده البودكاست المفضل .


قائمة الحلقات